Read Maru ZEKHARI 14 Bible Online

ZEKHARI 14 - Maru bible

ZEKHARI 14

¹ASANG dao: kho' nae" qhid' mae" li" zaung nae" ba na wa jhao" li" na va". Ai: ayo, re Yerusalem wa lhad' phyo' zo" pye' ru qhug' li" nae". The' lhad' yu: ra" lanyab re naonhaung" myo,nho mae yao: jho" gae: yu: pye' li" genae".

²ASANG: wa Yerusalem re mang: ceim" zin: nae" qhid' mae" byumyu" mung"dan: alhab' re zhang: qham: to" li" nae". Vomo" re lhad' sang: yu: pye' byid' li" genae"- yham jham rere: lhad' phyo' yu: pye' li" genae"- myiqe: qere ceim" roe" pye' genae". Vobyu agaung: dano" gu: wa taung bug: mug: khyo pyaung" lo" pye' ru qhug' genae". Ngadqere: dang: ra" mo, re wa ai: vomo" mae" majhui" lo" genae".

³ASANG wa thug' ye: mung: qhid' phyao: lhaung" kad' ru we' dakhyo: ai: byumyu" mung"dan: jham re khe' zin" li" nae". Ailao" zhanlun bam wa ba thug' shad' mae" ba vao shad' jao: sho' lao: khaung: aqi: dalam" yang shid' dau kho' khyo" pye' ru qhug' nae". Bam dakhyae: agaung: kho' wa mug: am: shad' khyo qui" lo" byaug mung: dakhyae: wa mug: thao shad' khyo qui" lo" byaug nae".

⁴Ai: ayo, mae yao: wa Yerusalem mae" ba thug' shad' zhanlun bam dao mae ye; jo; li" nae". Ailao" zhanlun bam wa ba thug' shad' mae" ba vao shad' jao: sho' lao: khaung: aqi: dalam" yang shid' dau kho' khyo" pye' ru qhug' nae". Bam dakhyae: agaung: kho' ru wa mug: am: shad' khyo qui" lo" mung: agaung: kho' gu: wa mug: thao shad' khyo qui" lo" li" nae".

⁵Naonhaung" wa ai: bam re shid' dau kho' khyo" pye' ra" lao: khaung: khyo" phao: loe; lo" li" genae". Naonhaung" wa Yuda mug: mae" Uzia kho:kham ayo, mae myid lab: lab' au: re naonhaung" nho: phug' phyid' qe phao: ru we' dakhyo: phao: li" genae". Nga" Mao"So ASANG wa mug: lagyo: alhab' re jhui: mung: li" li" nae".

⁶Ailao" ayo, joe" lo: re gyo, re: magyo, lo nae"- gyu: re: magyo" lo nae".

⁷Mug: cad' ein: rure: majo, lo nae" khonhae" re na" gaung: bo" bao za: jo; jo; nae". Myi" ayo, re lao" re mug: bo" jo; nae". Ceru: khonhae" boe" lo nae" ga" rure ASANG za: aba: ra".

⁸Ai: ayo, joe" lo: re Yerusalem mae kao so' qid yug: thug' li" mung: aimae" agaung: dano" gu: wa tham: shid khyo yug: vao lo" nae". Gatau agaung: dano" wa Mug:gaung: panglai: khug khyo yug: vao: lo" li" nae". Aiwa kyaug' ho yo, we' jhug' ra" ayo, mae re: dazin: geim" yug: na: li" nae".

⁹Ailao" ASANG wa myidgaung alhab' dao mae kho:kham boe" li" nae" yaug khao: ngo" wa yao: re Mao"So khyo" caung:pa" mung: ai: yao" mang khyo" yang yao: yao: re ba: li" genae".

¹⁰Mug: am: shad' Geba mae" mug: thao shad' Rimmon joe" sho' damang: geim" re dau" tae" pye' li" genae". Yerusalem wa yao" avai: ayae mae" mug:myid atho' mae gyebyu zaung ru: ngad: jo; li" nae". Ai: vomo" wa Benyamin kham: mo" mae" sao qhid' kham: mo" dalam: jo; lai: lo: ra" jo, qo vokhyug jheim kham: mo" joe" sho'- aimung: Hanane gyebyu zaung mae" kho:kham sabyi xam jao: joe" sho' jo; qi" lo" nae".

¹¹Vobyu qe wa- ai: jo, qo mae phyo' qheim" ruyang kyaug' tin" ru maqhug' lo: gug: gam taung" qo" na: li" genae".

¹²ASANG wa- Yerusalem re gyekhe' ra" byumyu" mung"dan: alhab' dao mae gyaug ci" ja: no phyo: nhao: ke' byid' li" nae". Yao: bam: gaung: sho: wa yao: bam daui: na shi" au: mae" bab: lo" li" genae". Yao: bam: myo,jid' jham we' sho jham wa bab: byaug: li" genae".

¹³Ai: ayo, mae ASANG wa yao: bam re sad' naug byaug nhao mung: yaug khao: ngo" yao" nhae mae" byu re taung" yu mung: khe' zin" li" nae" laug ga: yao: bam re myid: gyaug nhao nae".

¹⁴Yuda byu qe wa Yerusalem re gug:gam byid: nae" qhid' mae" mang: zin" li" genae". Yao: bam wa byumyu" mung"dan: jham mae" jo,nho" jham qhang- ngaui we' mai bau: magan: mago" abam azao re lanyab khyo" sham" tai: yu: pye' li" genae".

¹⁵Gyevo qenho: zaung jham mae" myao: jham- myao: myhi" jham gola:u jham we' loze jham gug'nyhug' alhab' dao mae gyaug ci" ja: no phyo: gyo" joe" nae".

¹⁶Ai: au: re wa- Yerusalem re khe' zin: mo, mae" mashid na: dang mo, alhab' qam: so' bo: thao" ra" ASANG re kho:kham khyo" caung:pa" nae" qhid' mae" we' zaung poe yekad' nae" qhid' mae" Yerusalem khyo dazin dalhang ye" li" genae".

¹⁷Mung"dan: dalam: qe- qam: so' bo: thao" ra" ASANG re kho:kham khyo" maye: caung:pa" gengad: re yao: bam: mug:myid mae mug: maqu nae".

¹⁸Egutu byu qe wa zaung poe makad' qad ko" ngad: re- manug ye" ra" gatau: mung"dan: jham re de, zo: nhao: ra" no phyo" yang yao: bam re qam" no de, zo: nhao nae".

¹⁹Ceru wa yao: bam re qam" no de, zo: nhao nae". Zaung poe makad' qad gelao" gatau mung"dan: alhab' we' Egutu mung" dao mae gyo" zao" nae" ra" qobo dae ngad: ra".

²⁰Ai: ayo, mae wa- myao: jhu jham mae" lao" re ASANG: qhid' mae" qhaug' to" ru ga: mugsug' tung" te' to" li" genae". Caung:pa" Yham mae" zo-ug' jham re: phan qhid' kheim: mae" jarung: jham we' dakhyo: gyang" lho" li" genae".

²¹Yerusalem we' Yuda mung" geim" mae" zo-ug' lam: khao: ngo" rere: qam:so' bo: thao" ra" ASANG re caung:pa" rumae ci nae" qhid' mae" ga: gatau kho' jaung: to" li" genae". Xeim: ngaui" byid: mo, wa aijham re ci yhung: mung: xeim: sho: ngaui" xeim: jham re jho' li" genae". Ai: ayo, joe" lo: re- qam: so' bo: ra" ASANG: Caung:pa" Yham mae aung: zo: aung: shaug' ru dayaug re: mana lo: genae".