Read Maru GYAUNG: SU: 9 Bible Online

GYAUNG: SU: 9 - Maru bible

GYAUNG: SU: 9

¹ASANG wa Israel byu qe Egutu mung" mae" bin: thug' lo" gethao shid' zin ein: zin lho" sao qhid' khye' re Sina Din" pyad' yo mae Moshe re dao: jhau: ra". ASANG wa-

²Ai: poe re ce: lho" khye' daxe: byid ba ein: ba- ba vao yo, mae Israel byu qe wa Lai co' poe re- ai: poe qhid' mae" byid' to" ra" thung" li alhab' re cao" yang: kad' genae" ngad: ra"- ga: ta" ra".

⁴Aimung: Moshe wa amyu" byu qere ai:Lai co' poe kad' genae" qhid' mae" ta" mung:-

⁵Yao: bam wa lho" sao qhid' khye' daxe: byid ba: ba myi" thao re Sina Din" pyad' yo mae airu: kad' ako". Amyu" byu qe wa ASANG: yang Moshe re byid' to" ra" amyin" cao jab re kad' ako".

⁶Ngadqere: byu damyo" wa sushid mao re tin: geyang: caung:pa" thung" khyo" masan masin" boe" mo, bo: ako". Aimung: yao: bam wa ai: ba na mae Lai co' poe re maqo" bokad' ngad: ako". Yao: bam wa Moshe we' Arun tao jhao" ye: mung:-

⁷Ngonhaung" wa sushid mao re tin: yang: masan masin" boe" mo, ngad: bam va". Ngadqere: ngonhaung" wa dang: ra" Israel byu qe we' daga" ASANG re xeim: ngaui" byid' ra" mau" mae" pe"mung: phoe' pye' ru qhug' bam nae" ngad: i? ga: ta" ako".

⁸Ailao" Moshe wa ngo ASANG mae" pyang dao: qo" khae: yu: ra" yo, joe" sho' lao" ge,- ga: phaug' tau" ra".

⁹ASANG wa Moshe re-

¹⁰Naonhaung" mae" dayaug- mangad: lao" -naonhaung"' nho: myid:zo: qe wa sushid mao re tin: yang:- mangad: lao"- va: khyo gyaung: su" na mung: masan masin" boe" ngadqere: Lai co' poe re kad' nug gelao"-

¹¹Naonhaung" wa ai: poe re ai: atha" lho" dakhye' lai thao- lho" shid' khye' ein: khye' daxe: byid ba: ba myi" thao mae kad' nae" akhang" qo" ako". Ai: poe re man" make' mug we' ao: pho' kho: jham we' kad' ge,-

¹²Zo: ve pe" ja: rere: thao: ba ne, seim joe" sho' datang" to: ge,- pe" gug'nyhug' shoqug: rere: dakhyug' ge,- ai: Lai co' poe re thung" li alhab' re cao" yang: kad' ge,-

¹³Ngadqere: caung:pa" thung" khyo" san sin" yaug ngad ru we'- gyaung: re masu" ra" yaug- Lai co' poe mabo kad' yaug khag' re ngadqere: nga" byumyu" dayaug khyo" myid: jho: yu: ru qhug' nae" mangad:- pe"mung:ga"re yao: wa jaung: to" ra" ayo, mae ngore ngaui" xeim: maqhaug' byid: yang: ngad: ra". Yao: wa yao" qobo aphug' re kham zo: ca" ra".

¹⁴Amung: naonhaung" phaung mae na: ra" taung bug byu dayaug wa ai: Lai co' poe re kad' nug yang: ngad: re- yao: wa thung" li jham alhab' re cao" yang: kad' ca" ra". Yao: yao" amyu" ngad ngad- taung bug byu ngad ngad yaug khao: ngo" tarha" daja: za: ci nae" ngad: ra"- ein: Isreal byu qere ta" nae" qhid' mae" ta" ra".

¹⁵ASANG: qhid' kheim: Zaung re tau: zhaug' ra" ba na mae jham thaui: lo mung: aire longhoe' pye' ra". Myi" re ai: jham thaui: wa myi: ru" ru ngad: ra".

¹⁷Ai: jham thaui: mug: tho' khyo do, lo" lao" jamu jham phyo' mung: ai: jham thaui: gyo" lo: ra" jo, qo mae yao: bam wa thang: na: ra" jamu re dam: kad' ako".

¹⁸Amyu" byu qe wa ASANG: yang amyin" byid' ra" jo, qo mae thang: na ra" Zaung re phyo' mung:- ASANG: yang amyin" byid' ra" jo, qo mae thang: na ra" jamu re yao: bam dam: kad' ako". Ai: Zaung adao mae jham thaui: thang: jo; ra" myhao" ai: jamu mae za: yao: bam thang: na: ako".

¹⁹Jham thaui: ai: Zaung dao mae ayo, myao" sho' thang: na lao" yao: bam wa ASANG: nho dao: re tae" gyo: mung: yao: bam mato" gengad: ako".

²⁰Dalhang lhang ai: jham thaui: wa Zaung adao mae ba na dajhid' za: thang: jo; ra". Yao: bam wa pe" ru: ngad ngad ASANG: amyin" dao: re cao" yang: thang: na: ra" Zaung mae thang: na- mangad: lao" to" lo" ako".

²¹Dalhang lhang ai: jham thaui: wa myi" mae" ne, kao joe" sho' za: thang: jo; ra". Yao: bam wa ai: jham thaui: do, lo" we' to" lo" ako". Jham thaui: do, lo" khao: ngo" yao: bam to" ye" lo" ako".

²²Shid' ba ngad ngad- lho" dakhye' ngad ngad- ai: tho' je yang: ngad ngad Zaung dao mae jham thaui: thang: jo; ra" myhao" yao: bam mato" ye: ngad: ako". Ngadqere: airu: do, lo" lao" yao: bam to" ye" lo" ako".

²³Moshe khyo" ASANG byid' ra" amyin" jham re phug' cao" yang: yao: bam wa thang: na: ra" jamu re kad' mung:- aire phyo' ako".