Read Maru NAHUM 3 Bible Online

NAHUM 3 - Maru bible

NAHUM 3

¹Lhad' phyo" yu nae" jo,nho" byang" mung:- mhug' zo: mhug' shaug' byu se' ra" vogaung: mo" mae baui" lo" nae" byuxa: voqoe, qhug' ava".

²Tae" gyo: ge,- byu be, taui: myang thoe- lhin" ce' su" qin" thoe- myao: jham tao" qin" thoe- myao: lhin" keim" lhau thoe tae" gyo: ge,.

³Myao: jui: mo, joe" li" va". Shae pyang: bao kyi va"- lhae tad' qhi qhi mung: va"- su shid mao jham bam myhao sho' bam: jo, va". Matho' nghe' losho' ra" sushid jham mae su" lo" mo, khyid au: thaung" ako".

⁴Shava myhi" ngad: ra" Nineve wa qobo dae byid' ru qhug' va". Yao: wa qu" yaung" sho' ra" gyaug ja: lamyhung: yang mung"dan: jham re ju" phyo' yu mung: jeim zo" lai: lo va".

⁵Qam: so' bo: thao" ASANG ceru: ta" ra". Nineve we"- nao re ngo qobo dae byid: nae"- nao re ngo mai bau: khyad' pye' byid: mung: ni" nho: qho' ja: gaungcin shopyad' alhab' re byumyu" mung"dan: qere ngo myao nhao nae".

⁶Ngo wa nao re manug makhyad' kad' mung: maca' majhad' yang sheim" gyan: byid: nae". Mo, byu qe wa- nao re qu" gyaug taung" ceim" zhaug' qu" li" genae".

⁷Nao re myao mo, alhab' wa naung zad: zad' lo" li" genae". Yao: bam wa ceru: ga: ta" li" genae". Nineve wa byo; qeim: jo, va". Yao: re khag' yang nhag' khyag' yu nae" laug i? Yao: re khag' yang nhag' tang" byid: nae" laug i?

⁸Nineve we"- nao wa Egutu mang: mae" Thebe vomo" tho' je: gai: ra" i?- yao: mae re: gug: gam byid: nae" ra" qid gyaung: mo" qo" ra" Nila qid gyaung: mo" wa yao" ra" gug: gam jo, qo ngad: ra".

⁹Yao: wa Ethiopia we' Egutu re eib zo: mung: yao" ra" qam: so' wa thao" ga" ru majo, Libya wa yao" nho: myid qhan: ba nam mung"dan: boe" lai: lo va".

¹⁰Ngadqere: Thebe mang: byu qe wa gamug: khyo zaug pyaung" yu: ru qhug' ako". Khyo kao: khao: ngo" mae yao: bam: zoshao qere be, se' to" ako". Yao: bam: ra" au: she nhag' bo qere: jao co" yang myag: she: yu mung: yao: bam re taung" yu mo, jho" gae ngho" pye' ako".

¹¹Nineve we" nao re: yhid yid yaug magyang: mung: ruru: boe" lo" nae". Nao re: ni" nho: gyevo: qe: lo, mae" loe, khyo qho: li" nae".

¹²Ni" gyetab vogaung: jham alhab' wa ashi: mhang" jo; ra" pho' ham" gae jham ru: mung: byaug nae". Pho' ham" gae re yelhaui" nhan" ke' lao" ashi: jham ni" nhad' mae lhoe, gyo" vao: li" nae".

¹³Ni" gyezo: jham wa myiqe: qe we' dakhyo: ngad: ako". Ni" mung"dan: wa gyevo jham: qhid' kheim: mae gug: gam mabo mung: jo, ra". Ni" nho: kham: mo" mae" kham: kyao" jham myi" yang nga" pye' li" nae".

¹⁴Gyelaung" laung" au: qhid' mae" qid khae: to: wa,- ni" gyetab vogaung: jham re tang tang kad' to: wa,- zhogam: thaung: kad' nae" qhid' mae" zhonhai: re nao" to: mung: azung jham re seim" nyang" to: ge,.

¹⁵Nao khoru: kad' to: qere: nao wa myi" yang nga" se' pye' ru mangad: lao" gyekhe' jao: mae se' pye' ru qhug' li" nae". Nao wa khyag' phaung" yang zo" jhad' pye' ra" qhovo: we' dakhyo: sham" pye' ru qhug' nae". Nao wa khyag' phaung" jham re" ru: myo" laug: ako".

¹⁶Nao wa mug:gaung dao mae" kyi jham tho' myo" ra" xan: aung: mo, myo: sho' ngadqere: ana" kam" wa yao: bam baui" byaug avako". Khyag' phaung" jham we' dakhyo: yao: bam: daung re phyid ke' mung: dao" byaug va".

¹⁷Ni" gyezug: qe wa gyo; ra" ba re khin: qae mae de, ham: bam: ra" khyag' phaung" dathaui: we' dau: ako". Ngad qere: ba thug' li" lao" yao: bam dao" byaug mung: khai: lo" byaug ko" rure khag' macao" ba: ke'.

¹⁸Asuri kho sin" we' ni" mung" zug: jham wa shid: byaug: avako". Ni" byu zang qe wa apyad ato yab: jo; ako". Ni" mung" byu qe wa bam mug: khaung: byo: sin" lo" ako". Yao: bam re yham khyo dam: jhui" yu nae" dayaug re: mana.

¹⁹Ni" dae re ya: gai byid: nae" mocid' majo, ni" dae khu re maqo" ya: gai lo:- nao byo; qeim: lo" va"- ga" lau dao: the' gyo: mo, alhab' wa bau: yang: yao: bam lo, pyo' pyo' li genae". Nao: yang mathang mano: nug: khyo" yhin" ru mae" khag' loe; qu" ra" i?