Read Maru ZEKHARI 8 Bible Online

ZEKHARI 8 - Maru bible

ZEKHARI 8

¹Qam: so' bo: thao" ra" ASANG dao:so: byid' ra". Zekharia re ce: lau dao: byid' ra".

²Israel nho: gyevo qere ngo nhag' yo: sho' boe" nhao: ra" jhid'de; myid: yang Yerusalem vobyu qere ngo jhid'de; ra" mathao mae Yerusalem re ngo bao" yu nae" qhid' mae" gyai myid: lao" lai: lo va".

³Ngo wa- nga" nho: gyang" lho" ra" vomo" Yerusalem khyo dam: tug' lo" mung: aimae na nae". Aiwa jhaug' zaug: ra" vomo" ga: ceim" ba: ru qhug' mung: qam: so' bo: thao" ra" ASANG: bam rere: gyang" lho" ra" bug gaung ga: ceim" mhang" ru qhug' nae".

⁴Saung" mao: mung: khyo su" au: re zaung: bao" ci yang: khyo su" qin" ca" ra" phug' mao:- phyid' mao: qe wa ai: vomo" shava jao: jham mae dalhang dam: zaung: jo; li" genae".

⁵Aimung: hau" mo" khyo jham mae re: yauggai nau"- myiqe: nau" qe khyo byang" sho' sab' jhi: na: li" genae".

⁶Ceru wa ana" na: dang: jo, ko" ra" byumyu" qe: qhid' mae" magai: boe" nhohab ngad: ra". Ngadqere: nga" qhid' mae" wa magai: boe" ru mangad:-

⁷Ngo wa nga byumyu" qere yao: bam re jhui" lo" ra" mug:myid jham mae" dam: khyad' khyui: yu nae".

⁸Aimung: yao: bam re Yerusalem mae na nae" qhid' mae" ba thug' shad' we' ba vao shad' mae" dam: jhui" tug' yu nae". Yao: bam wa nga" byumyu" boe" mung: ngo wa yao: bam: Mao"So ngad mung: yao: bam: dao mae jhaug' zaug: ru we' tarha" din: nyang: ra" khyo" eib: na nae".

⁹Qam: dashan ge,- Ana" naonhaung" wa nga" Caung:pa" Yham apan aqao: te: mung: dam: zhaug' lo" ra" au: re lapa jham ta" ra" dao: jham re ana" naonhaung" the' gyo" na: ako".

¹⁰Ai: ayo, majoe" shire wa byu rere: gug'nyhug' rere: khag' yang okaung maqo" lhaung: ci ngad: ako". Khag' dayaug re: yao" gyevo jham mae" maqo" gug:gam ngad: ako". Ngo wa byumyu" qe re yao: cao: gye tug' kad' nhao va".

¹¹Ngadqere: ana" wa ce: byumyu" mae" na: dang mo, re ngo: yang gaja: khyo" dam: zam" khug va".

¹²Yao: bam wa yao: bam: gaug zo jham re yaug yo cae tae" ra" khyo" qo" qho: genae". Yao: bam: sabyi naui jham wa sabyi shi: zaui: genae". Myidgaung wa qhovo: qhoshi: jham re thug' nhao mung: mug: qid magan: mago" qo" li" genae". Na: dang ko" ra" nga" byumyu" qere ce: shaman" jeju alhab' ngo byid: nae".

¹³Yuda byu qe we' Israel byu qe we"- lai: lo va" ayo, mae taung bug byu qe wa yao: cao: yao: ceru: ga: ta" mung: lhaung" jho" nhang" ako". Yuda we' Israel mae gyo" zao" ra" kyi" khyag' ru yao: ni" dao mae gyo" zao" vashao wo"- ga: ta" yang: yao: cao: lhaung" jho" nhang" ako". Ngadqere: ngo wa naonhaung" re khyad' yu nae". Aimung: taung bug: byu qe wa yao: cao: yao: Yuda we' Israel the' yu: ra" shaman" jeju yao: nao re: the' yu vashao: wo"- ga: yao: cao: jho" ta" li" genae". Aimung: qam: dashan ge,- gyaug re: dagyaug ge,.

¹⁴Qam: so' bo: thao" ra" ASANG wa- naonhaung" nho: phug' pho" qeyang ngore nhag' yo: nhao ko" au: re ngo wa yao: bam qhid' mae" qug: khai: kyi" khyag' nyhang" yaung: to: byid: mung: nga" nhag' lam: re malhai: lo: ngo yaung: to" ra" nga" mau" zo" re boe" sho' kad' lo:-

¹⁵Ngadqere: ana" ngo wa Yerusalem we' Yuda vobyu qere shaman" byid: nae" seim" na aimung: Dagyaug ge,.

¹⁶Cegu: wa naonhaung" kad' ang: ra" khyo jham ngad: ra". Aijham wa naonhaung" yao: cao: dangman" ra" dao: jho" jhau ge,- tarha" yung" jham mae gaigai: yao: yaug yao cae: tae" ru boe" nhao: ra" tarha" din: nyang: ru kad' ge,.

¹⁷Yao: cao: dae jho" te' nae" ra" khyo jham re dayaung: na ge,- jham tang: mung: mhug' ra" sagse: dakham ge,. Ngo wa mhug' ru matarha" ru we' aqan alan mau" re nghang" ra"- ga: ta" ru ngad: ra".

¹⁸Qam: so' bo: thao" ra" ASANG wa Zekharia re ce: mungdao: byid' ra".

¹⁹Lho" byid khye'- ngo" khye'- nhad' khye' we' daxe khye' ein: khye' mae kad' ra" zo:ve jao" ru wa Yuda vobyu qe: qhid' mae" ngaui bau: ngaui lho" poe boe" lo: genae". Naonhaung" wa dangman" ru we' yaug yo cae: tae" rure jhid'de; ca" ako"- ga" ra" mungdao: ngad: ra".

²⁰Qam: so' bo: thao" ra" ASANG wa Vomo" myo: sho' mae" byu qe Yerusalem khyo zang" li" nae" ayo, joe" lo: na va".

²¹Vomo" dalam: mae" vobyu qe wa gatau: vomo" dalam: mae" mo, re- Ngonhaung" wa qam: so' bo: thao" ra" ASANG re yecaung:pa" mung: yao" shaman" jeju re yemho' bam nae". Ngonhaung" we' daga" cao" li" ge,- ga: jho" ta" li" genae".

²²Byumyu" myo: sho' we' qam: bo: ra" amyu" mung"dan: jham wa qam: so' bo: thao" ra" ASANG re caung:pa" mung: yao" shaman" jeju re mho' nae" qhid' mae" Yerusalem khyo zang" li" li" genae".

²³Ai: ayo, mae taungbug: byu daxe yaug wa Yuda byu dayaug jhao" li" mung: Mao"So wa naonhaung" we' daga" na: ga" ru ngonhaung" the' gyo: va" ruyang naonhaung" we' daga" ngonhaung" re: bobo nug: ga: ta" li" genae"- ga: ta" ra".