Read Maru GYAUNG: SU: 6 Bible Online

GYAUNG: SU: 6 - Maru bible

GYAUNG: SU: 6

¹ASANG wa Moshe re-

²O mae ta" to" ra" pyang dao: jham Israel byu qere byid: nae" qhid' mae" amyin" byid' ra". Yauggai- mangad: lao" myiqe: dayaug yaug Naziri boe" nae" qhid' mae" gakai: lai jham tang" to: yang: ASANG re yao: yao" gaung qhaug' byid' to: yaug khag' ngadqere:- sabyi qang we' yhid phai: re jao" pye' nae" ngad: ako".

³Yao: wa sabyi shi" yang kad' to" ra" pe" ja" shaug' ja: rere: magai: shaug'- pe" ja" sabyi shi: rere: magai: zo:- sabyi shi: kyaug' re: magai: zo: nae" ngad: ra".

⁴Yao: Naziri angad: jo, jo, wa sabyi naui mae" pe" ja: rere: magai: zo: nae" ngad: ra". sabyi shi: jid' we' akaug' jham re lhao" magai: zo: nae" ngad: ra".

⁵Yao: Naziri kad' nae" jham tang" to" ra" qao: mae ana: jo, jo, wa yao" xae re magai: ko' pye'- qaug re: magai: qaug: pye' nae" ngad: ra". Yao: wa yao" gaung ASANG re qhaug' byid' ra" ayo, byang" sho' qhid' mae" jham tang" ruyang taui" to: qhug' ra". Amung: yao: wa yao" xae re yaug: jo, nhao nae" ngad: ra".

⁶Yao" xae wa ASANG re yao" gaung qhaug' byid' ru nho: aso: ngad: ra". Airumung: yao: wa sushid mao nhae khyo te' ye" ra" khyo" yao: yao" gaung re masan masin" magai: boe" nhao ngad: ra"- yao" yao: pho"- yao: myhi"- yao" nhaung:- yao" nhae: mo" qe: shid mao: yang lhao" re: masan masin" magai: boe" nhao ngad: ra".

⁸Yao: Naziri angad: jo, jo, wa- yao: wa ASANG re qhaug' byid' to: qhug' yaug ngad: ra".

⁹Yao: we' te' te' yao: mae byu dayaug yaug nyag din taung" shid yang: Naziri kad' yang: qhaug' byid' to" ra" xae re masan masin" boe" nhao yang: ngad: re- yao: wa nhad' ba lao" na mung: ai: dao re yao" xae nhad' maui: re qaug: pye' nae" ngad: ra". Airulao" yao: wa caung:pa" thung" khyo" san sin" yaug boe" lo: li" nae".

¹⁰She' ba ein: ba re yao: wa phaung" kyug' shid' dau:- mangad: lao"- jid: au shid' dau: re ASANG: qhid' kheim: Zaung kham: dung: mae khinjaung pho" jhao" ciye: nae" ngad: ra".

¹¹Khinjaung pho" wa dadau: re qobo khyad' ngaui" xeim: khyo" gatau dadau: re wa phad' ngaui" byid' ra" ngaui" xeim: khyo" ngaui" byid: mung: yao: sushid mao we' xo' taui: yang masan masin" boe" ru qhid' mae" caung:pa" thung" khyo" kyang" san: pye' rure kad' nae" ngad: ra". Ai: ba mae yao: byu aiyaug wa yao" xae re dam: qhaug' byid: mung:-

¹²Naziri dayaug khyo"- yao" ayo, ASANG re dam: qhaug' byid: nae" ngad: ra". Qhaug' byid' to" ra" yao" xae wa masan masin" boe" pye' va" ruyang lai: lo" ra" yo, khyin: re magai: sun: ngad: ra". Yao: wa dam: khyug' byid' ra" ngaui" xeim: khyo" dazin byang" ra" yao nau" dadau: ciye: nae" ngad: ra".

¹³Naziri kad' yaug wa yao: jham tang" rure bin: zaui" pyang" lao"- yao: wa caung:pa" thung" we' sin" rure kad' nae" ngad: ra". Yao: wa Zaung kham: dung: khyo ye: mung:-

¹⁴Pe" re: qo mabo: ra" gug'nyhug' sam dau: ASANG re qhaug' byid: nae" ngad: ra". Aijham wa phad' ngaui" byid' ra" ngaui" xeim: qhid' mae" dazin byang" ra" yao lo: nau" dadau:- qobo khyad' ngaui" xeim: qhid' mae" dazin byang" ra" yao mo" nau" dadau:- zam" khug: ra" ngaui" xeim: qhid' mae" yao lo: dadau: ngad: ako".

¹⁵Yao: wa man" make' ra" mug dagyan rere: qhaug' byid: nae" ngad: ra". Aijham wa cin man" phaui: we' zhanlun xau lhag' yang: kad' to" ra" mug pye:- zhanlun xau: yang deim" boe; to" ra" mug po: we' gaug zo ngaui" xeim: we' sabyi qang: ngaui" xeim: jham ngad: ako".

¹⁶Khinjaung pho" wa aigu: alhab' ASANG re qhaug' byid: mung:- qobo khyad' ngaui" xeim: we' phad' ngaui" byid' ra" ngaui" xeim: rere: qhaug' byid: nae" ngad: ra".

¹⁷Yao: wa zam" khug: ra" ngaui" xeim: khyo" ASANG re yao lo: xeim: ngaui" byid: mung:- aire mug gyan we' daga" qhaug' byid' ra". Yao: wa gaug zo ngaui" xeim: we' sabyi qang: ngaui" xeim: rere: qhaug' byid' ra".

¹⁸Naziri kad' yaug wa jamu kham: dung: mae yao" xae re qaug: pye' mung:- ai: xae re zam" khug: ra" ngaui" xeim: nga" na: ra" myi: mae ke' pye' nae" ngad: ra".

¹⁹Ai: thao- yao lo: lo, sin re bin: jho' lao" khinjaung pho" wa aire yu yang:- gyan khug mae" mug pye: thau dapye: we' mug po: dakhye' re yu: yu mung: ai we' daga" Naziri kad' yang: lo, mae ke' byid: nae" ngad: ra".

²⁰Ai: thao- khinjaung pho" wa ASANG re qhaug' byid' ra" gakai: lai jhaung qhu" khyo" aijham re qhaug' byid: nae" ngad: ra". Qao sho: we' yao lo: paung sin wa tarha" we' dakhyo: khinjaung qe: qhid' mae" ngad: ra". Aijham wa khinjaung qe: qhid' mae" gyang" lho" ra" ngaui" xeim: ngad: ra". Ai: thao re- Naziri kad' yaug wa sabyi qang: gai: shaug' ra".

²¹Cejham wa Naziri qe: qhid' mae" thung" tarha" jham ngad: ra". Ngadqere: Naziri dayaug yao" jham tang" rumae yao: byid: ca" ra" ngaui" xeim: mae" je yang: dao:so: byid' to: yang: ngad: re yao: dao:so: byid' to" rure tab byang" sho' kad' ca" ra"- ga: ta" ra".

²²ASANG wa Moshe re-

²³Arun we' yao" yauggai zo: qere Israel byu qere shaman" byid' rumae o mae ta" to" ra" dao: jham re ci genae" rure ta" nae" qhid' mae" amyin" byid' ra".

²⁴ASANG wa naonhaung" re shaman" byid: mung:- naonhaung" re lhaug' zaung" gun caung byid: vashao:-

²⁵ASANG wa nhag' khyag' mung: naonhaung" re nhag' myan" ra" jeju byid: vashao:-

²⁶ASANG wa naonhaung" re qu" mung:- naonhaung" re ngaui pyo: yaug yo: ru byid: vashao:- ein: ta" genae" ngad: ra".

²⁷Yao: bam nga" mang re Israel byu qe: dao mae shaman" jeju khyo" ta" thug' yang: ngad: re- ngo wa yao: bam re shaman" byid: nae"- ga: ASANG ta" ra".