Read Maru ZEKHARI 3 Bible Online

ZEKHARI 3 - Maru bible

ZEKHARI 3

¹Qhu" lho gatau dalam: mae ASANG wa- ASANG: mug: lagyo: nho: qhid' kheim: Khinjaung Yin" Yoshu nho: nhae mae Satan ye; jo, mung: yao: re qobo zhaug' nae" jin" jin" seim" na: ra".

²ASANG: lagyo: wa satan re- satan we"- ASANG: yang nao re dao: phyid' vashao:- satan we"- Yerusalem re jhid'de; ra" ASANG wa nao re dao: phyid' vashao:- ceyaug wa myi:khyeim" mae" she: to" ra" myi: baui" we' dakhyo: ngad: ra".

³Yoshu wa mai bau: jad ve, mung: aimae ye; jo; ra".

⁴Mug: lagyo: wa yao" nho: mug:gaung mae" bao" thaug' mo, re- ceyaug ve; ci: ra" abe, alham: mai bau: jham re khyad' yu: pye' byid: ge,- ga: ta" ra". Aimung: Yoshu re- Ni" qobo re ngo yu: pye' byid: va". Aimung: nao ve, nae" qhid' mae" mai bau: asag' nao re byid: nae" ga: ta" ra".

⁵Yao: wa bao" thaug' mo, re Yoshu nho: au: mae yaung" san: au: thab' thab' byid: nhao: ra". Yao: bam re: airu: thab' byid: mung: ASANG: mug: lagyo: aimae ye; jo, ra" au: yao: re mai bau: asag' vhe' byid' ako".

⁶Aimung: mug: lagyo: wa Yoshu re Qam: so' bo: ra" Mao"So ASANG ceru: ga: ta" ra"- ga: ta" kyo" ra". Nao qe nga" tarha" dao: jham re phug' cao" mung: ngo: yang nao re byid' to" ra" mau" re zaui: so" ngad: re wa nga" Caung:pa" Yham we' ai: vang" re qu" caung nae" mau" nao re ngo xo' byid: nae"- nga" qhid' kheim: mae" mug: lagyo: qenho: akyu" mho' dao: re ngo gyo: byid' ru we' dakhyo: ni" nho: akyu" mho' dao: re gyo: byid: nae".

⁸Aimung: Khinjaung Yin" ngad: ra" Yoshu we"- tae" gyo: wa,- Naonhaung" wa Yoshu nho: Khinjaung byin cao: qe we"- Tae" gyo: ge,. Naonhaung" wa joe" lo nae" ayo, mae gai: ra" aso: ngad: ako". Akaung ga: mhang" ra" nga" daui daui yaug re ngo qhu" byid: nae".

⁹Ngo wa Yoshu nho: qhid' kheim: mae myo, nho nhad' shad' de; ra" laug zang dalam: to" to: byid: nae". Ngo wa ai: dao mae mugsug' ce' tung" te' to: mung: daba khug mae za: ce: mug: mae" qobo alhab' re yu: pye' byid: nae".

¹⁰Ai: ba na joe" li" au: re- naonhaung" mae" yaug khao: ngo" wa yao: yao" yham kyo: cao: re khai: zhang: mung: naonhaung" nho: sabyi yo we' pho' ham" shi: yo lhang" gam" ra" jo, qo mae yaug yo cae: tae" ru we' gug:gam: ru kham zo" li" genae".