Read Maru MIKHA 1 Bible Online

MIKHA 1 - Maru bible

MIKHA 1

¹Yotham- Ahaza we' Hezekia bam Yuda kho:kham boe" na ko" ayo, gyo: mae ASANG wa Moreshed vogaung: mae" Mikha re ce: mungdao: byid' ra". ASANG wa Mikha re Samari we' Yerusalem khyo we' sin: yang: cegu: alhab' re qhu" byid' ra".

²Byumyu" alhab' naonhaung" we"- ceru re gyo" yu ge,- myid gaung: dao mae na mo, alhab' mo, we"- ceru re tae" gyo: ge,. Qam: so' qi" thao" ra" ASANG wa naonhaung" re qobo zhaug' yang: the: li" nae". Tae" gyo: ge,- Yao: wa yao" nho: mug: khaung Caung:pa" Yham mae" jhau: ke' ra".

³ASANG wa yao" nho: gyang" lho" jo, qo mae" li" na: ra" yao: gyo" li" mung: bam au: jham mae li" su" qin" nae".

⁴Ailao" bam jham wa myi: zao" ra" byoshaung: we' dakhyo: yao" khyid qao: mae yug: lo" genae". Aijham wa bug gaung dao mae qid vhe' sheim" ke' ru we' dakhyo: jao: gyu" lao: khaung: mae yug: gyo" lo" li" genae".

⁵Cegu alhab' wa Israel byumyu" qe qobo shad' ko" ru we' Mao"So re tau: lhan" ko" ra" mathao mae boe" li" nae" ru ngad: ra". Israel bam tau: lhan" ru wa khag' re qobo zhaug' nae" i? Samari vomo" re yao: qobo zhaug' nae" i? Yuda mae" sulho no' ru wa khag' mae qobo de; ra" i? Yerusalem yao: ngad: ra" lhe"-

⁶Aimung: yang ASANG wa- Samari re seyo: mug: mae byo; qeim: bam: jo, ra" jo, qo sabyi naui qho: jo, qo boe" nhao nae". Ai: vogaung: mo" nho: zho: gam: gyui jham re lao: khaung: khug khyo vhe' khyo" pye' mung: ai: vogaung" nho: apan aqao: wa acin jo, jo; li" nae".

⁷Yao" nho: phug' de; ra" sulho alhab' re aje, aman" khyoe' sin" pye' nae" caung:pa" yham mae" shava myhi" qere byid' to" ru alhab' re myi" yang ngha" jheim" pye' mung:- ai: nho: sulho alhab' wa gyoe; bam: jo,li" genae". Samari wa- cejham re shava myhi" kad' mung: the' yu: to" ako". Ana" kam" wa yao" gyevo qe: yang ai jham re gajo, qo mae" caung:pa" yham shava myhi" qe: qhid' mae" tai: lo" li" genae"- ga: ta" ra".

⁸Ailao" Mikha wa- ce: ra" mathao mae ngo wa kaug' mung: ngug nae" nga" kaug' qhui: rure qhu" byid' ra" khyo" ngo wa khyid cin we' gaung pyad' su" qin" nae" ngo wa zag ne we' dakhyo: myang mung: qo, gola:u we' dakhyo: myang nae".

⁹Samari nho: dae jad: wa maqo" gai mung: Yuda re: ai re we' dakhyo: no dae kham zo: nae". Byo; qeim: ru wa nga" byumyu" qe na: ra" Yerusalem yao: mae" vogaung: kham: mo" joe" jo, va".

¹⁰Ngonhaung" gye seim" ra" khyo re Gat vogaung: mae na: ra" ngonhaung" nho: gyevo qere data" kyo: ge, naonhaung" ngug: na: rure yao: bam re damyao nhao ge,. Bed Leaphra mae" vogaung" byu qe we"- naonhaung" kaug' qhui: rure phalhug bam mae lang" lhe' lhau mung: qhu" byid ge,.

¹¹Shaphi mae" vobyu qe we" aqho' aqhid gaung: cin shopyad' byaung" thug' lo" ge,. Zanan mae na: ra" mo, wa yao: bam: vogaung: mae" mavae" thug' ngad: ako". Betheze mae" mo, kaug' ngug: rure naonhaung" the' gyo: gelao" ai: mae gye khug jo, qo majo; rure naonhaung" ba: li" genae".

¹²Marod mae" vogaung" byu qe wa na myan yaug yo nae" rure sang: kho: sang lhe' taung" myid: lao" na: ako". Pe"mung:ga"re ASANG wa qug: khai: kyi" khyag' re Yerusalem khyo te' li" nhao: ra".

¹³Lakhi mae na mo, we"- myao: jham re myao: lhin" mae te' ge,- naonhaung" wa Israel qobo re lag qu" yu mung: Yerusalem re qobo shad' nhao: ako".

¹⁴Aimung: ana" Yuda mang: byu qe we"- Moreshed Gad vobyu qere au" co' gese, Israel kho:kham qe wa Agzib vogaung: mae" bao" yu: ru qhug' yu genae" mangad:-

¹⁵Maresha vobyu qe we"- ASANG wa naonhaung" vogaung: re taung" yu nae" ra" naonhaung" gyevo qe: lo, khug khyo naonhaung" re ab byid' pye' nae". Israel au: jhaung qe wa Adulam laug aug' mae ye: phao: vho' na: li" genae".

¹⁶Yuda byu qe we" naonhaung" jhid'de; ra" myid:zo: qe: qhid' mae" kaug' qhui: ra" khyo" naonhaung" xae re phyid' pye' ge,. Naonhaung" nho: myid:zo: qere naonhaung" lo, mae" lhad' yu mung: pyaung" jhui" yu: pye' ru qhug' genae" rumung: naonhaung" nho: au: lam: jham re lang da jham we' dakhyo: myhaug' pye' ge,- ga: ta" ra".