Read Maru MIKHA 2 Bible Online

MIKHA 2 - Maru bible

MIKHA 2

¹Agyang: zang lang" jo, mung: makhyang" ra" lo, mau" re myid: yaung: na mo; qhid' mae" byuxa: voqoe, qhug' ako". Yao: bam wa agu gai qo" we' yao: bam myid: yaung: to" ra" makhyang: mashab: mau" zo" re kad' ako".

²Yao: bam wa yothaung: jham re o gelao" lhad' yu: ako". Yham jham re o: gelao" re: yu: pye' ako". Khag' ug' khug' re: khag' jo,nho" re: gug: gam: ru majo; ngad: ra".

³Aimung: ASANG wa- ngo wa naonhaung" re qug: khai: mo" byid: nae" aimung: naonhaung" wa aimae" maqo" phao: loe, genae". Naonhaung" wa qug: khai: mae gyo" vao mung: ngad beim: taung" maqo" su" qin" lo: genae".

⁴Ai: ayo, joe" lao" byu qe wa naonhaung" boe" khyo re kyi" khyag' ra" lag dalam: khyo" cili" genae". Aimung: yao: bam wa naonhaung" thaung" qhug' lo: ra" khyo re nhag' lam: thao" ra" ce: nghaui"caung" li" genae". Ngonhaung" wa bin sho' baui" byaug va" ASANG: mug: myid: re yu: pye' byid: mung: ngonhaung" re taung" yu: lo" mo, re byid' pye' ava"- ga: ta" ra".

⁵Aimung: ASANG: nho: byumyu" re mug: myid dam: tug' byid: nae" ayo, joe" lo: re naonhaung" mae" khag' qhid' mae" re: gae bam mabo nae".

⁶Byu qe wa ngore tarha" kho" mung: ceru: ga: ta" ako". Ngonhaung" re tarha" dakho". Ai: ra" khyo re dakho" kyo: Mao"So wa ngonhaung" re nga: yeim nhao nae" mangad:-

⁷Israel byumyu" qe wa nhang: kheim: zao" na: ein: nao myid: jho: na: i?- ASANG wa nhag' yo: matho' zang: lo: i? Yao: wa airu" ra" mau" zo" jham re gaigai: yao: kad' ke' naeva" i? Yao: wa jo: ru kad' mo, re nyang" nyang" yo yo za: jhau: ra" mangad: i?

⁸ASANG phaug' tau" ru wa- naonhaung" wa nga" byumyu" qere gyevo jham we' dakhyo: khe' zin" ako". Gyekhe' jao: mae" dam: lo mo, wa yao: bam: yham mae gug: gam va" ga: myid: lam: na: ako". Ngadqere: naonhaung" kam" wa yao: bam: gaung mae" bau: qhang re khug' yu: pye' nae" qhid' mae" lhaug' na: ako".

⁹Naonhaung" wa nga" byumyu" myiqe: qere yao: bam jhid'de; ra" yham khug mae" khe' thug' pye' mung: nga" shaman" jeju yao: bam: zoshao jham re khonhae" re: lhad' yu pye' ako".

¹⁰To" phao: lo" gese, cemae gug: gam: ru majo, lo: naonhaung" qobo wa ce: ra" jo, qo re byo; qeim nae" byuxa: voqoe qhug' nhao: va".

¹¹Ce: byumyu" qe wa mhug' dao: ta" mung: mhug' pyag' qin" ra" lapa we' naonhaung" qhid' mae" sabyi qang: we' yhid yug: thug' nae" ein: ngo lapa pa va"- ga: ta" ra" lapa qere o: ako".

¹²Ngadqere: ngo wa dang: jo; ra" Israel naonhaung" re zhang: yu nae" ngo wa yao kyaung" khyo dam: tug' lo: na: ra" yao jham re we' dakhyo: zhang: yu nae". Yao jham byang" jo, ra" mhin: gyo, jao: we' dakhyo: naonhaung" nho: mug: myid mae byu myo: sho' dam: na: li" genae".

¹³Mao"So wa yao: bam re khyo phung" byid: mung: taung bug: mang: khyo pyaung" nha: to" ru mae" jhui" thug' yu nae". Yao: bam wa vomo" kham: jham re phyo' sin" pye' mung: lo, lae vha thug' lo" li" genae". Yao: bam: kho:kham ASANG yao" yang yao: bam re jhui" thug' lo li" nae"- ga: tau" ra".