Read Maru NAHUM 1 Bible Online

NAHUM 1 - Maru bible

NAHUM 1

¹Ce wa Elko vogaung: mae" Nahum myao: ra" Nineve vogaung: we' sin" ra" mung: dao: ngad: ra".

²ASANG Mao"So wa yao: we' mai jho" qhi" ru khag' rere: maqu" to:- yao: re gye kad' mo, re qobo byid' ra". Yao: nhag' yo" ru yang: yao: bam re tug' byid' ra".

³ASANG wa laui za: nhag' maba: yo: ngadqere: yao: wa qam: so' qi: mung: qobo qo" mo, re khonhae" re: qobo mabyid: lo: manhao: ke' ASANG su" lo" khyi" mae la qam: to" lo: ra". Jham thaui: wa yao" khyid: yang pug: thug' ke' ra" phalhug ngad: ra".

⁴Pang:lai:: re yao: amyin" byid: lao" kin" ho: lo" ra". Qid gyaung: mo" jham re yao" yang kin" ho: lo" nhao: ra". Bashan mae" pa: din" jham mai: jhoe' lo" ako". Khame bam wa ma" byaug mung: Lebanon bam mae" bin: jham sham: lo" byaug: ako".

⁵ASANG: qhid' kheim: mae bam jham laui: nin" ako". Yao" qhid' kheim: mae bug gaung jham yug: byi: lo" ako". ASANG thug' li" re myid gaung lab: li" ra". Mug: myid we' ai: mae na mo, alhab' ko, ko, nin" ako".

⁶Yao: nhag' yo" re khag' qo" daui: na genae" i?- yao" ra" gyaug pho: nhag' jam: yo" rure khag' qo" kham nae". Yao: wa yao" ra" nhag' yo: myi: shae re vhe' sheim" ke' ra". Yao" qhid' kheim: mae laung: mo" baui jham wa phalhug boe" lo" ako".

⁷ASANG wa gai shab yaug ngad ra" yao: wa qug: khai qhug' ra" au: yao" byumyu" qere gug: gam byid' ra". Yao: jhao" lhang: lo mo, re yao" yang qu" caung byid' ra".

⁸Yao: wa qid gyui we' dakhyo: yao" ra" gyevo qere jhad' za: phyo' qheim" pye' ra". Yao: wa yao: re gye tug' kad' mo, re shid: ra" khyo nhao: ke' ra".

⁹Nao wa ASANG re pe" gye khug' kad' nae" i? Yao: wa nao re phyo' qheim" pye' li" nae". Khag' dayaug re: yao: re dalhang mae" je yang: gye: maqo" tug' kad' ngad: ako".

¹⁰Zau: kyin we' khovho kyaug' re we' dakhyo: yhid ya: naonhaung" re ngha" pye' li" nae".

¹¹Nineve nao mae makhyang: mashab: ra" mau" byang" ra" byu thug' li" mung: ASANG re gye tug' kad' ra".

¹²ASANG wa yao" byumyu" Israel qere ceru: ta" ra". Asuri byumyu" qe qam: qi: mung: byu lam: myo: sho' ngadqere: yao: bam wa phyo' qheim" pye' ru qhug' mung: baui" byaug: lo" li" genae". Nga" byumyu" we"- ngo naonhaung" re qug: khai: qhug' nhao va" ngadqere: airu: madam: kad' lo nae".

¹³Ana"- ngo wa Asuri qenho: qam: so' re thao" nhao: pye' byid: mung: naonhaung" re taui" to" ra" jao co: jham re phyid' pye' byid nae".

¹⁴Ce wa Asuri byumyu" qere ASANG ta" ra" dao: ngad: ra". Yao: bam wa yao: bam: mang re xo' vin nae" myid:zo: maqo" genae". Yao: bam: so jhaung: yham mae" sulho jham re ngo phyo' pye' byid: nae". Asuri qe qhid' mae" lab re ngo nyhang" seim" to: nae"- yao: bam wa daui: na nae" maman: qi" ngad: ako".

¹⁵Qu" qu" wa,- bam dao mae lau dao: kyo: yaug dayaug li" na: ra". Yao: wa aung doe; ra" khyo hau" kyo: nae" qhid' mae" joe" li" ava". Yuda byu qe we" ngaui bau: ngaui lho" poe kad' mung: Mao"So re naonhaung" dao: thang" to" ru byid: ge, makhyang: mashab mo, wa naonhaung" mug: myid khyo khonhae" re: dam: vao li" lo: genae" mangad:- yao: bam re bin sho' phyo' sin" pye' va".