Read Maru GYAUNG: SU: 31 Bible Online

GYAUNG: SU: 31 - Maru bible

GYAUNG: SU: 31

²Israel byumyu" re Midian byumyu" qe kad' lai: lo: ra" mau" zo" mathao mae yao: bam re qobo dae byid: wa,- airu re bin: kad' thao nao shid nae" ngad: ra"- ga: ta" ra".

³Aimung: Moshe wa ai byumyu" re ASANG re Midian byumyu" yang kad' lai: lo: ra" mathao mae Midian byumyu" re naonhaung" khe' zin: mung: yao: bam re qobo dae qo" byid: nae" qhid' mae" mang: zin: seim" ge,.

⁴Israel byumyu" kaung khao: ngo" mae" byu dataung yaug yaug re gye poe khyo ye: nhao ge,- ga: ta" ra".

⁵Airumung: dakaung mae" byu dataung taung khyin: yu mung: byu datug: shid' taung gyekhe' nae" seim" to" ako".

⁶Moshe wa yao: bam re- gyang" lho" ra" zai jham we' aso: qhu" nae" labo" re qu" caung: na: ra" khinjaung Eleaza nho: yauggai zo: Phineha yang eib: ra" qao: mae gyekhe' ye: nhao: ra".

⁷Yao: bam wa ASANG: yang Moshe re amyin" byid' to" ru we' dakhyo: Midian byu qere khe' zin: mung: yauggai qe alhab' re se' pye' ako".

⁸Aibam mae Midian kho:kham ngo" yaug ngad ko" ra" Evi- Rekem- Zura- Hu we' Reba bam bobo: ako". Yao: bam wa Beo nho: yauggai zo: Balam rere: se' pye' ako".

⁹Israel byumyu" qe wa Midian myiqe: qe we' zoshao qere taung" yu mung: yao: bam: gug'nyhug' nung: kyaung" jham re sham" yu: ru we' yao: bam: jo,nho" re lhad' yu: ako".

¹⁰Yao: bam: vomo" jham we' Jamu jham re ngha" pye' ako".

¹¹Yao: bam wa kyam: byu qe we' gug'nyhug' jham rere: yao: bam the' lhad' yu: ra" lanyab jham alhab' rere: sham" yu: pye' ako".

¹²Aimung: yao: bam wa ai: gu: re- Moshe we' Eleaza Yerikho mae" Yodan gyaung: thoete' Moba jao: gyu" mae jo, ra" jamu mae na: jo; ko" ra" Israel byumyu" qejhao" jhui" ye" ako".

¹³Moshe- Eleaza we' mo, byu phaung: nho: au: jhaung gatau alhab' mo, wa gyetab re yetug: yu nae" qhid' mae" jamu mae" thug' ye" lo" ako".

¹⁴Gye poe mae" dam: phao: tug' lo" ra" zug: qe gyetab qi: we' tab mo" re eib: ra" gyezug: qere Moshe nhag' yo" ra".

¹⁵Yao: wa ai: zug: qere- naonhaung" wa pe"mung: myiqe: qere adaui nha: to: ca" ko" i?

¹⁶Ai: myiqe: qe wa Balam nho: mho" shid' ra" khyo re cao" mung: Peora mae byumyu" re ASANG mae jhaug' mazaug sho' jhui" nghung" lo" mo, ngad ko" rure myid: beim: ge,. Airumung: yang: ASANG: byumyu" qenho: dao mae no aqam" joe" lo nhao: ru ngad: ra".

¹⁷Aimung: ana" wa- gaung sho: jho" zam" ra" yauggai nau" yaug khao: ngo" we' myiqe: yaug khao: ngo" re se' pye' ge,.

¹⁸Ngadqere: gaung sho: mazam" qu" ra" myiqe: nau" we' zomyi: gyang" myiqe: qere naonhaung" qhid' mae" nha: to: ge,.

¹⁹Ana" byumyu" dayaug yaug re se' mo, we' sushid mao gaung re the' tin" zao" mo, wa jamu taung gaung mae nhad' ba na: jo, ca" ako". Sam ba ein: ba we' nhad' ba ein: ba re naonhaung" yao: we' naonhaung" the' taung" yu: ra" myiqe: qe wa yao: yao" gaung re kyang" san: pye' qo: ra".

²⁰Naonhaung" wa mai bau: khye' khao: ngo"- shoqid- cad' be, mug' we' sag' yang kad' to" ra" ci zai alhab' re kyang" san: pye' ca" ra"- ga: ta" ra".

²¹Khinjaung Eleaza wa mang: zin: jao: mae" dam: tug' loko" ra" mo, re ce wa Moshe re ASANG byid' to" ra" thung" tarha" jham ngad: ra".

²²Qhang- ngaui- gyid:- jo,to'- to' phyu- xa ru" ra" myi: manga" ra" zai ja: khao: ngo" re myi: khyo" lai nhao mung: kyang" san: pye' ca" nae". Gatau ja: khao: ngo" re wa qid: yang kyang" san: pye' nae" ngad: ra".

²³

²⁴Nhad' ba ein: ba re naonhaung" mai bau: jham re cid' pye' ca" genae". Ailao" naonhaung" wa lalam lakhug: khyo khyo" gyang" san mung: jamu khyo vao ye: nae" akhang" qo" genae"- ga: ta" ra".

²⁵ASANG wa Moshe re-

²⁶Nao we' Eleaza wa mo,byu phaung: nho: gatau au: jhaung qe we' daga"- kyam: byu qe we' gug'nyhug' jham bobo mung: the' sham" yu: ru ja: khao: ngo" re nghe' ge,.

²⁷The' sham" yu: ra" ja: khao: ngo" re- shid' bam kho' myho" mung: dabam re wa gyezo: qe: qhid' mae" dabam: gu: wa dang: ra" mo,byu phaung: qhid' mae" gae byid: wa,-

²⁸Gyezo: qe: gae bam mae" kyam: byu ngo" yo yaug mae" dayaug yaug ai we' dakhyo: nung:- loze- yao- cad' be, rere: ngo" yo dau: mae" dadau: dau: re- ASANG: qhid' mae" khang: khyo" tang" to: ge,.

²⁹Aigu: re wa ASANG: qhid' mae" gakai: lai qhaug' byid' ra" khyo" khinjaung Eleaza re byid: ge,.

³⁰Dang: ra" mo, byu qere kho' gae byid' ra" gae bam mae" kyam: byu ngo" xe mae" dayaug yaug ai we' dakhyo: nung:- loze- yao we' cad' be, rere: ngo" xe mae" dadau: dau: myho" to: ge,. Aigu: re wa ASANG: Zaung mae mau" zaui" ra" Levi qere gae byid: ge,.

³¹Moshe we' Eleaza wa ASANG amyin" byid' to" rure kad' ako".

³²O mae bo: ra" japhin: wa gyezo: qe the' taung" yu: ra" zai tho' mago" yao: bam: qhid' mae" myho" yu: ra" gu: jham ngad: ra". Yao we' cad' be, 675.000 dau:- nung: 72,000 dau:- loze 61,000 dau: we' zomyi: gyang" 32,000 yaug ngad: ako".

³³

³⁴

³⁵

³⁶Gyezo: qe: qhid' mae" agaung: dano" kho' gae byid' ra" gae bam wa- yao we' cad' be, 337,500 dau: ai: gu: mae" 675 dau: wa ASANG: qhid' mae" khang: ngad: ra". Gyezo: qe: qhid' mae" nung: 36,000 dau: ai: gu: mae" 72 dau: wa ASANG: qhid' mae" khang: ngad: ra". Gyezo: qe: qhid' mae" loze 30,500 dau: aigu: mae" 61 dau: wa- ASANG: qhid' mae" khang: ngad: ra". Gyezo: qe qhid' mae" ngad: ra" zomyi: gyang" 16000 yaug mae" 32 yaug wa ASANG: mae" ngad: ra".

³⁷

³⁸

³⁹

⁴⁰

⁴¹Aimung: Moshe wa Eleaza re ASANG amyin" byid' to" ru we' dakhyo: ASANG re gakai: lai qhaug' byid' ra" khang: byid' ako".

⁴²Mo,byu phung: qhid' mae" gae bam re: gyezo: qenho: gae bam we' dano" za: yao we' cad' be, 337,500 dau:- nung: 36,000 dau:- loze 30,500 dau: we' zomyi: gyang" 16,000 ngad: ako".

⁴³

⁴⁴

⁴⁵

⁴⁶

⁴⁷Moshe wa ce: gae bam mae" kyam: byu 50 mae" dayaug yaug we' gug'nyhug' ngo" xe dau: mae" dadau: dau: re ASANG amyin" byid' to" ru we' dakhyo: ASANG: Zaung mae mau" zaui" ra" Levi qere byid' pye' ra".

⁴⁸Amung: gyetab re eib: ra" gyezug: qe wa Moshe jhao" ye: mung:-

⁴⁹Zug: ade, pho" we"- ngonhaung" o mae" gyezo: qere longhe' qu" re dayaug re: magyoe" mabyaug ngad: ako".

⁵⁰Amung: ngonhaung" wa- ngonhaung" the' yu: lo: ra" qhang zai mai bau:- lo,thang: jham- qui: jham- lo, pin: jham- noxaui: noto' jham we' qhang qui: jham cili" bam va". ASANG: yang ngonhaung" re gug: gam byid: nae" qhid' mae" ngonhaung" nho: kao so' aphug' khyo" ASANG re qhaug' byid' ra"- ga: ta" ako".

⁵¹Moshe we' Eleaza wa shaung zai jham mae" qhang alhab' re khae: yu: to" ra".

⁵²Zug: ade, qe byid' ra" jhaung qhu" jham wa byid yo kaug' ngad: ra".

⁵³Gyezug: mangad: mo, wa yao: bam the' lhad' yu: ra" lanyab jham re sang: yu: ako".

⁵⁴Aimung: Moshe we' Eleaza wa- Israel byumyu" qere ASANG: yang bao" thaug' byid: nae" qhid' mae" qhang re Zaung khyo ci:ye" ako".