Read Maru ZEKHARI 4 Bible Online

ZEKHARI 4 - Maru bible

ZEKHARI 4

¹Ngo re jhau: lo: ra" mug: lagyo: wa ngo jhao" dam: li" mung: ngore yab: myhid' jo, nhohab li" nhug' to" ke' ra".

²Yao: wa ngore- nao pe" the' myao: i? ga: myid' ra". Ngo wa qhang: yang kad' to" ra" myikaug' tao" re the' myao: ai: aau: mae xau ke' nae" khug' de; ra". Tao" mae myikaug' nhad' lam: jo, mung: lam: khao: ngo" mae myi: zo nhad' khe' khe' de; ra".

³Myi: kaug' tao" ayae dashad' mae dagae gae zhanlun gae shid' gae jo; ra" ein: tau" ra".

⁴Ailao" ngo wa mug: lagyo: re- asang we"- ce: jham wa pe" ga: nug: ru ngad: i? ein: myid:.

⁵Yao: wa ngore - Nao maba i? ga: myid' ra". Ngo wa asang we" ngo maba ein: phaug' tau" ra".

¹⁰Mug: lagyo: wa ngore- myikaug' nhad' lam: wa myidgaung re myao: ra" ASANG: myo, jid' nhad' jid' ngad: ra"- ga: ta" ra". (abang: ngai 10(b) we' 14 re cemae qhui" ke' to" ru wa- mhomyi: adai: ato' jo, nae" qhid' mae" qhui" ke' to" ru ngad:) a. Dajhid' za: kad' boe" to" ruyang yao: bam wa nhag' lam: thao" ako". Ngadqere: Zerubabela wa Caung:pa" Yham re xo' kad' ru the' myao: li" genae" ailao" yao: bam wa ngaui bau" li" genae".

¹¹Ailao" ngo wa yao: re- myikaug' thoeshad' ceshad' mae" zhanlun gae shid' gae wa pe" lajheim: i?

¹²Aimung: zhanlun xau yug: gyo" na: ra" akhug bung" ra" qhang khyaung: shid' lam: nhae mae" zhanlun kaung shid' kaung wa pe" lajheim: i?- ein: myid' ra".

¹³Yao: wa ngore- nao maba i? ga: myid' ra". Ngo wa asang we"- ngo maba ein: tau: va".

¹⁴Ailao" yao: wa- cejham wa myidgaung geim" nho: Mao"So ASANG: yang khyin: to: mung: yao: re caung: da" byid nae" qhid' mae" xau gyad byid' to" ra" byu shid' zo: ngad: ako"- ga: ta" ra". Zerubabela Re Byid' Ra" Mao"So: Dao:So: Mug: lagyo: wa ASANG mae" ce: lau dao: re ngo: yang Zerubabela re ta" kyo: byid: nae" qhid' mae" ngore ta" ra". Nao wa gyetab khyo" re: naoyao" qam: khyo" re: aung doe nae" mangad: nga" nho: byo khyo" za: aung doe; li" nae". Bam jham ru: qi" ra" akham" alhaung" jham wa ni" qhid' kheim: mae" byaug: lo" li" genae". Nao wa Caung:pa" Yham re dam: zhaug' li" nae". Aimung: nao: yang lo" thao" laugbaui re kai" ke' ra" au: re mo, byu qe wa yaung" va" lhe"- yaung" va" lhe" ga: hug' li" genae"- ga: ta" ra". ASANG: mae" mungdao: gatau dalam: ngo jhao" joe" li" ra". Yao: wa Zerubabela wa Caung:pa" Yham apan aqao: kyae: to" ava"- aimung: yao: wa ai: yham re kad' pin" li" nae". Ceru: boe" lao" yao: bam jhao" nao re nhao: ke' yaug wa ngo ngad rure nga" byu qe ba: li" genae".