Read Maru ZEKHARI 1 Bible Online

ZEKHARI 1 - Maru bible

ZEKHARI 1

¹Persia mae Dari khosin" boe" ru shid' zin ein: zin lho" she' khye' joe" re ASANG wa Ido nho: yao: myid: Berekhia nho: yauggai zo: lapa Zekharia re ce: mungdao: byid' ra".

²Qam: so' bo: thao" ASANG wa Israel byumyu" re ta" kyo: nae" qhid' mae" Zekharia re pyang: ra". Ngo ASANG wa naonhaung" nho: phug' phyid' qere nhag' yo: va".

³Ngadqere: ana" wa naonhaung" re ngoyang: ceru: ta" va". Ngo jhao" dam: tug' lo ge, airu: ngad: re naonhaung" jhao" ngo dam: tug' lo nae".

⁴Naonhaung" phug' phyid' qeru: damung ge, ganhae" gaco' yo, mae" lapa qe wa yao: bam re nga" mungdao: byid: mung: makhyang: mashab: ru we' qobo mau" mae kao so' madaui nae" qhid' mae" ta" kyo" avako". Ngadqere: yao: bam wa nga" mho dao: re matae" gyo:- ngo ta" rure re: maphug' cao" ngad: ako".

⁵Naonhaung" phug' phyid' qe we' ai: lapa qe wa madaui: na lo: ngad: ako".

⁶Ngo wa nga" lapa qe: nhad' khyo" yang naonhaung" nho: phug' phyid' qere amyin" dao: jham we' ta" peim" ra" dao: jham byid: va". Ngadqere: yao: bam wa ai: dao: jham re pe" shui manho: gemung: ai: mathao mae boe" lo: ru jham re phau: zo" ako". Ai: thao yao: bam wa nhag' lam: tha" ru we' yao: bam leim zo: nae" man: qi" ru we' dakhyo: qobo dae byid: mung: ngo myid: phyid' to" ru we' dakhyo: kad' ru wa qam: so' bo: thao" ra" ngo ASANG ngad: rure aso: xam" yu: ako"- ga: ta" ra".

⁷Dari khosin" boe" ru shid' zin ein: zin Shebad ga" ra" lho" daxe: dakhye' shid' xe: byid ba: ba myi" ayo, re ASANG: yang ngore qhu" lho khyo" mungdao: dakheim: byid' ra".

⁸Ngo wa myao: ne jui" ra" ASANG: mug: lagyo: dayaug re the' myao:- yao: wa lao: khaung: dalam: mae" mai:thin" sag' pau: mae thang: jo; ra"- yao" nhaungthao" mae wa myao: ne- myao: tung" we' myao: phyu jham na: ako".

⁹Ngo wa yao: re asang we"- ce: myao: jham: lajheim: wa pe" ngad: i? ein: myid'. Yao: wa aijham pe" ga: nug: rure ngo qhu" byid: nae".

¹⁰ASANG wa myidgaung: khyo yecao" ca: qu" nae" qhid' mae" aijham re nhao: ke' ra" ga: tau" ra".

¹¹Yao: bam wa ASANG: mug: lagyo: re ngonhaung" wa myidgaung: mug:myid khyi" khao: ngo" cao" joe" qu" va". Aimung: damug: myid: geim" wa ngaui pyo: yaug yo za: tae" byaug: avako"- ga: zhao: kyo" ako".

¹²Ailao" mug: lagyo: wa- Qam: so' bo: thao" ra" ASANG we"- nao wa Yerusalem we' Yuda vomo" jham re nhag' yo" ru ana" nhad' xe zin myao" va". Aijham re nao: yang nhag' khyag' myid qhu" byid: nae" khomyhao" myao" shinae" laug i? ga: myid' ra".

¹³ASANG wa mug: lagyo: re nhag' tang" byid' ra" dao: we' tau: mung: mug: lagyo: wa qam: so' bo: thao" ASANG ta" rure hau" kyo: nae" qhid' mae" ngore ta" kyo" ra".

¹⁴Ngo wa nga" nho: gyang" lho" vomo" Yerusalem re qi: sho' jhid' mung: sang: kho" na:-

¹⁵Aimung: yaug yo cae: tae" khyo" na: jo; ra" byumyu" mung"dan: jham re ngo nhag' yo" ra". Pe"mung:ga"re nga" byumyu" qere ngo nhag' yo" ru zang" ci: ra" au: yao: bam wa nga" byumyu" nho: dayin dayo: qug: khai: re je: xo nhao: ako".

¹⁶Aimung: ngo wa Yerusalem re nga" nhag' khyag' myid qhu" byid: nae" qhid' mae" dam: tug' lo va". Nga" Caung:pa" Yham re dam: tau: zhaug' mung: vomo" re dam: te: nae".

¹⁷Mug: lagyo: wa ngore ceru: ga: ta" hau: nae" qhid' mae" ta" ra"- Qam: so' bo: thao" ra" ASANG ta" ru wa yao" nho: vomo" jham wa dalhang dam: na: qo" na: dai: li" genae". Aimung: yao: wa Yerusalem re dalhang dam: bao" yu: ru we' ai: vomo" re yao" yang sang: ga: re: ta" li" nae".

¹⁸Qhu" lho galam: mae ngo wa nung: jaung lo: khyug byid khyug the' myao:-

¹⁹Ngo wa ngore jhau: ra" mug: lagyo: re- Ce: khyug jham wa pe" lajheim: jham ngad i? ein: myid' qu" va".

²⁰Yao: wa- aijham wa Yuda byumyu" Israel byumyu" qe we' Yerusalem vobyu qere khyi" khao: ngo" khyo khe' sin" pye' ra" mug: myid: nho: kheim: so' jham re vin: ra" mo, ngad: ako"- ga: tau" ra".

²¹Ngo wa ce: byu qe wa pe" li" kad' ako" i? ein: myid: lao"- yao: wa- Yao: bam wa Yuda mung" re bin sho' phyo' qeim" pye' mung: ai: mang: byu qere khe' sin" pye' ra" byumyu" qere kyaug' tin" mung: tau: lhan" pye' nae" qhid' mae" li" ako"- ga: tau" ra".