Read Maru ZEKHARI 10 Bible Online

ZEKHARI 10 - Maru bible

ZEKHARI 10

¹Zin vao kheim: re mug: qu nae" qhid' mae" ASANG re mho' ge, mug: qid bo: ra" jham thaui: we' mug: byam byam nhao yaug wa ASANG ngad mung: yaug khao: ngo" qhid' mae" qhovo: yo re nyug: jam: nhao: ra".

²Mung" byu qe wa so alho jham re we' boe, phyid' mo, re myid' ako". Ngadqere: yao: bam qo" yu: ra" dao: phyid wa mhug' dao: we' pe" lajheim: mabo: ru za: ngad: ako". Damyo" wa yabmo, re pheim: kyo" ako". Ngadqere: yao: bam wa naonhaung" re khyo dae: za: ajhui" dae" ako". Aimung: byumyu" qe wa byaug: byaug: ra" yao jham we' dakhyo: du" lae" qin" ako". Yao: bam wa au: jhaung maqo" gamung: qug: khai: qhug' ako".

³ASANG wa ceru: ta" ra"- Nga" byumyu" qe: dao mae eib zo" ra" ai: taungbug byu qere ngo nhag' qu" yo" ra". Aimung: ngo wa yao: bam re qobo dae byid: naeva". Yuda byu qe wa nga" byumyu" ngad: ako". Aimung: qam: bo: thao" ra" ASANG ngo wa yao: bam re gun caung: nae". Yao: bam wa qam: so' qi" ra" nga" gyekhe' myao: jham boe" li" genae".

⁴Yao: bam: phaung gaung: mae" nga" byumyu" re eib nae" kho:kham jham- au: jhaung jham- gyezug: mo" jham po" thug' li" genae".

⁵Yuda byu qe wa- gyezo: qeyang yao: bam: gyevo qere hau" mo" khyo mae" tham: bab: mae zab: nhe" pye' ru we' dakhyo: aung: pye' li" genae". ASANG wa yao: bam we' daga" ngad mung: yao: bam gye khe' li" genae". Aimung: yao: bam wa gyevo qenho: myao: jui: sulhe: qere lhao" re: aung: pye' li" genae".

⁶Ngo wa Yuda byu qere qam: bo nhao nae". Aimung: Israel byu qere khyad' yu nae". Ngo wa yao: bam re nhag' khyag' mung: yao: bam alhab' re yham khyo dam: jhui" tug' yu nae". Yao: bam wa ngo: yang khonhae" re mangag: pye' mo, we' dakhyo: ngad: li" genae". Ngo wa yao: bam: Mao"So ASANG ngad:- yao: bam: akyu" mho' dao: re ngo tau: byid: nae".

⁷Israel byumyu" qe wa gyezo: qe we' dakhyo: qam: bo: li" genae". sabyi qang: shaug' mo, we' dakhyo: ngaui bau" li" genae". Yao: bam: myid:zo: qe wa ce: aung doe; rure myid: beim" na: li" genae". Aimung: ASANG kad' lo: ra" lo, mau" mathao mae myid: bau" na: li" genae".

⁸Ngo wa nga" byumyu" qere khai mung: yao: bam re daga" za zhang: to: nae". Ngo wa yao: bam re khyad' yu mung: yao: bam lhaung" na: je" qu" ko" ru we' dakhyo: na: je: nhao nae".

⁹Yao: bam re ngoyang byumyu" qe: phaung gaung: khyo khe' sin" pye' va" ru ngadqere: yao: bam wa mug: va mae na yang: ngore myid: beim" li" genae". Yao: bam we' yao: bam: myid:zo: qe wa mashid na: dang mung: daga" za: yham phao: lo: li" genae".

¹⁰Ngo wa yao: bam re Egutu we' Asuri mae" yham khyo jhui" yu nae". Aimung: yao: bam re yao: bam: mung" mae te" na nhao nae" Ngo wa yao: bam re Gilead we' Lebanon mae re: te" na nhao nae". Damung" geim" mae byu za: byang" byaug nae".

¹¹Yao: bam qug: khai: panglai: khyo" lai: phyid' lo" re ngo ASANG wa bang: lhung" jham re be; ke' nae". Aimung: Nila gyaung: mo" tham: kao" wa kin" lo" byaug nae". Ngad beim" ra" Asuri wa deim" khyo" pye' ru qhug' nae"- Aimung: qam: bo: ra" Egutu wa yao" kheim: so' baui" byaug: lo" li" nae".

¹²Ngo wa nga" byumyu" re qam: bo: nhao nae". Aimung: yao: bam wa ngore caung:pa" mung: phug' cao" li" genae"- ga: ta" ra". ASANG ta" to" ava".