Read Maru ZEPHANI 1 Bible Online

ZEPHANI 1 - Maru bible

ZEPHANI 1

¹Ce mungdao: wa Amon nho: yao: zo: Yoshia ga: yaug Yuda mung" mae kho:kham kad' na: ra" ayo, gyo: mae ASANG: yang Zephani re byid' ra" lapa dao: ngad: ra". (Zephani wa kho:kham Hezekia nho: myid:zo: ngad mung: Amaria- Gedalia we' Kushi qe khyo" myhung: gyo" li" yaug ngad: ra".)

²ASANG ta" ru wa myid gaung dao mae" jo, majo, alhab' re ngo phyo' qeim" pye' naeva".

³Xao su byu alhab'- gug'nyhug' alhab'- ngho' we' ngo: alhab' re phyo' qheim" pye' nae". Makhyang: mashab mo, lang" gyoe; gyo" nae" khyo re ngo kad' thug' ke' nae". Xao su byu alhab' re ngo phyo' qheim" pye' mung: khag' re: na: dang na lo nae" mangad: ngo ASANG ta" to: va".

⁴Ngo wa Yerusalem we' Yuda mung" byu qere qobo dae byid: nae". Ai mae jo; ra" Bala so caung:pa" khyo re phyo' qheim" pye' mung: khag' re: yao: re caung da" byid' ra" Bala lapa re madam: beim: lo: genae".

⁵Yham khaung dao khyo do, mung: ba- kyi- lho" mo" jham re caung:pa" mo, yaug khao: ngo" re phyo' qheim" pye' nae". Ngo re caung:pa" mung: nga" mang lao: yang: jham tang" to: thao Moleg so mang re lao: yang: jham dam: tang: mo, rere: phyo' qheim" pye' nae".

⁶Dam: tug' lo gengadqere: nga" thao macao" mo,- ngo jhao" mali" mo,- yao: bam re khyo shid' byid: nae" ngo re mamho' yao mo, re ngo phyo' qeim" pye' nae".

⁷ASANG wa dao: kho' ra" tao" khau" mae zaung nae" ba na jhao" li" va" rumung:- yao" qhid' kheim: mae sae za: na: jo; ge, ASANG wa yao" byu qere xeim: khyo" ngaui" byid: nae" nyhang" na mung: Yuda re phyo' zo: nae" gyevo qere lhaung: to" ava".

⁸Ai: byu se' ra" ba na mae kho:kham nho: zug: nhag' bo qe kho:kham yauggai zo: qe we' taung bug: sam" ve, cao" mo, alhab' re qobo byid: nae" ga: ASANG ta" ra".

⁹Yao: bam yao" asang qera" yham mae lhad' yu: ra" jo,nho" byang" jo; nae" qhid' mae" khug' mung: byu se' ra" mo, we' Mao"So re malam mo, we' dakhyo: caung:pa" mo, re qobo dae byid: nae".

¹⁰Ai: ba na re Yerusalem mae" Ngo: Kham: mo" mae ngug thoe the' gyo" li" genae". Vogaung: mo" nho: vosag' dau khyo kaug' qhui: na: ra" thoe naonhaung" the' gyo: mung: bug gaung jham mae byo; gyo" ra" thoe re the' gyo" li" genae".

¹¹Vothao dau khyo na mo, we"- xan: aung: mo, alhab' shid: gan: lo" nae" ngad mung: ce: lau dao: re the' gyo: lao" kaug' qhui: mung: gyi: ngug ge,.

¹²Ai: ayo, re ngo wa myikaug' ci mung: Yerusalem re paui: qho: pye' nae". ASANG wa dakhyo: mangad: lao" gatau dakhyo: khyo" khonhae" re: pe" malhaung" kad' ga: ta" mung: yao: yao" khyo re nhag' dag: na mo, re ngo qobo dae byid: nae".

¹³Yao: bam: jo,nho" lhad' yu: pye' ru qhug' mung: yao: bam: yham re phyo' sin" pye' li" genae". Yao: bam zhaug' na: ra" yham mae yao: bam khonhae" re: qhug' laung" genae" mangad:- yao: bam qho" ra" sabyi khyae mae" re: sabyi qang: khonhae" re qhug' shaug' genae" mangad:-

¹⁴Qi" qhang: ra" ASANG: ba na mo" wa jhao" li" na va"- gyai jhao" li" mung: gyai phyad: khyo" joe" li" na: ava" lhe"- ai: ba na wa alokho" ra" ba na ngad: mung: lhe" thao" ra" gyezo: qelhao" re: nhag' lam: thao" mung: gyi: ngug: li" genae".

¹⁵Ai: ba na wa nhag' jam: yo" ra" ba na- qug: khai: nhag' ngai: ra" ba na- byo; qeim: ru we' phyo' sin" pye' ra" ba na- no, sang: kyid cad' no; ra" ba na- mug: dab mung: jham thau: ra" ba na ngad: li" nae".

¹⁶Gyekhe' ra" labo" thoe byang" ra" ba na- gyetab vang jham we' myhao: ra" gyebyu zaung jham re phyo' ra" gyezo: jham: hug' thoe byang" ra" ba na ngad: li" nae".

¹⁷ASANG wa airu" ra" kyi" khyag' rure byumyu" cao jab dao mae ngo boe" nhao mung: yaug khao: ngo" wa myo, jid' we' dakhyo: soe' ye; qin" ca" li" genae". Yao: bam ngo re qobo shad' ra" mathao mae ana" yao: bam: sa: wa qid we' dakhyo: yug mung: yao: bam: gaung khyao jham wa myid gaung mae bab: jo; li" genae"- ga: ta" ra".

¹⁸ASANG wa yao" nhag' jam: yo" rure qhu" byid' ra" ba na mae yao: bam qo" ra" ngaui we' qhang alhab' yang lhao" re: yao: bam re qo" khyad' yu genae" mangad:- myid gye, geim" wa yao" nho: nhag' yo" ra" myi" yang phyo' qheim" pye' ru qhug' li" nae". Mug: myid geim" dao mae na: ra" mo, yaug khao: ngo" re yao" yang nyag din taung" jo; thao" lo" nhao: li" nae".