Read Maru GYAUNG: SU: 7 Bible Online

GYAUNG: SU: 7 - Maru bible

GYAUNG: SU: 7

¹Moshe ASANG: qhid' kheim: Zaung re bin: tau: zhaug' to' ra" ba na mae yao: wa Zaung re we' ai: nho: zai jham alhab'- phan re we' ai: zai jham alhab' re xau gyad mung: ASANG re qhaug' byid' ra".

²Ai: thao Israel amyu" mae au: jhaung qe ngad gemung:- byu japhin: mae au: jhaung qe ngad ko" ra" amyu" kaung au: jhaung qe wa-

³Yao: bam: ngaui" xeim: jham re ASANG jhao" cili" ako". Aijham wa lhin" khyaug' lam: we' nung: jaung lo: daxe: shid' dau: ngad mung: au: jhaung shid' yaug: qhid' mae" lhin" dalam: lam:- au: jhaung dayaug: qhid' mae" nung: jaung lo: dadau: dau: ngad: ra". Yao: bam aijham re bin: qhaug' byid: gethao re-

⁴ASANG wa Moshe re-

⁵Ai: Zaung kad' pin" rumae ci nae" qhid' mae" ai: jhaung qhu" jham re khae: yu wa,-Aimung: yao: bam zaui: so: ca" ko" mau" zo" re cao" yang: Levi amyu" qere gae byid: wa,- ga: ta" ra".

⁶Airumung: Moshe wa Lhin" jham we' nung: jaung lo: jham Levi amyu" qere byid' ra".

⁷Yao: wa lhin" shid' lam: we' nung: jaung lo: byid dau: re Gershon kaung qere byid: mung:-

⁸Lhin" byid lam: we' nung: jaung lo: she' dau: re Merari kaung qere byid' ra". Yao: bam: mau" zo" alhab' re Arun nho: yauggai zo: Ithama ceim" shid' rure cao" yang: zaui" pin" ako".

⁹Ngadqere: Moshe wa Kohad kaung qere wa lhin" jham re: nung: jaung lo: jham rere: mabyid' ngad: ra". Pe"mung:ga"re yao: bam gun caung qu" gam: ra" gyang" lho" ra" zai jham re yao: bam: lo, sin mae vo, ca" geyang: ngad: ra".

¹⁰Au: jhaung qe wa phan qhaug' byid' ra" akhyo: kad' nae" qhid' mae" ngaui" xeim: jham rere: ciye" ako". Yao: bam: jhaung qhu" jham re phan mae qhaug' byid: nae" yao: bam jin" gelao".

¹¹ASANG wa Moshe re- phan qhaug' byid' ru qhid' mae" daxe: shid' ba: gu: mae ba khao: ngo" au: jhaung qemae" daba mae dayaug yaug yao: yao" jhaung qhu" re qhaug' byid: genae" qhid' mae" yao: bam re ta" kyo: wa,- ga: ta" ra".

¹²Yao: bam wa yao: bam: ngaui" xeim: jham re o mae we' dakhyo: qhaug' byid' ako". [Ba Na] — [Amyu"] — [Au: Jhaung] 1ba — Yuda — Amminadab yauggai zo: Nashon 2ba — Isakha — Zua nho: yauggai zo: Nethane 3ba — Zebulun — Helon nho: yauggai zo: Eliab 4ba — Rubin — Shedura nho: yauggai zo: Elizu 5ba — Simon — Zurishadai nho: yauggai zo: Shelumie 6ba — Gad — Due nho: yauggai zo: Eliasab 7ba — Ephrim — Amihu nho: yauggai zo: Elishama 8ba — Manashe — Pedazu nho: yauggai zo: Gamale 9ba — Benyamin — Gedeoni nho: yauggai zo: Abidan 10ba — Dan — Amishadai nho: yauggai zo: Ahieze 11ba — Ashe — Okhran nho: yauggai zo: Pagie 12ba — Nabhtali — Enan nho: yauggai zo: Ahira Yao: bam yaug khao: ngo" ciye: ko" ra" xeim: jham wa- tarha" vao: ra" azhao" re cao" yang lag: re- aung:zha' ngo" xe la" ra" ngaui khug' dakhug'- aung:zha' sam xe la" ra" ngaui jarung: dalam:- shid' lam" geim" mae gaug zo ngaui" xeim: qhid' mae" xau we' lhag' (...)

⁸⁴Phan qhaug' byid' ru qhid' mae" au: jhaung daxe: shid' yaug: yang ciye: ko" ra" ngaui" xeim: jham alhab' wa o mae tung" to" ru we' dakhyo: ngad: ra". -Shid' lam" geim" alhab' mae Paung: 60 la" ra" ngaui khug' daxe: shid' lam: we' ngaui jarung: daxe: shid' lam:- -Nae pyo: ja: byang" sho' bo mung:- aung:zha' 40 la" ra" qhang ban daxe: shid' ban- phad' ngaui" byid' ra" ngaui" xeim: qhid' mae" nung: jaung lo: daxe: shid' dau:- yao lo: daxe: shid' dau:- dazin byang" ra" yao nau" daxe: shid' dau: we' ai we' bongaui" byid' ra" gaug zo ngaui" xeim: jham- -Qobo khyad' ngaui" xeim: qhid' mae" cad' be, daxe: shid' dau:- -zam" khug: ra" ngaui" xeim: qhid' mae" nung: jaung lo: shid' xe: byid dau:- yao lo: khyaug' xe dau:- cad' be, khyaug' xe dau:- dazin byang" ra" yao nau" khyaug' xe dau: ngad: ra".

⁸⁹Moshe ASANG we' jho" jhau nae" qhid' mae" Zaung khug khyo vao ye" ra" au:- Dao: Thang" Ban" apyid' adao kherubin shid' dau" agyo: mae" ASANG: yang dao: jhau: ra" thoe re Moshe the' gyo" ra".