Read Maru HABAKUG 2 Bible Online

HABAKUG 2 - Maru bible

HABAKUG 2

¹Ngo re ASANG: yang pe" ta" kyo nae" ru we' ngo nyhung: rure khoru: phaug' tau: nae" ga" rure the' myao: yu sho' gyebyu zaung khyo do, ye: mung: yelao" na nae".

²ASANG wa ngore ceru: ga: phaug' tau: byid' ra"- ngoyang nao re qhu" byid' rure vhag ein: lhau" qu" ke' re myao: nghe' naekhyo" laug pye: dao mae de: de: za: tung" to: wa,.

³Airu wa jo; dang: lo nae" ayo, majoe" shi: mung: tung" ce' yang tung" to: wa,- ngadqere: ayo, wa phyad joe" lo: na mung: nao re ngo qhu" byid' ru wa jo; dang: lo: li" nae". Ayo, phyad majoe" nhohab mung qere: lao" na wa,. Aiwa dang dang za: yao: boe" lo mung: yam" na nae" mangad:-

⁴Aimung: ce: mungdao: wa- Makhyang: mashab mo, wa mana: dang genae". Ngadqere: din:man: mo, kam" wa Mao"So re jhaug' zaug ko" rumung: qo" daui: na: li" genae"- ga" ru ngad: ra".

⁵Jo,nho" wa apyag' asham" ba: ra". So' kho' wa ngad beim: mung: phabau: phoxe' ngad: ako". Shidgyan nogyan we' dakhyo: yao: bam wa khonhae" re nhag' maba: dag ngad: ako". Aimung: yao: bam wa mung"dan: dalam: bin dalam: re yao: bam yao" qhid' mae" aung: yu: ako".

⁶Aung: yu: ru qhug' mo, wa aung mo, re dao: phaug' tau: mung: yao: bam re manug: ra" khyo" qhu" byid' li" genae". Naonhaung" wa naonhaung" yao" nho: mangad' rure naonhaung" yu sang: pye' ngadqere: naonhaung" wa byuxa: voqoe, qhug' ako". Naonhaung" wa naonhaung" re jhin de, mo, re maqad maqui" jhin xe' nhao mung: khomyhao" myao" sho' xo' yang: na: qo" na: dai genae" i?- ga: ta" li" genae".

⁷Ngadqere: naonhaung" mabeim: shire gaje: byumyu" qere aung: yu mo, naonhaung" yao: jhid'de; mung: gau pai: te' ngaui maqad maqui" xe' nhao ru qhug' genae". Gyevo jham li" mung: naonhaung" re gyaug: nin" nhao: genae" yao: bam wa naonhaung" re phyo' zo" pye' li" genae" lhe"-

⁸Naonhaung" wa byumyu" myo: sho' re phyo' zo" pye' va" ngadqere: ana" kam" wa mashid na: dang mo, yang naonhaung" re ceim" phyo' zo" pye' li" genae". Pe"mung:ga"re naonhaung" yang kad' ra" byuse' mau" we' mug:myid dao mae" byumyu" qere re: yao: bam: vomo" jham rere: naonhaung" aqan alan kad' yang: ngad: ra".

⁹Naonhaung" wa byuxa: voqoe, qhug' ako"- nao wa aqan alan mau" yang the' yu: ru we' ni" yham khaung ug' khug' byu qere jo,nho" qo" nhao: ra". Aimung: ni" yham re gyaug ci" ja: gye mae" gug:gam sho' phin" na: ra".

¹⁰Ngadqere: ni" myid yaung: ra" mau" jham wa ni" yham khaung ug' khug' re qho' phau: nhao va". Nao wa byumyu" myo: sho' mo, re phyo' qheim" mung: naoyao" gaung re qeim nhao: ava".

¹¹Khinqae mae" laugbaui lhao" re: nao re qobo zhaug' mung: hug' ra". Khaung dam: jham wa lao thao tau" ako".

¹²Nao wa byuxa: voqoe, qhug' va" nao wa se' da: be, khyad' yang: vogaung: tae: mung: byuse' xao au: yug: mau" mae vogaung: kad' to" ra".

¹³Nao: yang: aung: pye' ra" byumyu" qe wa akeim mae mau" zaui" pye' mung: yao: bam zhaug' to" ru alhab' myi: nga" pye' va". Qam: bo: thao" ra" ASANG wa ceru re kad' va".

¹⁴Ngadqere: panglai: jham qid byang" jo, ru we' dakhyo: myidgaung wa ASANG: phungbao re ba: ra" laba lajhao byang" jo; li" nae".

¹⁵Nao wa byuxa: voqoe, qhug' ava". Ni" nhag' jam: yo" ruyang ni" yham kyo: cao: qere qho' phyo' mung: nga: phoe nhao: ra". Nao wa yao: bam re yhid yid: mo, we' dakhyo: su" gyang: lang" qin" nhao: ra".

¹⁶Nao yao: re: nga: qo" nae" atha" qho' phau: nae" nao yao: shaug' yid mung: su" gyang: lang" qin" li" nae". ASANG wa nao re naoyao" qobo dae keim mae" shaug' nhao nae". Amung: ni" nga: ye, khyo wa aqho' axag' boe" byaug: li" nae".

¹⁷Nao wa Lebanon sag' qao" yo re thau: pye' ra". Ana" wa nao re thau: pye' nae"- nao wa ai: seyo mae" gug'nyhug' jham re se' pye' ra". Ana" wa ai: gug'nyhug' jham: yang nao re kyaug' li" genae". Nao kad' ra" byuse' mau" we' myidgaung: dao mae" vomo" jham rere: ai: vogaung: byu qere re: nao: yang aqan alan kad' ra" mathao mae ceru: boe" lo: li" nae".

¹⁸Solho wa pe" akyu" bo: i? Airu wa byu: yang: kad' to" ra" lo, mau" za: ngad: ra". Aimung: aiwa mhug' dao: mae" je yang: nao re pe" mata" shid' ngad: ra". Dao: lhao" maqo" jhau: ra" so aiwa yao: re kad' to: yaug aire lam: re pe" akyu" byid' ra" i?

¹⁹Nao wa byuxa: voqoe, qhug' ra". Nao wa sag' thaung: dalam: re yab so: yab so: to" wa, mangad: lao" laug' baui dabaui re to" ye, wa, mangad: lao" laug baui dabaui re to" ye, wa,- ga: ta" ra". Solho dalho wa nao re pe" daja: qo" qhu" byid' ra" i? Airu re ngaui: yang la, qhang: yang la, thab' to: qere: aimae kao so' mabo ngad: ra".

²⁰ASANG wa yao" nho: gyang" lho" ra" Caung:pa" Yham mae na: ra" myidgaung: dao mae" yaug khao: ngo" wa yao" qhid' kheim: mae sae za: tae" jo, vageshao:-