Read Maru GYAUNG: SU: 35 Bible Online

GYAUNG: SU: 35 - Maru bible

GYAUNG: SU: 35

¹Yerikho mae" Yodan gyaung: gau" de; ra" Moba jao: gyu" mae ASANG wa Moshe re-

²Jo,nho" mae" yao: bam qo" khae: yu ko" ra" gu: mae" vogaung: daqhae: re we' ai: vogaung: lhang" gam: Mhin: gyo, jao: mug: myid daqhae: re Levi amyu" qere byid: qo ko" ra" khyo Israel byu qere ta" kyo: wa,-

³Ai: vogaung: jham wa Levi amyu" qe sang: ra" vogaung: ngad mung: yao: bam aimae na: li" genae". Mhin: gyo, jao: mug: myid jham re: yao: bam: nung: jham we' yao: bam: gug'nyhug' alhab' qhid' mae" ngad: li" nae".

⁴Mhin: gyo, jao: mug: myid wa vang mae" shad' khao: ngo" khyo dataung daung" lu mung: vogaung: re agaung: mae to: yang: byid khyug geim" mae dakhyug mae shid' taung daung" bo sho' kad' nae" ngad: ra".

⁶Nao wa byu dayaug wa gatau byu dayaug yaug re-

⁷Thaug makad' se' yang: ngad: re- yao: qo" phao: khug: na: ra" vogaung: khyaug' vo- Levi amyu" qere byid: nae" ngad: ra". Ai: tho' mago" yao: bam: mhin: gyo, jao: mug: myid we' daga" gatau vogaung: byid xe: shid' vogaung: rere: byid: mung: alhab' re byid xe: she' vo byid: wa,-

⁸Amyu" kaung khao: ngo" mae Levi vogaung: khonho" to: nae" ein: ru wa mug: myid khoqhi" ngad: rure cao" yang: myid: phyid' nae" ngad: ra"- ga: ta" ra".

⁹ASANG wa Moshe re- Israel byu qere-

¹⁰Naonhaung" Yodan gyaung: re gau: mung: Khanan mung" khyo vao ye: gelao"-

¹¹Byu dayaug: yang dayaug yaug re thaug makad' se' yang: ngad: re aiyaug qo" phao: khug: na: ra" phao: khug: na nae" vogaung: jham re naonhaung" khyin: yu genae" ngad: ako".

¹²Yao: wa ai: vogaung: mae lage, phaug' nug: ra" ai: shid' yaug: nho: amyu" ba nam qe: lo, mae" gug: gam: na: li" nae". Byu se' qobo zhaug' ra" yaug re mo, byu qe: qhid' kheim: mae mamyid' ca: qu" lo: magai: se' pye' ngad: ra".

¹³Sam vo re Yodan gyaung: ba thug' shad' mug: mae- sam vo re wa Khanan mung" mae- khyin mung:- airu: khyaug' vo khyin: to: ge,.

¹⁵Ce: vogaung: jham wa Israel byu qe we' malab malaui: na: ru we' dazab daso' na: ra" taung bug byu qe: qhid' mae" phao: khug: na: nae" vogaung: jham khyo" ngad: li" genae". Amung: thaug makad' lo: byu dayaug yaug re se' ra" yaug khag' ngadqere: ai: vogaung: jham mae" davo vo khyo gai: phao: loe; ye" ra".

¹⁶Ngadqere: jo, to'- laug baui- sag'- shae lhae re ci yang: byu dayaug yaug re se' ra" yaug wa byuse' qobo qo" ra" yaug ngad mung: yao: re se' pye' ca" ra".

¹⁹Ai: shid: ra" yaug: nho: te' thao" ra" amyu" ba nam pho" wa ai: byu se' yaug re se' pye' nae" qo bo: ra" yaug ngad: ra". Yao: wa aiyaug re qho: myao lao" se' pye' nae"- ngad: ra".

²⁰Byu dayaug wa dayaug yaug re nghang: yang: deim" phyid' khyo" yang: daja: ja" yang pye' yang:-

²¹Yao" lo, zhab' yang thaung: yang: se' pye' ngad: re yao: wa byu se' qobo qo" yaug ngad mung: yao: re se' pye' nae" ngad: ra". Ai: shid: ra" yaug: nho: te' thao" ra" amyu" ba nam pho" wa ai: byu se' yaug re se' pye' nae" qo bo: ra" yaug ngad: ra". Yao: wa aiyaug re qho: myao lao" se' pye' nae" ngad: ra".

²²Ngadqere: byu dayaug wa yao: manghang" ra" byu dayaug yaug re thaug makad' lo: yao: re deim" phyid' khyo" pye' yang:- daja: ja" yang yao: re the' pye' yang: ngad: re ngad-

²³Mangad: lao" yao" yang dae mate' nug yaug we' yao" gyevo mangad' ra" yaug dayaug yaug re maqu" lo: laug baui pye' ke' yang: dayaug yaug re se' ein gelang:-

²⁴Ceru" mau" mae mo,byu phung: wa lage, phaug' nae" qho: na: ra" ai: shid: ra" yaug: nho: te' thao" ra" amyu" ba nam shad' khyo bo: made, lo: byu se' yaug: shad' bo: de, yang: dao: kho' nae" ngad: ako".

²⁵Mo, byu phung: wa ai: byu se' qobo qo" yaug re ai: shid yaug: nho: amyu" ba nam pho" lo, mae" khyad' yu nae" ngad: ako". Amung: yao: phao: loe; jo; ra" phao: khug: na: ra" vogaung: khyo yao: bam yao: re dam: dai" genae" ngad: ako". Yao: wa ai: vogaung: mae ai: ayo, mae Khinjaung Yin" kad' ra" yaug shid sho' yena: jo, nae" ngad: ra".

²⁶Ai: byu se' qobo qo" yaug wa yao: phao: loe; na: jo; ra" vogaung: mae" thug' lo" mung:-

²⁷Ai: shid yaug: nho: amyu" ba nam pho" yang qho: myao yang: yao: re se' pye' yang: ngad: re ce: lage, phaug' ra" lo, mau" wa byu se' ru mangad: ngad: ra".

²⁸Byu se' ra" qobo qo" yaug wa Khinjaung Yin" shid sho' ai: phao: khug: na: ra" vogaung: mae na: jo, ca" ra". Ngadqere: khinjaung yin" shid thao re wa yao: wa yham khyo gai: tug' lo: ra".

²⁹Ce: tarha" jham wa naonhaung" we' naonhaung" myid:zo: qe khai: mae na na dakhyo: za: ngad: li" nae".

³⁰Byu se' qobo zhaug' qhug' ra" yaug qobo qo" rure myao lao" sagse: shid' yaug we' aitho' myo" ra" mo; nho: sagse: dao: mae ngha yang: za: gai: se' ra". Sagse: dayaug: nho: sagse kham dao: za: wa byu se' qobo zhaug' ra" mau" re bao" thaug' nae" majab byang" ngad: ra".

³¹Byu se' yaug re wa se' pye' ca" ra". Yao: wa ce: qobo dae mae" ngaui byid: yang: magai: loe, ngad: ra".

³²Byu dayaug phao: khug: na: ra" vogaung: khyo phao: ye: yang: ngad: re Khinjaung Yin" mashid shire yham khyo dam: tug' lo nae" qhid' mae" ngaui byid: nae" akhang" majo, ngad: ra".

³³Naonhaung" ceru: kad' ko" re wa naonhaung" na: jo; ra" mung"dan: re maca' majhad' kad' pye' ru ngad: ako". Byuse' ru wa mung"dan: re masan masin" boe" nhao: ra". Byuse' yaug shid: ra" khyo" za: mangad: re byu se' ra" jo, qo mug: myid qhid' mae" caung:pa" thung" khyo" kyang" san: pye' ru kad' nae" khyo gatau majo, ngad: ra".

³⁴Naonhaung" na: jo; ra" mug: myid re masan masin" dakad' ge,- pe"mung:ga"re ngo wa ASANG ngad mung: Israel byu qe: phaung gaung: mae na: jo, yang: ngad: ra" ein: ta" wa,- ga: ta" ra".