Read Maru MALAKHI 2 Bible Online

MALAKHI 2 - Maru bible

MALAKHI 2

¹Qam: so' bo: ra" ASANG wa khinjaung qere ceru: ga: ta" ra". Ce wa naonhaung" qhid' mae" amyin" ngad: ra".

²Naonhaung" kad' ra" mau" yang ngore nga: yhe' byid: ca" ako". Ngo ta" ra" dao: re naonhaung" matae" gyo: gere- ngo wa naonhaung" re nhang: kheim: ke' byid: nae". Naonhaung" ci yhung: nae" qhid' mae" qo" yu: to" ra" jo,nho" dao mae ngo nhang: kheim: ke' nae". Gaigai: ga" re ai jham re ngo yang nhang: kheim: ke' to: va". Pe"mung:ga"re naonhaung" wa nga" amyin" dao: re majang" ko" ngad: ra".

³Ngo wa naonhaung" yao: zo: qere qobo dae byid: mung: naonhaung" xeim: ngaui" byid' ra" gug'nyhug' jham: nho: khyid' bam mae naonhaung" nho: myo,khung: jham re deim" gyad nae". Amung: naonhaung" re gug'nyhug' khyid' bam khyo she: thug' pye' ru qhug' li" genae".

⁴Ailao" naonhaung" wa ce: amyin" dao: re ngoyang byid' to" ru ngad: rure naonhaung" ba: li" genae". Ailao" za: Levi myid:zo: qe ngad: ko" ra" khinjaung qe we' ngo ta" ra" nga" dao: thang" wa mabyo, nae".

⁵Nga" dao: thang" mae kao so' we' na: dai nae" khyo re dao: thang" ke' to: va". Ceru yao: bam re ngo byid' to" ru wa- yao: bam ngo re phug' myao: nae" qhid' mae" ngad: ra". Lai: lo va" ayo, ba na: gu: mae wa yao: bam ngo re phug' myao: mung: gyaug phug' avako".

⁶Yao: bam wa shad' rure mangad: lo: jo: rure mho" shid' ko" ra". Yao: bam wa ngo we' nge, nae" khyo" na ko" ra". Yao: bam wa yao: bam yao" gaung re din: man" ru kad' ru za: mangad:- byu gaje myo: sho' rere: makhyang" ra" mau" zo" re to" pye' nae" qhid' mae" bao" thaug' byid' ako".

⁷Khinjaung qe: qo wa- Mao"So: dangman" ra" laba lajhao re mho" shid' byid: nae" ru ngad: ra". Mo, byu qe wa yao: bam jhao" ye: mung: nga" myid o: ra" khyo re yao: bam jhao" yezhao: yu ang: ako". Pe"mung:ga"re- yao: bam wa qam: so' bo: ra" ASANG: nho: lagyo: jham ngad ako".

⁸Ngadqere: ana" khinjaung qe naonhaung" wa jo: ra" khyodang mae" khyonghung: nghung" lo" avako". Naonhaung" mho" shid' khyo wa byu myo: sho' re shad' nghung" ru kad' nhao: avako". Naonhaung" we' ngo to" ra" dao: thang" re naonhaung" phyo' pye' avako" ra".

⁹Aimung: naonhaung" re Israel byumyu" qeyang manug mung: ceim" nghang: genae" khyo ngo dam: kad' ke' nae". Pe"mung:ga"re naonhaung" wa nga" myid o: ra" khyo re macao" mung: mo, byu qere naonhaung" mho" shid' qere: dayaug we' dayaug re dakhyo: za: mamho" shid' byid: ngad: ako".

¹⁰Ngonhaung" alhab' yao: pho" dayaug za: qo" bam: mangad: i? Ngonhaung" alhab' re Mao"So dayaug: yang za: phan" to" mangad: i? Ai re ngonhaung" yao: cao: ngonhaung" nho: dao:so: re pe" mung: phyo' pye' yang: ngonhaung" nho: phug' phyid' bam we' Mao"So to: co' ra" dao: thang" re naonhaung" pe" mung: pe" xan: masun: kad' ko" i?

¹¹Yuda" mung" byu qe wa Mao"So re byid' to" ra" yao: bam: dao:so: re phyo' pye' avako". Amung: Yerusalem mae we' seyo: vogaung: alhab' qu" ca' qu" lhaung: sho' ra" mau" re kad' avako". Yao: bam wa ASANG jhid'de; ra" Caung:pa" Yham re masan masin" kad' pye' avako". Yauggai wa- taung bug: solho jham re caung:pa" ra" myiqe: qere lo, xo' yu: avako".

¹²Ceru: kad' mo, re ASANG wa Israel byumyu" phaung mae" phoe' pye' vashao:- aimung: yao: bam wa qam: so' bo: ra" ASANG re ngonhaung" yang xeim: jham ngaui" byid' ra" rumae khonhae" re: madam: bobo nhao lo: vashao:-

¹³Ce wa naonhaung" kad' ra" gatau: mau" daja: ngad: ra" naonhaung" yang yao: re cili" byid' ra" xeim re- yao" yang malham: khae: yu lo" ruyang naonhaung" gyi: ngug: ru kaug' ru we' ngug byid: yang ASANG: nho: phan re nhai" pye' ako".

¹⁴Nao wa ai: xeim: jham re yao: pe" mung: khonhae" re: malham: khae: yu: laug i? ga: myid' ra". Pe"mung:ga"re nao wa ve, qae" yo, mae lo, xo' to" ra" ni" yham sang myhi" dao mae byid' to" ra" dao:so: re phyo' pye' va" rure yao: ba: ra". Yao: wa ni" nho: gaung zam" cao: ngad mung: yao" dao mae dao:so: zaung nae" ga: Mao"So: qhid' kheim: mae nao dao:so: byid: to: sho' ngadqere: nao wa yao: re byid' to" ra" dao:so: re phyo' pye' ava".

¹⁵Mao"So wa nao we' yao: re dagaung dabyo za: kad' to" mangad: i? Ceru mae yao" myid: yaung: to" ru pe" ngad: i? Ai wa ni" shid' zo: wa Mao"So: yao: zo: gyang" qe ngad ko" ra" zoshao jham re khau: thug' ke' nae" ru ngad: ra". Airu: mung: khag' ngadqere: yao: yao" yham sang myhi" dao mae to" ra" dao:so: re maphyo' nae" qhid' mae" lha" ge,.

¹⁶Ngo wa myi: lao gao" ra" khyo re nghang" ra" ga: Israel ASANG Mao"So ta" ra". Naonhaung" mae" dayaug yaug yao" yham sang myhi" re airu: nhag' khyag' sho: mano: rure ngo nghang" ra". Ni" yham sang myhi" dao mae dao:so: dang nae" ga: byid' to" ra" dao:so: re nao magai: phyo' pye' nae" rure beim: wa,-

¹⁷Naonhaung" wa naonhaung" nho: dao: thoe: yang ASANG re gyo" nghang: nhao: avako". Ngadqere: naonhaung" wa ngonhaung" yang yao: re gyo" nghang: nae" khyo khoru: kad' bam va" i?- ga: myid' ako". Qam: so' bo: ra" ASANG wa mashab makhyang" ra" mau" kad' mo, alhab' re gai mo, ga: myid: jho: ra". Aimung: gaigai: yao: yao: wa yao: bam re o: ra" ga: ta" ko" ra" khyo" yang re: mangad: lao" din: man: ang: ra" Mao"So wa khai: mae i? ga: naonhaung" myid' na ko" ra" khyo" yang ASANG re gyo" nghang: nhao: ako".