Read Maru ZEPHANI 2 Bible Online

ZEPHANI 2 - Maru bible

ZEPHANI 2

¹Maba: qho' ra" byumyu" qe we"- nhag' gyang" lo: gese,.

²Gaug seim re la: yang hug' tao" pye' ruru: naonhaung" re makhe' tao" pye' shire- ASANG nhag' jam: yo" ru naonhaung" dao mae majoe" lo shire - yao" nhag' jam: yo" ru qhu" byid' ra" ba na majoe" lo shi: re beim: so: ge,.

³Mung"dan: mae" nhag' lam: nyham: khyo" ra" mo, alhab'- yao" amyin" dao: re phug' cao" ra" mo, alhab' ASANG jhao" lhang: lo geri:-din: man" ru kad' mung: ASANG: qhid' kheim: mae naonhaung" yao" gaung re nyham: khyo" ge,. ASANG nhag' jam: yo" qhu" ra" ba na mae qobo byid' ru mae" naonhaung" loe; re loe, genae".

⁴Gaza vogaung: mo" mae khag' re: madang lo: genae". Ashkelon re cae: jhug tag phao: cug' to: co' ru qhug' nae". Ashdod vogaung: byu qere dakhyug' za" ayo, mae keim" yu pye' li" genae". Ekron vogaung: mae" byu qere re:- yao: bam: vogaung: mae" keim" thug' pye' li" genae".

⁵Pang:lai:: qid yae cao" mung: na: ra" Philisti byu naonhaung" wa byu xa: voqoe, qhug' avako". ASANG wa naonhaung" re dao: kho' ava". Yao: wa naonhaung" re byo; qeim nhao mung: naonhaung" dayaug re: madang genae".

⁶Pang:lai:: qid yae cao" mae" ni" mug: myid wa yao lhaug' mo, we' yao: bam: yao laung" yham byang" ra" mhin: yo boe" byaug: li" nae".

⁷Yuda mung" mae na: dang: ra" byu qeyang ni" mug: myid re sang: yu: pye' li" genae". Yao: bam wa ai: mae yao: bam: yao re zaung" mung: Ashkelon mae" yham jham mae yab: li" genae". Yao: bam: ASANG Mao"So wa yao: bam we' daga" na: mung: yao: bam re dam: na: dai nhao: li" nae.

⁸Qam: so' bo: ra" ASANG wa nga" byumyu" qere Moba we' Amon byu qeyang nug: khyo: maphug' makhyad' kad' mung: jung" na: ru we' yao: bam: mug: myid re lhad' sang: yu nae" ga: phug: ta" thoe ngo the' gyo: va"- ga: ta" ra".

⁹Ngo wa Israel nho: Mao"So kao so' daui: na: ASANG dang dang ngad: ru we' dakhyo: Moba we' Amon wa Sodom we' Gomora we' dakhyo: phyo' qheim" pye' ru qhug' li" genae" ein: ngo jham tang" to: va". Ai: shid' mug: wa xo: tham: boe" lo" mung: apyad ato byo; qeim: jo; mung: mhin: se: nhai" jo; li" nae". Mashid na: dang: ra" nga" byumyu" wa yao: bam: mug: myid re lhad' zo: mung: sang: yu: pye' byid' li" genae".

¹⁰Airu wa ngad beim: mung: nhag' lam: myhao: ru we' qam: so' bo: ra" ASANG: nho: byumyu" dao mae maphug' makhyad' kad' ko" ra" Moba we' Amon byu qe khoru: qobo dae phau: zo: genae" ru ngad: ra".

¹¹ASANG wa yao: bam re kyaug' tin" li" nae"- yao: wa myid gaung: dao mae" so jham re pe" phug' made, sho' kad' khyo" pye' byid: nae". Aimung: yao: re mung"dan: khao: ngo" wa yao: yao" mug: myid mae yao: re caung:pa" li" genae".

¹²ASANG wa Ethiopia mung" byu qere re: se' pye' li" nae".

¹³ASANG wa yao" qam: so' yang Asuri re phyo' qheim" pye' li" nae". Yao: wa Nineve vogaung: mo" re cae: jhug tag byo; qeim: jo, mung: qid majo; ra" din"pyad' yo boe" nhao: pye' nae".

¹⁴Ai: jo, qo wa nung: kyaung"- yao kyaung"- cad' be, kyaung" we' gug'nyhug' aja: ja: na: ra" myid gaung boe" lo" nae". Khaung: bab: jham wa ai: vogaung: qeim mae na: bam mung: bao: zo: kham: jham mae" myang: na: li" genae". Kano, jham wa kham: dung: mo" mae" myang: na: li" genae". Yao" nho: yham jham mae" shaug' the: sag' vo: alhab' phyo' khyo" pye' ru qhug' nae".

¹⁵Yao: yao" nho: kheim: so' re phin" lam mung: gyai gug: gam va" ga: myid: ru we' ngad beim" ra" ai: vogaung: wa airu: qhug' li" nae". Ai: vogaung: mae" byu qe wa- mug: myid: dao mae yao: bam: vogaung: boe" doe; thao" va" ga: myid: ako". Ai: wa khonho" cae: jhug tag mung: ra" seyo: gug'nyhug' lhe: jham na: ra" jo, qo boe" lo" li" nae" lhe"- ai: ayae khyo" su" lai: ang: ra" yaug khao: ngo" wa gyo, shi: qid qid ga: dam: gyaug: tug' lo" li" genae".