Read Maru GYAUNG: SU: 29 Bible Online

GYAUNG: SU: 29 - Maru bible

GYAUNG: SU: 29

¹Lho" nhad' khye' ein: khye' lho" xin: sao qhid' ba re naonhaung" wa caung:pa" nae" qhid' mae" ham phaung: ca" genae" pe" mau" re: magai: zaui: genae". Ai: ba na re labo" jham re mad ca" genae".

²ASANG re- yao: re ngaui nhao: ra" meim sheim phad' ngaui" byid' ra" xeim: ASANG re qhaug' byid: ge,- aijham wa pe" qo mabo: ra" nung: lo: dadau:- yao lo: dadau: we' dazin byang" ra" yao nau" nhad' dau: qhaug' byid: ge,.

³Gaug zo xeim: khyo" zhanlun xau we' lhag' ra" cin man"- nung: jaung lo: dadau: mae cin man" khyaug' kaug'- yao lo: dadau: mae cin man" byid kaug' qhaug' byid: ge,.

⁴Yao: nau" dadau: mae cin man" shid' kaug' qhaug' byid: ge,.

⁵Qobo khyad' xeim: khyo" re: cad' be, lo: dadau: qhaug' byid: ge, ceru: kad' yang: ai: byumyu" re caung:pa" thung" khyo" kyang" san: pye' wa,.

⁶Lho" xin: sao qhid' ba qhid' mae" abang mabyid phad' ngaui" ra" cin man" xeim: we' ba khao: ngo" mae" phad' ngaui" xeim:- cin man" xeim: we' sabyi qhang: xeim: tho' mae ce: ngaui" xeim: jham re qhaug' byid: ge,- ce: zo: ve ngaui" xeim: jham wa ASANG re ngaui nhao: ra" meim sheim ngad: ra".

⁷Lho" nhad' khye' daxe ba: ba mae- caung:pa" nae" qhid' mae" ham: phaung ge, pe" dazo: dashaug' ge, pe" mau" re: dazaui: ge,.

⁸Yao: re ngaui nhao: ra" meim sheim khyo" ASANG re phad' ngaui" ra" xeim: qhaug' byid: ge,. Aijham wa nung: jaung lo: dadau:- yao lo: dadau: we' dazin byang" ra" yao lo: nau" nhad' dau: qhaug' byid: ge,. Ai: gug'nyhug' alhab' wa pe" qo magai: bo ngad: ra".

⁹Zhan:lun: xau we' lhag' ra" cin man" ngaui" xeim: khyo" kam" wa- nung: jaung lo: mae cinman" khyaug' kaug'- yao lo: mae cinman" byid kaug' we'-

¹⁰Yao nau" dadau: mae cin man" shid' kaug' re boqhaug' byid: ge,.

¹¹Amung: ba khao: ngo" phad' ngaui" xeim: we' ainho: cin man" ngaui" xeim: we' sabyi qang: ngaui" xeim: tho' mago"- amyu" byu qe: qhid' mae" ngaui" byid' ra" qobo khyad' ngaui" xeim: qhid' mae" cad' be, dadau: rere: ngaui" byid: ca" ra".

¹²Lho" nhad' khye' ein: khye' daxe: ngo" ba: ba mae caung:pa" nae" qhid' mae" ham: phaung ge, ASANG re nga: yhe' byid' ra" khyo" ce: poe re kad' mung: pe" mau" re: dazaui: ge,.

¹³Sao qhid' ba mae ASANG re- yao: re ngaui nhao: ra" meim sheim ngad: ra" zo:ve xeim: pe" qo mabo: ra" nung: jaung lo: daxe: sam dau:- yao lo: shid' dau: we' dazin byang" ra" yao: lo: nau" daxe: byid dau: qhaug' byid: ge,.

¹⁴Zhan:lun: xau we' lhag' ra" gaug zo xeim:- nung: jaung lo: dau: khao: ngo" mae cinman" khyaug' kaug' yao lo: dau: khao: ngo" mae cinman" byid kaug' we'

¹⁵Yao nau" dau: khao: ngo" mae cinman" shid' kaug' re: bobo ca" ra" sabyi qang: ngaui" xeim: qhaug' byid: ge,.

¹⁶Qobo khyad' ngaui" xeim: khyo" re: cad' be, lo: dadau: rere: qhaug' byid: ge,. Ba khao: ngo" mae" phad' ngaui" xeim: mae cinman" ngaui" xeim: we' sabyi qang: ngaui" xeim: laung: yang: ce: ngaui" xeim: re qhaug' byid: ge,.

¹⁷Shid' ba ein: ba mae qo mabo: ra" nung: jaung lo: nau" daxe: shid' dau: yao lo: shid' dau: we' dazin byang" ra" yao nau" daxe: byid dau: qhaug' byid: ge,.

¹⁸Aigu: we' daga" sao qhid' ba mae qhaug' byid: ca" ra" xeim: jham rere: boqhaug' byid: ge,.

²⁰Sam ba ein: ba mae- pe" qo mabo: ra" nung: jaung lo: daxe: dadau:- yao lo: shid' dau: we' dazin byang" ra" yao lo: nau" daxe: byid dau: qhaug' byid: ge,.

²¹Ai: gu: we' daga" sao qhid' ba: mae qhaug' byid: ca" ra" xeim: jham rere: boqhaug' byid: ge,.

²³Byid ba ein: ba mae pe" qo mabo: ra" nung: jaung lo: nau" daxe dau: yao lo: shid' dau: we' dazin byang" ra" yao nau" daxe: byid dau: qhaug' byid: ge,.

²⁴Ai: gu: we' daga" sao qhid' ba: qhid' mae" qhaug' byid: ca" ra" xeim: jham rere: bo:qhaug' byid: ge,.

²⁶Ngo" ba ein: ba mae pe" qo mabo: ra" nung: jaung lo: gug dau:- yao lo: shid' dau: we' dazin byang" ra" yao nau" daxe: byid dau: qhaug' byid: ge,.

²⁷Ai: gu: we' daga" sao qhid' ba: qhid' mae" qhaug' byid ca" ra" xeim: jham rere: bo:qhaug' byid: ge,.

²⁹Khyaug' ba ein: ba mae- pe" qo mabo: ra" nung: jaung lo: nau" she' dau:- yao lo: nau" shid' dau: we' dazin byang" ra" yao nau" daxe: byid dau: qhaug' byid: ge,.

³⁰Ai: gu: we' daga" sao qhid' ba: qhid' mae" qhaug' byid: ca" ra" xeim: jham rere: bo:qhaug' byid: ge,.

³²Nhad' ba ein: ba mae- pe" qo mabo: ra" nung: jaung lo: nhad' dau:- yao lo: shid' dau: we' dazin byang" ra" yao lo: nau" daxe: byid dau: qhaug' byid: ge,.

³³Aigu: we' daga" sao qhid' ba: qhid' mae qhaug' byid: ca" ra" xeim: jham rere: bo:qhaug' byid; ge,.

³⁵She' ba ein: ba mae caung:pa" nae" qhid' mae" ham phaung mung: pe" mau" dazaui: ge,.

³⁶Yao: re ngaui nhao: ra" meim sheim ASANG re phad' ngaui" byid' ra" xeim: re qhaug' byid ge,- pe" qo mabo: ra" nung: jaung lo: dadau:- yao lo: dadau: we' dazin byang" ra" yao nau" nhad' dau: qhaug' byid: ge,.

³⁷Ai: gu: we' daga" sao qhid' ba: qhid' mae" qhaug' byid ca" ra" xeim: jham rere: boqhaug' byid: ge,.

³⁹Cegu: wa phad' ngaui" xeim:- gaug zo ngaui" xeim:- sabyi qang: ngaui" xeim: we' zam" khug: ra" ngaui" xeim: khyo" ai: so" to" ra" lam khug: poe jham mae ni" ASANG re qhaug' byid: ca" ra" ngaui" xeim: jham ngad: ra". Cegu: wa dao: thang" re zaui" pyang" ru- mangad: lao" myid bug: ngaui" xeim: qhaug' byid' ra" tho' mae laung: yang: qhaug' byid: ca" ru ngad: ra".

⁴⁰Aimung: Moshe wa- ASANG: yang yao: re amyin" byid' to" ru ja: khao: ngo" Israel byumyu" qere ta" kyo: va".