Read Maru ZEKHARI 12 Bible Online

ZEKHARI 12 - Maru bible

ZEKHARI 12

¹Ceru wa Israel qhid' mae" byid' ke' ra" mug:gaung re phyid: lhu to: myidgaung re phan" phaug' to: mung: byu re kao so' byid' ra" ASANG mae" mungdao: ngad: ra".

²Ngo wa Yerusalem re sabyi qang: dakeim we' dakhyo: kad' nae". Avai: ayae mae" byumyu" qe wa aire shaug' mung: yhid yid yaug we' dakhyo: su" gyang: be; lhau genae". Aimung: yao: bam Yerusalem re li" vang" to: ko" au: re Yuda mae" dang: ra" vomo" gatau: gu: re vang" to" ru qhug' li" genae".

³Ngadqere: ai: ayo, joe" li" re ngo wa Yerusalem re la" ra" laug zang ru: boe" nhao nae"- aire tau: pye' nae" ga: phin" ra" byumyu" khomyu" ngadqere: dae qhug' zo" li" genae". Mug: myid mae" byumyu" alhab' wa yao: re khe' zin: nae" qhid' mae" gyetab qam: qhan" li" genae".

⁴Ai: ayo, re ngo wa yao: bam: myao: jham re kyaug' tin" ke' mung: yao: bam: myao: zaung mo, alhab' re byolae" mung: ko" byaug: nhao nae". Ngo wa Yuda byu qe: dao mae lhaug' zaung" na nae". Ngadqere: yao: bam: gyevo qe: myao: jham re myo, jid nhao: pye' byid: nae".

⁵Ailao" Yuda kaung mae" mo, wa yao: bam yao" gaung re- Qam: so' bo: thao" ASANG: Mao"So wa Yerusalem mae na: ra" yao" byumyu" qere qam: byid' ra"- ga: ta" li" genae".

⁶Ai: ayo, mae ngo wa Yuda kaung gu: re seyo mae" myi: mangad: lao" gaug mhang" yo mae" myi: we' dakhyo: boe" nhao nae". Yao: bam wa avai: ayae mae" byumyu" alhab' re phyo' qheim" pye' li" genae". Yerusalem mae" vobyu qe wa yao: bam yao" vomo" khug mae gug: gam za: qo" na: jo, li" genae".

⁷Ngo ASANG yao: Yuda gyetab jham re shi" sao qhid' aung doe, qo" nhao nae"- aimung: Davi nho: myid:zo: qe we' Yerusalem vobyu qe qo" yu: nae" ra" nga: lho" ru wa Yuda mae" gatau dang mo, qo" yu: ra" nga: lho" ru tho' maje nhao nae".

⁸Ai: ayo mae ASANG wa Yerusalem mae na mo, re gug: gam byid: nae"- aimung: yao: bam mae" qam: nang" thao" yaug lhao" re: Davi we' dakhyo: qam: bo: lo: li" nae". Davi nho: myid:zo: qe wa ASANG: mug: lagyo: we' dakhyo: Mao"So yao: yao: we' dakhyo: yao: bam re khyo qhid' au: she: li" genae".

⁹Ai: ayo, mae Yerusalem re khe' zin: nae" phin" ra" byumyu" khao: ngo" re ngo: yang phyo' qheim" pye' nae".

¹⁰Ngo wa Davi nho: myid:zo: qere we' Yerusalem vobyu gatau qere re: nhag' khyag' ra" myid qam: we' akyu" mho' ra" myid qam: ke' pyang" byid: nae". Yao: bam wa yao: bam: yang thug' se' pye' yaug re qu" mung: zote: zo: qhid' mae" kaug' ruru: kaug' ngug: li" genae". Yao: bam wa zoqhid' shid: pye' ra" shid' tao we' dakhyo: alokho: sho' kaug' ngug: li" genae".

¹¹Ai: ayo, mae Yerusalem mae kaug' ngug: ru wa Megido jao: dae mae Hadadrimon qhid' mae" kaug' ngug: ru we' dakhyo: dae xo: li" nae".

¹²Ai: mug: mae" yham khaung kaung khao: ngo" Davi mae" gyo" lo: ra" kaung- Nathan mae" gyo" lo: ra" kaung- Levi mae" gyo" lo: ra" kaung- Shimi mae" gyo" lo: ra" kaung we' gatau: kaung yham khaung alhab' wa yao: yaug yao: kaug' ngug: li" genae". Byumyu" kaung khao: ngo" wa yao: yao" kaung khyo" kaug' ngug: li" genae". Aimung: kaung khao: ngo" mae" yauggai qe gatau- myiqe: qe gatau jho" kho' yang:- yao: tau yao: kaug' ngug: li" genae".