Read Maru GYAUNG: SU: 3 Bible Online

GYAUNG: SU: 3 - Maru bible

GYAUNG: SU: 3

¹Ce wa Sina bam dao mae ASANG Moshe re dao: jhau: au:- Arun we' Moshe tao: nho: yham byu qe ngad: ako".

²Arun wa- zoqhid' yaug Nadab- Abihu- Eleaza we' Ithama ga" ra" yauggai zo: byid yaug qo" ra".

³Yao: tao ho' wa khinjaung qekhyo" xau gyad yang: lo, kai: byid: qhug' mo, ngad: ako".

⁴Ngadqere: Nadab we' Abihu tao wa din"pyad' yo mae ASANG re masan masin" ra" myi: qhaug' byid: ko" au: re se' pye' qhug' ako". Yao: tao wa zo: dau maqo" ngad: ako". Airumung: Eleaza we' Ithama tao wa Arun nho: pyad gyo: mae khinjaung tao khyo" caung da" byid' ako".

⁵ASANG wa Moshe re-

⁶Levi amyu" qere qhid' khyo jhui" li" mung: yao: bam re khinjaung pho" Arun nho: daui daui mo, khyo" san: to: wa,-

⁷Yao: bam wa nga" qhid' kheim: Zaung mae ca" ra" mau" re we' khinjaung qere caung da" byid: nae" mau" we'- mo, byu phung: geim" re caung da" byid' ra" mau" zo" re zaui: so: genae" ngad: ra".

⁸Yao: bam wa Zaung: nho: zai kug jham alhab' re qo yu nae" we' dang: ra" Israel byu qere caung da" byid' ra" mau" re zaui: so: genae" ngad: ra".

⁹Levi amyu" qe vin vo, ca" ra" qo wa Arun re we' yao" yauggai zo: qere caung da" byid' nae" za: ngad: ako".

¹⁰Nao wa Arun we' yao" yauggai zo: qere khinjaung mau" zo" qo re boe" sho' vin vo, genae" qhid' mae" jaung byid: wa,- airu: kad' nae" seim" ra" yaug gaje khag' ngadqere: se' pye' ru qhug' nae" ngad: ra".

¹¹ASANG wa Moshe re- ana" Levi amyu" qe wa nga" qhid' mae" ngad nae" ngad: ako". Egutu byu qe: zoqhid' alhab' re ngo se' pye' au: ngo wa Israel byu qe:- ug' khug' dinkhu: khao: ngo" mae" zoqhid' yauggai zo: qere we' gug'nyhug' ja: khao: ngo" mae" sao qhid' sad' ra" dau: re ngo yao" qhid' mae" khyo" ngo qhaug' byid' to: va". Ana" ngoyao" qhid' mae" khyo" Israel amyu" qenho: zoqhid' yauggai zo: qe: atha" khyo" ngo wa Levi amyu" qere qo" to: va". Yao: bam nga" mae" ngad: li" genae". Ngo wa ASANG ngad:- ga: ta" ra".

¹²

¹³

¹⁴ASANG wa Sina din"pyad' yo mae Levi amyu" qere amyu" kaung jham we' yham khaung jham re kho' yang: lho" dakhye' byang" ra" yaug we' je: qi" ra" yauggai yaug khao: ngo" re mang gaug: yu nae" qhid' mae" Moshe re amyin" byid' ra". Moshe re: airu: kad' ra".

¹⁵

¹⁶

¹⁷Levi wa Gershon- Kohad- Merari mang: ra" yauggai zo: qe sam yaug qo" ra". Yao: bam wa yao: bam: mang vin: ra" amyu" kaung qenho: phug' pho" qe ngad: ako". Gershon wa Libni we' Shimi ga: mang: ra" yauggai zo: shid' yaug qo" ra". Kohad wa Amram- Izha- Hebron- Uzie ga: mang: ra" yauggai zo: byid yaug qo" ra". Amung: Merari wa Mali we' Mushi ga: mang: ra" yauggai zo: shid' yaug qo" ra". Yao: bam wa yao: bam: mang vin ko" ra" yham khaung qenho: phug' pho" qe ngad: ako".

¹⁸

¹⁹

²⁰

²¹Gershon kaung wa Libni we' Shimi yham khaung qhan" to" ra" amyu" kaung ngad: ra".

²²Mang ke' to" ra" lho" dakhye' byang" va" ru we' aitho' je: qi" ra" yauggai alhab' wa 7,500 yaug ngad: ako".

²³Ce: amyu" kaung wa amyu" kaung au: jhaung ngad: ra" Laela nho: yauggai zo: Eliasab we' daga" jamu nhaung thao"- ba vao shad' mae thang: na: ra" jamu kad' genae" ngad: ra".

²⁴

²⁵Yao: bam wa Zaung qhid' mae" vin: vo; nae" qo qo" mo, ngad: ako". Aijham wa akhug shad' mhao: mug: pin: lung:- adao shad' mhao: mug: pin: lung:- kham: zang akyo pin: lung:-

²⁶Zaung we' phan lhang" gam: mae qae: to" ra" akyo pin: lung:- qae: to" ra" vang" kham: akyo pin: lung: jham re caung nae" mau" qo" ako". Yao: bam wa ce: zai jham we' xo' taui" jo; ra" mau" zo" alhab' re vin vo; nae" qo qo" ako".

²⁷Kohad amyu" kaung wa Amram- Izha- Hebron- Uzie yham khaung jham re qhan" to" ra" amyu" kaung ngad: ra".

²⁸Mang ke' to" ra" lho" dakhye' byang" va" ru we' aitho' je: qi" ra" yauggai alhab' wa 8,600 yaug ngad: ako".

²⁹Ce: amyu" kaung wa amyu" kaung au: jhaung ngad: ra" Uzie nho: yauggai zo: ngad: ra" Elizaphan we' daga" Zaung mug: thao shad' mae thang: na: ra" Zaung kad' genae" ngad: ra".

³⁰

³¹Yao: bam wa Dao: Thang" Ban"- saboe"- myikaug' tao"- phan jham- Gyang" Lho" Jo, qo mae khinjaung pho" ci: ra" keim kang: zai jham- Gyang" Lho" Thao" Jo, qo khyo vao ye" ra" kham: qhid' au: mae" akyo pin: lung: jham re qu" caung: ra" mau" qhid' mae" vin vo; nae" qo qo" mo, ngad: ako". Yao: bam wa ce: zai jham we' xo' taui" jo; ra" mau" zo" alhab' re vin vo; nae" qo qo" ako".

³²Levi amyu" qenho: au: jhaung wa khinjaung pho" Arun nho: yauggai zo: Eleaza ngad: ra". Yao: wa ai: Gyang" Lho" Jo, qo mae vin vo; ca" ra" qo re zaui: so: ko" ra" mo, re au: jhui" she yaug ngad: ra".

³³Merari kaung wa Mali we' Mushi yham khaung shid' lam: re qhan" to" ra" amyu" kaung ngad: ra".

³⁴Lho" dakhye' byang" va" yauggai nau" we' aitho' je: qi" ra" mang ke' to" ra" yauggai nau" qe alhab' wa 6,200 ngad: ako".

³⁵Ce: amyu" kaung wa amyu" au: jhaung ngad: ra". Abihai nho: yauggai zo: Zurie we' daga" Zaung mug: am: shad' mae thang: na: ra" jamu kad' genae" ngad: ra".

³⁶Yao: bam wa Zaung sag' pye: jham- akyao" jham- zang jham- zang pan jham- zhaug' ra" mau" alhab' qhid' mae" qo qo" mo, ngad: ako". Yao: bam wa ai: zai jham we' jho" xo' ra" mau" alhab' vin vo; nae" qo qo" mo, ngad: ako".

³⁷Yao: bam wa zang jham- zang pan jham- daung" zang jham- taung gaung shad' vang" qhid' mae" taui: jham qe: qhid' mae" re: qo qo" mo, ngad: ako".

³⁸Moshe- Arun we' yao" yauggai zo: qe wa ba thug' shad' Zaung qhid' au: mae jamu kad' genae" ngad: ra". Yao: bam wa Israel byu qe: qhid' mae" Gyang" Lho" Jo, qo mae zaui: ca" ra" mau" zo" re vin vo; nae" qo qo" mo, ngad: ako". Airu: kad' nae" seim" ra" yaug gaje khag' ngadqere: se' pye' ru qhug' nae" ngad: ra".

³⁹ASANG: amyin" khyo" amyu" kaung kho' yang: lho" dakhye' byang" va" mo, we' ai tho' je: qi" ra" Levi amyu" yauggai qere Moshe mang ke' ra" gu: alhab' wa 22,000 yaug ngad: ako".

⁴⁰ASANG wa Moshe re- Israel byumyu" qenho: zoqhid' yauggai zo: wa nga" qhid' mae" ngad: ra". Airumung: lho" dakhye' byang" va" ru we' ai tho' je: qi" ra" zoqhid' yauggai zo: yaug khao: ngo" re mang we' khyag' khyag' japhin: gaug: to: wa,- ngadqere: ai bam: gaung tha" Levi amyu" alhab' re nga" byumyu" khyo" ngo mho' yu ra". Ngo wa ASANG ngad: -ngo wa Levi myu" qenho: gug'nyhug' jham rere:- gug'nyhug' alhab' mae" sao qhid' xao" ra" gug'nyhug' gaung tha" ngo mho' yu nae".

⁴¹

⁴²Moshe wa mho dao: tae" gyo: mung:- lho" dakhye' byang" va" ru we' aitho' je: qi" ra" zoqhid' yauggai zo: alhab' re mang japhin: gaug: yu: ru alhab' wa 22,273 yaug ngad: ra".

⁴³

⁴⁴ASANG wa Moshe re-

⁴⁵Ana"- Levi amyu" re Israel byumyu" zoqhid' alhab' mo; gaung tha" nga" mae" ngad: ra" khyo" qhaug' byid: wa,- aimung:- Israel byu qe: gug'nyhug' mae" sao qhid' xao" ra" gug'nyhug' gaung tha" nga" qhid' mae" ngad: ra" khyo"- Levi amyu" qenho: gug'nyhug' ngore qhaug' byid: la,- ga: ta" ra".

⁴⁶Israel byumyu" zoqhid' yauggai zo: qe wa Levi amyu" qe tho' 273 yaug je: jo; ruyang nao wa ai: jan" jo; ra" yauggai zo: qere dam: tug' vai: yu ca" ra".

⁴⁷Tarha" vao: ra" azhao" re cao" yang: yaug khao: ngo" qhid' mae" dayaug: qhid' mae" ngaui thang: the: ngo" kye' kye' byid: ca" ra".

⁴⁸Amung: ce: ngaui jham re Arun we' yao" yauggai zo: qere byid: wa,- ga: ta" ra".

⁴⁹Moshe wa mho dao: tae" gyo: mung:-

⁵⁰Ngaui thang: the: 1365 kye' re yu yang: ai: ngaui jham re-

⁵¹Arun we' yao" yauggai zo: qere byid' ra".