Read Maru GYAUNG: SU: 36 Bible Online

GYAUNG: SU: 36 - Maru bible

GYAUNG: SU: 36

¹Gilead kaung mae" yham khaung vin mo, ngad ko" ra" Makhira nho: yauggai zo: we' Yoseb nho: yauggai zo: Manashe nho: yao: myid: wa Moshe we' au: jhaung gaje qejhao" ye: mung:-

²Yao: shid' yaug wa- ASANG wa ai: mung"dan: re pha" ce' khyo" yang: Israel byu qere kho' byid: nae" qhid' mae" nao re amyin" byid' to" ra" yao: wa ngonhaung" amyu" Zelophehad nho: jo,nho" re yao" myiqe: zo: qere byid: nae" qhid' mae" re: nao re amyin" byid' to" ra".

³Ngadqere: yao: bam wa gatau: amyu" kaung mae" yauggai qe we' lo, xo' xo' geyang: ngad: re- yao: bam: jo,nho" wa ai: amyu" voman: wa nang" byaug: li" nae" ngad: rure beim: wa,-

⁴Dam: tug' byid' ra" zin mae aung" pye' va" ra" jo,nho" alhab' re azhao sang: ra" yaug re dam: tug' byid: lao" Zelophehad nho: myiqe: zo: qe: jo,nho" wa yao: bam lo, xo' xo' yu: ra" mo; amyu" kaung khyo khonhae" re: laung: byid: mung: ngonhaung" amyu" kaung khyo wa seim" byaug: li" nae"- ga: ta" ako".

⁵Airumung: Moshe wa ASANG: yang byid' ra" o mae" amyin" dao: jham Israel byu qere byid' ra". Yao: wa Manashe amyu" kaung mae" mo, ta" ra" dao: wa jo: ra".

⁶Amung: Zelophehad nho: myiqe: zo: qe wa yao: bam nug: ra" yaug we' lo, xo' gai: xo' yu: ra". Ngadqere: yao: bam yao" amyu" kaung qemae" za: ngad ca" ra".

⁷Israel amyu" yaug khao: ngo" nho: jo,nho" wa yao: yao" amyu" kaung mae jo; jo, ca" ra".

⁸Ma re qo" sang: yu: ra" Israel myiqe: yaug khao: ngo" wa yao: yao" amyu" kaung mae" yauggai qere lo, xo' xo' yu ca" ra". Ceru: Israel byu yaug khao: ngo" wa yao: yao" phug' pho" qenho: jo,nho" ma re qo" khae: yu: li" genae".

⁹Amung: ai: jo,nho" wa amyu" kaung dalam: mae" gatau dalam: khyo lo, kai" magai: kai" byid: nae" ngad: ra". Amyu" kaung khao: ngo" wa yao: bam yao" jo,nho" re xo' yang: sang: jo; li" genae" ga: ASANG ta" ra"- ga: ta" ra".

¹⁰Arumung: Zelophehad nho: myiqe: zo: qe ngad ko" ra" Mala- Tiza- Hogla- Milkha- Noa bam wa ASANG: yang Moshe re amyin" byid' to" ru we' dakhyo: kad' ako". Yao: bam wa yao bam: yham o yham tho' mao:nhaung: qe we' lo, xo' xo' yu: ako".

¹²Yao: bam wa yao: bam yao" amyu" kaung ngad: ra" Yoseb nho: yauggai zo: Manashe kaung khug mae" mo, we' lo, xo' xo' ako". Yao: bam: jo,nho" wa yao: bam: yao: pho" amyu" kaung mae dang: jo; ra".

¹³Ce: tarha" we' thung" li jham wa Yerikho mae" Yodan gyaung: gau" de; ra" Moba jao: gyu" mae Moshe khyo" yang Israel byu qere ASANG: yang byid' ra" tarha" thung" li jham ngad: ra".