Read Maru ZEKHARI 6 Bible Online

ZEKHARI 6 - Maru bible

ZEKHARI 6

¹Ngo wa qhu" lho gatau dalam: the' yu:- Celhang wa gyid: bam shid' bam: agyo: mae" myao: lhin" byid lam: thug' li" ru the' myao:-

²Sao Qhid' dalam: ein: ra" myao: lhin" re myao: ne jham: yang she: ako". Shid' lam: ein: ra" myao: lhin" re wa myao: no, jham: yang she: ako".

³Sam lam: ein: ra" myao: lhin" re wa myao: phyu jham: yang she: ako". Aimung: byid lam: ein: ra" lam: re wa myao: ataug' jham yang she: ako".

⁴Ailao" ngo wa mug: lagyo: re asang we"- Ce: myao: lhin" jham wa pe" re ta" nug: ru ngad ko" laug i? ein: myid'.

⁵Yao: wa- cejham wa la qam" byid lam: ngad: ako". Aijham wa myidgaung alhab' nho: ASANG: qhid' kheim: mae ana" mamyao" shire za: thug' lo: ru ngad: ako"- ga: ta" ra".

⁶Myao: no, jham: yang she: ra" myao: lhin" wa mug: am: shad' Babelon khyo lo" li" nae". Myao: phyu jham wa ba vao shad' khyo lo" li" genae". Myao: taug' jham wa mug: thao shad' mae" mung"dan: khyo lo" li" genae".

⁷Myao: taug' jham thug' li" ko" au: re yao: bam wa myidgaung khyo thug' ye: mung: jo" qu" nae" ga: phabau: phaxe' mung: ako". Mug: lagyo: wa- ye: mung: myidgaung re jo" qu" ge,- ga: ta" ra". Amung: yao: bam re: airu: kad' ako".

⁸Ailao" mug: lagyo: wa ngore mug: am: shad' mae" Babelon khyo ye" lo" ra" myao: jham wa ASANG: nho: nhag' yo" rure nhag' yo: gyo" nhao: ako"- ga: hug' ta" ra".

⁹ASANG wa ngore ce: lau dao: byid' ra".

¹⁰Yao: wa- Taungbug: mang: khyo joe" lo" ra" Heldai- Tobiya we' Yedaia bam byid' ra" jhaung qhu" re yu wa,- Aimung: Zephani nho: yauggai zo: Yoshia yham khyo dalhang: dae khyao: za: ye: wa, cebam alhab' wa Babelon mae pyaung" nha: to" ru mae" dam: tug' lo: avako".

¹¹Yao: bam byid' ra" ngaui we' qhang: yang ba maug: dalam: kad' wa,- aimung: Yehozadag nho: yauggai zo: Khinjaung Yin" Yoshu re zhaung: byid: wa,-

¹²Qam: so' bo: thao" ra" ASANG ta" ru we' dakhyo: Akaung ga: mang yaug wa yao: na: ra" jo, qo mae qi" qhang: li" mung: ASANG: Caung:pa" Yham re dam: zhaug' li" nae".

¹³Yao: wa ai: rure dam: zhaug' to: nae" yaug ngad mung: kho:kham: yang the' yu nae" man: qi" ra" nga: yhe' rure qo" yu: li" nae". Yao: wa yao" nho: byu qere eib: li" nae". Yao: nho: kho:kham tao" nhae mae khinjaung dayaug ye; jo; li" nae". Aimung: yao: tao wa yaug yo: ru we' nyang nyang za: daga" mau" ceim" zaui" li" genae".

¹⁴Ai: ba maug: wa ASANG: Caung:pa" Yham mae Heldai- Tobiya- Yedaia we' Yoshia bam re nga: yhe' ra" myid: beim: aso: boe" li" nae" ein: ta" wa,- ga: ta" ra".

¹⁵Mug: va: mae na: ra" yauggai qe wa zang" lo mung: ASANG: Caung:pa" Yham dam: bao" zhaug' li" genae". Aimung: aire dam: zhaug' au: re naonhaung" wa ASANG: yang ngore naonhaung" jhao" nhao: ke' rure ba: yu: li" genae". Naonhaung" nho: Mao"So ASANG: amyin" dao: jham re naonhaung" phug' cao" ko" ngad: re cegu: alhab' boe" lo: li" nae".