Read Maru MIKHA 5 Bible Online

MIKHA 5 - Maru bible

MIKHA 5

¹Yerusalem vobyu qe we"- naonhaung" nho: gye qam: zhang: ge, ngonhaung" wa kham" lhaung" to" ru qhug' na va". Yao: bam wa Israel nho: au: she mo, re gye zin" na: ako".

²ASANG wa- Betlehem Ephrad we" nao wa Yuda vogaung: jham mae" ngai: thao" vogaung: dalam: ngadqere: ganhae" gaco' mae" byuxag' gyo" lo: ra" yaug Israel kho:kham re nao mae" ngo thug' li" nhao nae".

³Aimung: yang: zo: khau nae" yaug: yang yauggai zo: khau: li" sho' ASANG wa yao" byumyu" qere yao: bam: gyevo qe: lo, mae shapye' to: co' nae". Ailao" taung: bug: mang: mae pyaung" to: qhug' ko" ra" yao" damang: za" mae" na cao: qe wa yao: bam yao" byumyu" qe we' dam: na: qham: lo" genae".

⁴Yao: joe" li" re yao: wa ASANG mae" qo" yu: ra" qam: so' we' Mao"So ASANG: nho: kho:kham kheim: so' yang yao" byumyu" qere eib zo" li" nae". Myid gaung geim" mae" byumyu" alhab' wa yao" qi" qhang: ra" khyo re tug: khae: yu mung:-

⁵Yao: wa ngaui pyo yaug yo: ru byid nae" ruyang yao" byumyu" qe wa gug: gam taung" qo" na: li" genae"- ga: ta" ra". Asuri byu qe wa ngonhaung" mung"dan: khyo jhin" vao li" mung: ngonhaung" nho: gyetab vang jham re phyo' lo ko" au: re ngonhaung" wa qam: bo: thao" ra" ngonhaung" au: jhaung qere yao: bam re khe' zin: nae" qhid' mae" nhao: ke' nae".

⁶Yao: bam wa shae lhae la qam" yang Nimrod mug: mae" Asuri re aung: pye' li" genae". Aimung: yao: bam wa Asuri qe yang ngonhaung" nho: mug: kyo: khyo jhin" vao lo: ra" au: ngonhaung" re Asuri qe: lo, mae" khyad' yu: li" genae".

⁷Mashid na: dang: ra" Israel byumyu" qe wa ASANG: yang byumyu" myo: sho' re khyo" byid' ra" nghin we' dakhyo:- yaug: qi" li" na: ra" qhovo: zo: jham: adao mae qu byid' ra" mug: qid we' dakhyo: ngad: li" genae". Yao: bam wa byu re mangad: lo: Mao"So re khug ngha: li" genae".

⁸Byumyu" qe: phaung agaung: mae na: dang: gyo" mo, wa seyo mangad: lao" mhin: gyo, jao: mae zo:ve kung" qin" ra" khang khyi we' dakhyo: ngad: li" genae". Yao: wa yao phaung gaung: khyo vao ye: mung: yao: bam re byae: zag: taung" ru we' adau atam" bin" cad' pye' ra". Ai mae" qo" khyad' yu nae" myid: lao" khyo majo,.

⁹Israel wa yao" nho: gyevo qere khe' aung: pye' mung: yao: bam alhab' re phyo' qheim" pye' nae".

¹⁰ASANG wa- ai: ayo, mae ngo wa naonhaung" nho: myao: jham re yu: pye' byid: mung: naonhaung" nho: gyekhe' myao: lhin" jham re phyo' qheim" pye' nae".

¹¹Ngo wa naonhaung" nho: mug: myid mae" vomo" jham re phyo' qheim" pye' mung: naonhaung" nho: gyetab vang alhab' re phyo' khyo" pye' byid: nae".

¹²Ngo wa naonhaung" ci: ko" ra" mandan:- khan" pha jham re phyo' qheim" pye' mung: naonhaung" mae boe, phyid' mo, matang" to: byid: nae".

¹³Ngo wa naonhaung" nho: sulho jham we' gyang" lho" laug zang baung: jham re phyo' qheim" pye' byid: mung: naonhaung" wa naonhaung" yao: kad' ra" ci zai jham re macaung:pa" lo: genae".

¹⁴Ngo wa naonhaung" nho: mug: myid mae" Ashe so myhi" sulho jham re phan" pye' byid: mung: naonhaung" nho: vogaung: mo" jham re phyo' qheim" pye' nae".

¹⁵Aimung: nga" nho: nhag' jam: yo" ruyang nga" mho dao: magyo" ra" byumyu" alhab' re ngo: yang lage, phaug' nae"- ga: ta" ra".