Read Maru GYAUNG: SU: 33 Bible Online

GYAUNG: SU: 33 - Maru bible

GYAUNG: SU: 33

¹O mae" japhin: wa Israel byumyu" qe Egutu mae" yao: yao" byumyu" kaung we' yao: yao: Moshe we' Arun au: she: ra" qao: mae" phao: thug' lo thao re jamu kad' lo: ra" jo, qo mang jham ngad: ra".

²Moshe wa ASANG: amyin" khyo" yao: bam jamu kad' lo: ra" jo, qo mang re tung" to" ra".

³Israel byumyu" qe wa zin sag' khye' daxe: ngo" ba ein: ba Lai co' Poe thao: ba mae Egutu mae" phao: thug' lo: ako". Yao: bam wa ASANG: gug: gam byid' ra" khug mae ASANG: yang se' pye' ra" zoqhid' yauggai zo: qere nyhab' shaung: na ko" ra" Ramese vogaung: mae" Egutu byu qe: myo, jao: de: de: mae yao: thug' lo" ako". Ceru re kad' yang: ASANG wa Egutu byu qe: so jham tho' je: qam: bo yaug ngad: rure qhu" byid' ra".

⁵Israel byumyu" qe wa- Ramese mae" phao: lo mung: Sukod mae jamu kad' yang: lona: ako".

⁶Yao: bam: qhid' au: mae" jamu din"pyad' yo athao mae" Etham mae ngad: ra".

⁷Ai: jo, qo mae" Bala Zephon nho: ba thug' shad' Pi Hahirod khyo dam: tug' phao: lo mung: Migdo nhae mae jamu lokad' na: ako".

⁸Yao: bam wa Pi Hahirod mae" to" mung: Tham: Ne khyo" Shura din"pyad' yo khyo lai: phyid' ye" ako". Sam ba xo' su" lo" thao yao: bam wa Mara mae jamu lokad' na: ako".

⁹Ai: jo, qo mae" yao: bam wa Elim khyo ye: mung: jamu yekad' na: ako". Pe"mung:ga"re- ai: jo, qo mae qid thug' daxe: shid' dung: we' the' gae nhad' xe gae jo; ra".

¹⁰Yao: bam wa Elim mae" to" mung: Tham: Ne nhae mae jamu lokad' na: ako".

¹¹Thao: lhang mae" yao: bam: jamu wa Sina din"pyad' yo mae ngad: ra".

¹²Athao yao: bam wa Dobkha mae jamu kad' ako".

¹³Aimung: athao Alusha mae jamu kad' ako".

¹⁴Athao yao: bam shaug' qid majo, ra" Rephidim mae thang: ako".

¹⁵Rephidim mae" Hora bam joe" sho' yao: bam wa o mae bo: ra" jo, qo jham mae jamu kad' ako". Sina din"pyad' yo Kibrod Hatava (Ai: lajheim: wa sho: shab' ra" mo; nho: lab jham ga" ru ngad: ra".) Hazerod- Rithma- Rimmon- Pere- Libna- Rissa- Kehelad- Shephe bam Harada- Makhelod- Tahad- Tera- Midkha- Hashmona- Moserod- Bene Yakan- Hora Hagidgad- Yodbatha- Abrona- Eziongeba- Zin din"pyad' yo (ai wa Kade) we' Edom mug: yae mae" Hora bam ngad: ako".

³⁸ASANG: yang amyin" byid' rumae khinjaung Arun wa Hora bam khyo do, ye" ra" yao: wa apyad 123 zin re Israel byumyu" qe Egutu mae" phao: thug' lo thao byid xe zin ein: zin lho" ngo" khye' ein: khye' lho" xin: sao qhid' daba: ba shid: lo" ra".

⁴⁰Khanan mung" nho: mug: thao shad' mae" kho:kham Arad wa Israel byumyu" qe boe" lo: na: ko" rure the' gyo" ra".

⁴¹Israel byumyu" qe wa Hora bam mae" Moba jao: gyu" joe" sho' o mae" jo, qo jham mae jamu kad' lai: lo: ako". Zalmon- Punon- Obod- Moba mug: myid kyo: mae" Abarim vogaung: byo; jo; rumae- Dibon- Gad- Amon Diblathaim- Nebo bam nhae mae" Abarim bam jham we' Yerikho mae" Yodan gyaung: thoete' Bed Yeshimod we' Akakia lao: khaung: gyo: gu: mae" Moba jao: gyu" jham ngad: ra".

⁵⁰Yerikho mae" Yodan gyaung: thoete' ai: Moba jao: gyu" jham mae ASANG wa Moshe re- Israel qe: qhid' mae"-

⁵¹O mae bo: ra" mho" shid' dao: jham re byid: co' ra". Naonhaung" wa Yodan gyaung: re gau" de; ye: mung: Khanan mug: khyo ye: ko" au: re-

⁵²Ai: mug: mae" na xug' qe alhab' re khe' thug' pye' ge,- yao: bam: laug zang we' jo, to' so solho jham alhab' re yao: bam: caung:pa" jao: alhab' re phyo' qheim" pye' byid: ge,.

⁵³Ai: mug: re yena: sang mung: vin tang: te" na: bam ge,. Pe"mung:ga"re ai: rure naonhaung" lo, khyo ngo byid' va" ru ngad:-

⁵⁴Pha" ce' khyo" mung: ai: mug: myid re byumyu" kaung khao: ngo" we' akaung khao: ngo" re cao" yang: kho' gae byid: ge, byumyu" kaung qi: qere je: lu: gu:- byumyu" kaung ngai qere je: lhu" gu: khyo" mug: myid kho' byid: ge,.

⁵⁵Ngadqere: naonhaung" wa ai: mug: mae" na xug' qere makhe' thug' pye' ko" ngad: re na: dang: gyo" ra" mo, wa naonhaung" myo, jid' jham mae basad ru: naonhaung" nae cae: mae" zau: we' dakhyo: boe" genae". Aimung: yao: bam wa naonhaung" re gyekhe' li" genae".

⁵⁶Naonhaung" wa yao: bam re makhe' thug' pye' ngad: re- ngo yao: bam re se' tam" pye' nae" ein: yaung: to" ru we' dakhyo: naonhaung" re phyo' qheim" se' tam" pye' nae".