Read Maru MALAKHI 1 Bible Online

MALAKHI 1 - Maru bible

MALAKHI 1

¹Ce: wa Israel byumyu" qere ta" kyo: nae" qhid' mae" Malakhi re- ASANG: yang byid' ra" mungdao: ngad: ra".

²Naonhaung" re ngo khonhae" re: jhid'de; na: ra" ga: ASANG wa yao" byumyu" re ta" ra". Ngadqere: yao: bam wa ni" jhid'de; myid ngonhaung" re khoru: qhu" byid: va" i? ga: phaug' tau" ako". ASANG tau" ru wa Eso we' Yaku wa yao: nhae tao ngadqere: Yaku we' yao" myid:zo: qere ngo jhid'de; mung:-

³Eso we' yao" myid:zo: qere wa nghang" ra". Ngo wa Eso na: ra" bam mug: re cae: jhug tag boe" nhao: pye' mung: ai: mug: re zag ne jham: qhid' mae" ngo shapye' to: byid: va".

⁴Eso nho: myid:zo: Edom byumyu" qe wa ngonhaung" nho: vogaung: jham re phyo' sin" pye' qhug' va". Ngadqere: dam: te: nae" ga: ta" ko" re ASANG wa yao: bam dam: te: geshao: ngoyang dam: phyo' sin" pye' byid: nae"- ga: phaug' tau" li" nae". Byu qeyang- makhyang" ra" mung"dan:- ASANG: yang apyad ato nhag' yo" ra" byumyu" mung"dan: ga: ceim" mhang" li" genae".

⁵Cerumung: rure Israel byumyu" qe wa yao: bam yao" myo; yang the' myao: li" genae". Amung: yao: bam wa Israel mug: myid: taung gaung mae lhao" re: ASANG wa qam: so' thin: ra" ga: ta" li" genae".

⁶Qam: so' qi" ra" ASANG wa- khinjaung qere- Yauggai zo: dayaug wa yao: pho" re nga: yhe' ra". Daui daui yaug wa yao" yham sang re nga: yhe' ra". Ngo wa naonhaung" yao: pho" ngad:- ai re naonhaung" wa pe" mung: ngo re nga: mayhe' ko" i? Ngo wa naonhaung" asang ngad:- aire naonhaung" pe" mung: maphug' ko" i? Naonhaung" wa ngo re maphug' makhyad' kad' mung: nao re ngonhaung" khoru: maphug' makhyad' kad' na: i? ga: myid' ako".

⁷Ceru: kad' ako"- naonhaung" wa pe" phug' made; ra" zo:ve re nga" phan dao mae qhaug' byid' ako". Aimung: naonhaung" wa- nao re phug' myao: nae" khyo re ngonhaung" khoru: nghung: vako" laug i? ga: myid' ako". Naonhaung" re ngo ta" kyo: geli"- nga" xeim: ngaui" phan re maphug' makhyad' kad' ra" khyo" yang: maphug' makhyad' kad' ru ngad: ra".

⁸Naonhaung" wa ngo jhao" myo, jid: mangad: lao" no de; ru mangad: lao" khyid qeim: ra" gug'nyhug' jham re no: de; ra" gug'nyhug' ngad: la,- khyid gyug' ra" gug'nyhug' ngad: la,- xeim: ngaui" byid: nae" ga: ngo jhao" cili" ko" re pe" mashad' ein: myid ko" i? Mung" zug: dayaug re airu" ra" gug'nyhug' ye qhaug' byid' qu" ge,. Yao: wa naonhaung" re lham: qu" ngaui nae" i? Mangad: lao" naonhaung" o: rure kad' byid' li" nae" i?

⁹Ana" khinjaung qe naonhaung" we"- ngonhaung" re agai khyo" kad' byid: la, ein: Mao"So re mho' yu: qu" ge,- naonhaung" akyu" mho' thoe re yao" matau: byid: nae"- ai wa naonhaung" shad' ra" qobo ngad: li" nae".

¹⁰Qam: so' bo: thao" ra" ASANG ta" ru wa- naonhaung" mae" dayaug yaug Caung:pa" Yham kham: dung: ye: pyid' pye' mung: nga" phan dao mae akyu" mabo: ra" myi: maqo" te' genae" rure ngo myid: o: ra". Naonhaung" re ngo maqu" ngaui- ngo jhao" cili" ra" naonhaung" ngaui" xeim: jham re ngo malham: khae: yu: nae".

¹¹Mug: khothao" myid khothao" mae" byu qe wa- ngo re nga: yhe' byid' ako". Khyi" khao: ngo" mae yao: bam wa ngo re nae pyo: ja: ngha" byid: mung: khae: yu man" ra" xeim: jham re ngaui" byid' ako". Yao: bam alhab' mo, ngo re nga: yhe' byid' ako".

¹²Ngadqere: naonhaung" wa nga" phan re pe" phug' made, ga: ta" mung: ai: dao mae naonhaung" ma-o: ra" zo: shaug' re qhaug' byid' ra" khyo" yang ngo re maphug' ra" lo, mau" kad' ako".

¹³Cejham alhab' re ngonhaung" nghang: va" lhe"- ga: ta" ako". Naonhaung" wa ngo re nho nyhaung: qhu" avako". Naonhaung" wa khug' yu: ra" gug'nyhug' ngad: la,- khyid gyug' ra" gug'nyhug' ngad: la,- no de; ra" gug'nyhug' ngad: la,- ngo re ngaui" byid: nae" xeim: ga: cili" ako". Ai: rure ngo khae: yu: li" nae" ein: naonhaung" myid: jho ko" i?

¹⁴Ngo re byid: nae" ga: dao:so: to" ra" gug'nyhug' agai- yao: yao" gug'nyhug' phaung mae na: jo, mung: pe" phug' made; ra" gug'nyhug' re ngo jhao" xeim: ngaui" byid: nae" ga: mhug' pyag' cili" yaug wa nhang: kheim: zao" vashao:- pe"mung:ga"re ngo wa qi" qhang: ra" kho:kham ngad mung: mung"dan: alhab' mae" byumyu" cao jab wa ngo re gyaug: ako".