Read Maru ZEKHARI 2 Bible Online

ZEKHARI 2 - Maru bible

ZEKHARI 2

¹Qhu" lho gatau dalam: mae byu dayaug wa yao" lo, mae ka" taui: dalam: ci: rure ngo myao:-

²Nao khai: khyo ye: nae" ein: yao: re ngo myid'- Yao: wa Yerusalem khoqhang" qhang mung: khoqhi" lae: rure yeka" nae"- ga: tau" ra".

³Ailao" ngore jhau: ra" mug: lagyo: wa qhid' khyo bye ce" ye: mung: mug: lagyo: gayaug wa yao: re li" qhug' ra".

⁴Sao qhid' mae" mug: lagyo: wa thao mae" yaug re- Ai: ka" taui: ci: ra" zolau: jhao" tao" ye: mung: Yerusalem mae khyae makyae" lo: sho' byu jham we' gug'nyhug' nung: kyaung" cad' kyaung" myo" li" nae".

⁵Aire gug:gam byid: nae" ASANG yao: wa ai: vomo" re lhang" kham" gug: gam: to" ra" myi: vang boe" mung: yao: wa aimae yao" phungbao alhab' we' na: jo, nae" ga: dao:so: byid' to" ra".

⁶ASANG wa yao" byumyu" qere- Naonhaung" re ngo: yang khyi" khao: ngo" khyo pyo: sin" pye' va". Ngadqere: ana" wa naonhaung" phao: sin" lo" mo, Babelon mae" loe; lo mung: Yerusalem khyo tug' lo ge,.

⁸Naonhaung" re be, mo, wa nga" qhid' mae" phug' de; thao" rure be; zao" ako"- ga: ta" ra". Aimung: Qam: so' bo: thao" ra" ASANG wa yao" byumyu" qere phyo' zo" ra" byumyu" qejhao" ce: lau dao: ciye: nae" qhid' mae" ngore nhao: ke' ra".

⁹ASANG yao: naonhaung" qhid' mae" gye khe' byid: nae". Aimung: qhid' phyao: dalhang naonhaung" nho: daui daui o kaung boe" lai: lo mo, yang naonhaung" re phyo' zo" pye' li" genae" ga" ru ngad:. Ceru: boe" lo: ra" au: re qam: so' bo: thao" ra" ASANG: yang ngore nhao: ke' ra" khyo re yaug khao: ngo" ba: lo: li" genae".

¹⁰ASANG wa- Yerusalem byu qe we"- ngaui bau: ngaui lho" nghaui"caung: caung: ge, ngo wa naonhaung" phaung gaung: mae li" na nae" qhid' mae" li" na va"- ga: ta" ra".

¹¹Ai: ayo, mae byumyu" myo: sho' wa ASANG jhao" li" mung: yao" byumyu" boe" lo: li" genae". Yao: wa naonhaung" phaung gaung mae na mung: yao" yang ngore naonhaung" jhao" nhao: ke' byid' rure naonhaung" ba: li" genae".

¹²Yuda wa ASANG: nho: gyang" lho" ra" mug:myid mae gakai: lai phug' de; ra" ASANG: jo,nho" dam: boe" lo mung:- Yerusalem wa yao: jhid'de; thao" ra" mo, nho: vomo" boe" lo: li" nae".

¹³ASANG wa yao" nho: gyang" lho" ra" na jao: mae" li" rumung: yaug khao: ngo" wa yao" qhid' kheim: mae sae za: tae" jo, ge,.