Read Maru GYAUNG: SU: 4 Bible Online

GYAUNG: SU: 4 - Maru bible

GYAUNG: SU: 4

¹ASANG wa Moshe re-

²Levi amyu" Kohad kaung re amyu" kaung ngai we' yham khaung jham kho' yang: byu japhin: gaug: yu mung:-

³ASANG: qhid' kheim: Zaung mae mau" zaui: nae" dau ga" ra" apyad sam xe zin we' ngo" xe zin agyo: mae" yauggai alhab' mo, re mang gaug: yu wa,-

⁴Yao: bam caung da" byid' ra" mau" mae gyang" lho" thao" ra" mau" jham bobo: ra"- ga: ta" ra".

⁵ASANG wa Moshe re o mae" pyang dao: jham re byid' ra". Zaung re phyo' yo, joe" lao" Arun we' yao" yauggai zo: qe wa jamu khug khyo vao ye: mung: Dao: Thang" Ban" qhid' au: mae" akyo pin: lung re yu: khyo" yu yang: ai: yang ban" re nghoe' nae" ngad: ako".

⁶Yao: bam wa ai: dao mae shoqid gyang" yang nghoe' mung: adao mae nyhug: ra" pin: phyid: nghoe' yang: ai:thao re dao nae" gyang: yao: re jhoe" zaui nae" ngad: ra".

⁷Yao: bam wa ASANG re qhaug' byid' to" ra" mug saboe" dao mae pin: nyhug: phyid: myhung: mung: ai: dao mae ban jham we' sheim nae pyo: ja: ke' to" ra" khug' jham- xeim: ngaui" khug' jham we' sabyi qang: ngaui" xeim: qhid' mae" yae: nau" jham re kai" to: nae" ngad: ako". Ai: saboe" dao mae mug khonhae" re: to" to: nae" ngad: ra".

⁸Yao: bam wa cegu: alhab' dao mae pin: ne: yang phyid: nghoe' mung: ai: dao mae shoqid gyang" yang nghoe' yang:- ai:thao dao nae" gyang: yao: re jhoe" zaui nae" ngad: ako".

⁹Yao: bam wa pin: nyhug re yu: yu mung: myikaug' tao"- myikaug'- nye, zai"- ban the" jham we' zhanlun xau ke' ra" khug' jham alhab' dao mae nghoe' nae" ngad: ako".

¹⁰Yao: bam wa aire dang: mung: ai: zai jham alhab' re shoqid gyang" yang thab' mung: dao nae" azung mae ke' genae" ngad: ako".

¹¹Ai: thao yao: bam wa qhang phan dao mae pin: nyhug phyid: nghoe' mung:- ai: dao mae shoqid gyang" yang nghoe' yang: dao nae" gyang: yao: re jhoe" zaui nae" ngad: ako".

¹²Yao: bam wa Gyang" Lho" Jo, qo mae ci: ra" kang: tam" khug' lao: alhab' re yu mung: pin: nyhug pin: khug mae kag' yang: shoqid gyang" thab' mung:- aijham re dao nae" azung dao mae ke' genae" ngad: ra".

¹³Yao: bam wa phan mae" nyhad nyhad mung: ra" myiqe, jham re yu: pye' mung:- ai: dao mae pin: ne: yang phyid: nghoe' genae" ngad: ako".

¹⁴Yao: bam wa phan tau caung da" byid' rumae ci: ra" zai jham ngad: ra" myi: ug'- langhoe:- ce' bao" jham- jarung: jham alhab' re ai: dao mae ke' genae" ngad: ako". Ai: thao yao: bam wa ai: dao mae shoqid gyang" yang nghoe' mung: dao nae" gyang: yao: re jhoe" zaui genae" ngad: ako".

¹⁵Zaung phyo' yo, joe" lao"- Arun we' yao" yauggai zo: qe aijham re we' yao: bam: zai kug jham alhab' re bin: nghoe' pye' gelao" Kohad amyu" kaung wa li" mung: ai: gyang" lho" zai jham re vo, genae" ngad: ako". Kohad amyu" kaung mae" mo, wa ai: gyang" lho" zai jham re magai: tin: ngad: ako". Mangad: re- yao: bam shid: li" genae". Cejham wa ai: Zaung qhui: khao: ngo" kohad amyu" kaung qenho: vin vo; nae" qo jham ngad: ra"- ga: ta" ra".

¹⁶Khinjaung Arun nho: yauggai zo: Eleaza wa Zaung geim" qhid' mae" vin vo; zaui: so: nae" qo qo" yaug ngad: ra". Aijham wa xau myikaug' jham- nae pyo: nam- gaug zo xeim: jham- gyad ja: xau we' Zaung mae ASANG re qhaug' byid' to" ra" gatau ja: khao: ngo" qhid' mae" vin vo; nae" qo qo" yaug ngad: li" nae".

¹⁷ASANG wa Moshe we' Arun re- Kohad amyu" kaung mae" mo, re ai: gyang" lho" thao" ra" zai jham khyo te' ye" ra" khyo" yang se' pye' ru daqhug' nhao wa,- ceru: boe" rumae" go kad' byid: nae" qhid' mae" Arun we' yao" yauggai zo: qe wa ai: Zaung khug khyo vao ye: mung: yaug khao: ngo" re yao: yao" mau" re jaung byid: yang: pe" ru: vin vo; nae" khyo yao: re ta" kyo: genae"- ngad: ako".

²⁰Ngadqere: Kohad amyu" kaung qe Zaung khug khyo vao ye: gemung:- khinjaung qe ai: gyang" lho" zai jham re qhui: nae" nyhang" jaung: na: rure yemyao geyang: ngad: re- yao: bam shid: li" genae"- ga: ta" ra".

²¹ASANG wa Moshe re-

²²Levi amyu" Gershon kaung mae" mo, re amyu" kaung ngai we' yham khaung jham kho' yang:- byu japhin: gaug: yu mung:-

²³ASANG: qhid' kheim: Zaung mae mau" vin vo; nae" dau ga" ko" ra" apyad sam xe we' ngo" xe agyo: mae" yauggai alhab' re mang gaug: yu nae" ta" ra".

²⁴Yao: bam wa o mae" zai jham re dao nae" qo qo" mo, ngad: li" genae".

²⁵Aijham wa Zaung ai: zai jham- ainho: akhug shad' mae" anghoe' taung gaung shad' mae" anghoe'- ai: adao mae" shoqid gyang" anghoe' kham: dung: mae" akyo pin: lung:-

²⁶Akyo pin: lung: jham- jamu we' phan lhang" gam: yang: qae: to" ra" vang" qae: ra" pin: lung: taui: jham- ce: zai jham re zhaug' to' rumae ci: ra" zhaug' ra" mau" alhab' re qo yu: ra" mau" jham ngad: ra". Yao: bam wa cejham: qhid' mae" qo ca" ra" mau" alhab' re zaui: so: vin vo; genae" ngad: ako".

²⁷Moshe we' Arun tao wa Gershon amyu" kaung mae" mo, vin vo; ko" ra" qo alhab' re we' Arun we' yao" yauggai zo: qeyang yao: bam re jaung byid' ra" mau" ja: khao: ngo" re qu" nae" ngad: ako".

²⁸Cejham wa Zaung mae Gershon amyu" kaung mae" mo, zaui: so: vin vo; nae" qo jham ngad: ra". Yao: bam wa khinjaung Arun nho: yauggai zo: Ithama yang ceim" shid' ra" qao: mae na yang: ai: mau" jham re vin vo; nae" ngad: ako".

²⁹ASANG wa Moshe re Levi amyu" Merari kaung mae" mo, re amyu" kaung ngai we' yham khaung jham kho' yang: byu japhin: gaug: yu mung:-

³⁰ASANG: qhid' kheim: Zaung mae mau" vin vo; nae" dau ga" ko" ra" apyad sam xe zin we' ngo" xe zin: agyo: mae" yauggai qe alhab' re mang gaug: yu nae" ta" ra".

³¹Yao: bam wa sag' pye: jham- akyao" jham zang jham- Zaung: nho: apan jham-

³²Amung: zang jham- zang pan jham- daung" zang jham- Zaung re qae: ra" vang" lhang" gam: taui: jham- aijham re zhaug' to: nae" rumae ci: ra" zai alhab' qhid' mae" qo qo" mo, ngad genae" ngad: ra". Yaug khao: ngo" wa yao: yao: vo; ra" zai jham: qhid' mae" qo qo" li" genae".

³³Cejham wa Zaung mae yao: bam: caung da" mau" zaui" rumae zaui: so: vin vo; nae" Merari amyu" kaung qenho: qo jham ngad: ra". Yao: bam wa khinjaung Arun nho: yauggai zo: Ithama yang ceim" shid' ra" qao: mae na yang: ai: mau" jham re vin vo; nae" ngad: ra".

³⁴ASANG: amyin" dao: re cao" mung: Moshe- Arun we' mo, byu phung: mae" au: jhaung qe wa Levi amyu" kaung ngad ko" ra" Kohad- Gershon- Merari sam kaung mae" Levi amyu" wa ceru re o mae tung" to" ru we' dakhyo: amyu" kaung ngai yham khaung jham khyo" kho' mung:- ASANG: qhid' kheim: Zaung mae mau" zaui: nae" dau ga" ko" ra" apyad sam xe zin we' ngo" xe zin: agyo: mae" yauggai alhab' re mang gaug: yu: ako". [Amyu" kaung] — [Aso:] Kohad — 2,750 Gershon — 2,630 Merari — 3200 Alhab' — 8580

⁴⁹Yaug khao: ngo" wa ASANG: yang: Moshe re amyin" byid' to" ru we' dakhyo: mang gaug: yu qhug' ako". Amung: Moshe khyo" ASANG byid' to" ra" amyin" mae- yaug khao: ngo" wa zaui: so: nae" mangad: lao" vin vo; nae" qo jaung byid' ru qhug' ako".