Read Maru NAHUM 2 Bible Online

NAHUM 2 - Maru bible

NAHUM 2

¹Nineve we"- nao wa gye khe' ru qhug' ava". Nao re phyo' mhan" pye' nae" qam: so' joe" li" ava"- gyelham ge,- hau" mo" khyo re gug: gam byid: ge,- mang: zin: nae" qhid' mae" seim" ge,.

²ASANG wa Israel byumyu" qe: phungbao re yao" gyevo qeyang maceim" phyo' paui: yu shi" au: mae" we' dakhyo: dam: tau: to' byid: nae" jhao" va".

³Gyevo qenho: gyezo: qe wa go ane jham ngad ra" gyemai gyebau: ane re ve; ako". Yao: bam wa gye khe' nae" qhid' mae" seim" na: ako". Yao: bam: ra" gyekhe' myao: lhin" jham wa myi: we' dakhyo: bao kyi: ako". Yao: bam: myao: jham thug' jhu" na: ako".

⁴Gyekhe' myao: lhin" jham wa hau" mo" khyo jham mae phabau: phaxe' tao" lhau: ako". Vomo" khug mae thoekhyo cekhyo tao" dan: qin" ako". Yao: bam wa myidam we' dakhyo: ba bao bag mung: lhe' cad' re" ru: bag sin" qin" ako".

⁵Gyezug: qere khai: zhang" to: va". Yao: bam wa qhid' khyo khe' ye" lo" re khyid au: thaung" lang" ako". Gyekhe' mo, wa vogaung: vang khyo tao" de; mung: gyekhe' nae" mo; qhid' mae" go kad' pye' ako".

⁶Qid gyaung: yae mae" qid kham: mo" dung: jham baug: thug' li" mung: kho:kham kho" wa gyaug: din: ru we' byang" byaug va".

⁷Kho:kham myhi" re taung" pye' va"- yao" daui nhao mo, wa phaung" kyug' re" ru: nokyang: kyang" ako". Yao: bam wa kaug' qhui: mung: yao: bam: qao bam theim: ako".

⁸Qid tham: baung byo, gyo" lo" ra" qid we' dakhyo: byu jham wa Nineve mae" tao" dan: thug' lo" ako". Thang ge, thang ge, ga: hug' ngadqere: khag' malhang: qu" ko" ngad: ra".

⁹Ngaui re lhad' yu ge, qhang re lhad' yu ge,. Ai: vogaung: mo" wa jo,nho" byang" jo; lhe"-

¹⁰Nineve wa phyo' sin" pye' ru qhug' va"- to: co' qhug' va"- cae: jhug tag boe" byaug va". Gyaug mung: nhag' lam: thao" byaug va". Pad' lhaug ko, ko, nin" byaug va". Qam: gan: byaug va". Myo, khung: jham bo" byaug va".

¹¹Khang khyi khyaung ru" ra" vogaung: wa ana" khai: lo" byaug va" la, i? khang khyi nau" jham re zo: shaug' zho: mung: khang khyi myhi" we' khang khyi pho" tao yaug yo za: yao: zo: qe we' qo" khug: na nae" ra" khang khyi khyaung khai: lo" va" i?

¹²Khang khyi wa yao" zo: sho: re se' pye' mung: yao" khang khyi myhi" we' yao: zo: qe: qhid' mae" bin" phyo' yu: ra". Yao" khang khyi khyaung mae shikhai" shokhyi" we' byang" jo; ra".

¹³Qam: so' bo: thao" ASANG ta" ru wa- ngo wa ni" nho: gyevo ngad: lhe"- ni" gye khe' lhin" jham re ngo ngha" pye' byid: nae". Ni" gyezo: qe wa mang: zin: jao: mae se' pye' ru qhug' li" genae". Su gaje mae" nao lhad' yu: ra" jo,nho" alhab' re ngo yu: pye' nae". Ni" nho: lagyo: jham mho' yao: ra" thoe re khonhae" re: mathe' gyo: lo: genae".