Read Maru ZEKHARI 9 Bible Online

ZEKHARI 9 - Maru bible

ZEKHARI 9

¹Ce: wa ASANG: mungdao: ngad: ra". Yao: wa Hadrag mug: we' Damasku vomo" qhid mae" qobo dae khyo" ke' byid' ava". ASANG wa Israel byumyu" kaung re za: mangad: Suri mung" mae" vomo" rere: sang: ra".

²Hadrag we' mug: kyo: kyo" ra" Hamad rere: yao" yang sang: ra". Ai we' dakhyo: Ture we' Sidon vomo" re yao: shid' vo: nho: laba lajhao alhab' we' daga" sang: ra".

³Ture wa yao: yao" qhid' mae" gug:gam nae" vang zhaug' yu mung: phalhug nho" myo" laug: ra" ngaui we' qhang re bam: to" ra".

⁴Ngadqere: yao: qo" ru ja: khao: ngo" re ASANG: yang yu: pye' byid' li" nae". Yao" jo,nho" re panglai: khug khyo pye' zaui: pye' byid' li" nae". Aimung vomo" rere: myidgaung khyo nga" gyo" mung: myimhab bam kad' pye' li" nae".

⁵Ashkelon vomo" wa ceru re the' myao mung: gyaug: li" nae". Gaza vomo" wa aire the' myao mung: qi: sho' dayin dayo: no kham zo" li" nae". Ekron re: ai we' dakhyo: boe" mung: yao" myid: lao" ru jham wa byo: sin" lo" li" genae". Gaza wa yao" kho:kham re ci: phyaug' pye' li" nae". Ashkelon wa cae: jhug tag shapye' to" ru qhug' nae".

⁶Byumyu" sa: lhag' mo, wa Ashdod mae na: li" genae". ASANG wa- ngad beim" ra" ai: Philisti byu alhab' re ngo nyham: khyo" pye' nae".

⁷Yao: bam wa sa: bo: ra" sho: re mazo: genae"- kham" to" ra" zo:ve gatau rere: mazo: lo: genae". Mashid na: dang: gyo" mo, alhab' wa nga" byumyu" boboe" lo mung: Yuda kaung we' dakhyo: boe" lo genae". Ekron wa Yebusi qe we' dakhyo: nga" byumyu" boboe" lo: li" genae".

⁸Ngo wa nga" mug:myid re lhaug' zaung" na mung: ai:khyo" khag' gyetab qere: maqo" lai: ye: sho' kad' nae" qam: jam" yang deim" zag zo: mo, yang nga" byumyu" re mazag zo: nhao lo nae". Nga" byumyu" qe qug: khai: khoru: kham zo" lai: lo ko" rure ngo myao va"- ga: ta" ra".

⁹Ngaui bau: ge,- Ngaui bau: ge,- Ziun vogaung: byu qe we"- Yerusalem vogaung: byu Naonhaung" we" Ngaui bau: taung" hug' yao ge,- Qu" ge, naonhaung" nho: kho:kham wa naonhaung" jhao" joe" li" na: ava". Yao: wa aung poe aung: myaug: ru we' joe" li" ra". Ngadqere: yao: wa nyham: khyo" ru we' loze dao mae ngad va"- Myao: nau"- loze nau" dadau: dao mae zaung: yang: li" ra".

¹⁰ASANG ta" ru wa- ngo wa Israel mae" gyekhe' myao: lhin" jham re yu: pye' mung: Yerusalem mae" myao: jham re yu: pye' byid: nae". Gyekhe' jao: mae ci: ra" lo, la: jham re khyug' pye' byid: nae". Naonhaung" nho: kho:kham wa byumyu" qe: phaung gaung: mae ngaui pyo: yaug yo: ru kad' li" nae". yao: wa panglai: dashad' mae" dashad' joe" sho' Uphrad qid gyaung: mae" re mug:myid thao" sho' eib: li" nae"- ga: ta" ra".

¹¹ASANG wa- ngaui" xeim: sa" yang dazid thaung" to" ra" naonhaung" we' nga" agyo: mae" dao: thang" ra" mathao mae ngo naonhaung" re loe; beim nhao nae". Qid mabo: ra" dung" gyan: ga" ra" pyaung" jhui: nha: to" ru mae" ngo naonhaung" re loe; beim nhao nae".

¹²Ana" myid: lao" khyo qo" yu: ra" taung bug: mang: mae ye byaung" na mo, we"- dam: tug' lo ge, Naonhaung" yao" gug:gam: ra" jo, qo khyo dam: tug' lo, geri:- Ana" ngo naonhaung" re ta" kyo: geli"- Naonhaung" kham zo" lo: gu: alhab' qhid' mae" shaman" jeju shid' zhao" naonhaung" re dam: tug' byid: nae".

¹³Ngo wa Yuda re gyezo: pho" nho: lo, la: we' dakhyo:- Israel re myo: jham we' dakhyo: ci nae"- Greeg byu qere khe' zin: nae" qhid' mae" Ziun vobyu qere shae pyang: we' dakhyo: ngo ci nae".

¹⁴ASANG wa yao" byumyu" qe: dao mae na: thug' li" nae". Yao: wa yao" myo: jham re lhe' cad' we' dakhyo: bag: ke' li" nae". Kho:kham ASANG wa labo" mad: ke' li" nae". Yao: wa mug: thao mae" la qam" khug mae su" lo: li" nae".

¹⁵Qam: so' bo: thao" ra" ASANG wa yao" byumyu" qere gug:gam byid: li" nae". Aimung: yao: bam wa yao: bam: gyevo qere phyo' qheim" pye' li" genae". Yao: bam wa gyekhe' jao: mae yhid yid: yaug we' dakhyo: hug' li" genae". Aimung: yao: bam: gyevo qe: sa: re sheim nhao: li" genae". Airu wa keim mae" ngaui" xeim: sa: re phan mae vhe' sheim" ruru: yug: li" nae".

¹⁶Ai: ba na joe" lo: re yao zaung" yaug wa yao" yao kyaung" re gyaug ci" ja: mae" khyad' yu: ru we' dakhyo: ASANG wa yao" byumyu" qere khyad' khyui: yu: li" nae". Yao: bam wa yao" mug:myid mae- ba maug: mae" laugsin" jham we' dakhyo: bao: li" genae".

¹⁷Ai: mug: wa khonho" gai: ru we' yaung" lho" nae" laug i? Ve, qae" qe wa ai: mug: mae" gaug zo we' sabyi qang: zo: shaug' mung: na: qi: na: qhang: li" genae".