Read Maru MALAKHI 3 Bible Online

MALAKHI 3 - Maru bible

MALAKHI 3

¹Qam: so' bo: ra" ASANG wa nga" khyo re nyhang" nae" qhid' mae" nga" lagyo: re nhao: ke' nae". Ailao" naonhaung" qho: na ko" ra" ASANG wa ce: Caung:pa" Yham mae nyag din taung" phyad za: joe" li" nae". Naonhaung" gyai myao nug: na: ra" lagyo: pho" wa- li" mung: nga" dao: thang" re ta" hau" kyo" li" nae"- ga: ta" ra".

²Ngadqere: yao: joe" li" ra" ba re khag' qo" kham genae" laug i?- yao: na: qhu" ra" ba na mae khag' qo" daui: na nae" i? Yao: wa so' thin: ra" sa: pya: ru:- jo, to' re kyang" shao: ra" myi: ru: ngad: li" nae".

³Yao: wa ngaui re kyang" shao mung: phad' yaug re" ru: dao: kho' byid: nae" qhid' mae" joe" li" nae". Mung sa: wa ngaui we' qhang re phad' kyang" yu: ru we' dakhyo: yao: bam wa ASANG jhao" jo: ra" xeim: cili" li" genae".

⁴Ailao" Yuda mung" byu qe we' Yerusalem vogaung" byu qe ASANG jhao" cili" ra" xeim: jham wa lai: lo" va" ayo, mae" we' dakhyo: ASANG re o: ngaui nhao: ra" xeim: jham ngad: li" genae".

⁵Qam: so' bo: ra" ASANG wa- ngo wa naonhaung" nho: phaung agaung: mae dao: kho' nae" thug' joe" li" mung:- ai lao" jao" vha" mo,- myi: shad' lao shad' mo,- madang maman" ra" khyo" jham tang: mo,- okaung jham re ang: ra" khyo: aphug' mabyid: lo: mhug' zo: mo,- cug' mo" cug' zo: qe we' taung bug: byu qere mha: zo: mo,- ngore maphug' myao: mo,- alhab' re qobo li" zhaug' nae"- ga: ta" ra".

⁶Ngo wa ASANG ngad:- ngo khonhae" re: matha" malai: yaug ngad:- ai mung: Yaku nho: myid:zo: qe naonhaung" wa- ana" joe" sho' bin sho' thao" lo" byaug va" ru mangad:.

⁷Naonhaung" wa qhid' phyao: mae" naonhaung" nho: phug' phyid' qe we' dakhyo:- nga" tarha" jham mae" phaug' lo" mung: aijham re macao" loko" ngad: ra". Ngo jhao" dam: phaug' lo geri:- aire naonhaung" jhao" ngo dam: phaug' lo nae". Ngadqere:- naonhaung" wa ngonhaung" nao jhao" khoru: phaug' lo nae" i?- ga: myid' ako".

⁸Naonhaung" re ngo myid: geli" xao su byu dayaug wa Mao"So re mhug' pyag' zo: nae" akhang" qo" i?- gai gai: yao: maqo" ngad: ra" ngadqere: naonhaung" wa ngo re mhug' pyag' zo" na: ako". Khoru: mhug' pyag'- ga: naonhaung" myid' ako". Ai wa xe bam dabam we' alu: qhaug' byid' ra" khyo jham we' sin" ru mae ngad: ako".

⁹Naonhaung" alhab' dao mae nhang: kheim: zao" jo; ra". Pe" mung: ga: re damyu" geim" wa ngo re mhug' pyag' zo" na: avako".

¹⁰Caung:pa" Yham khyo naonhaung" nho: xe bam dabam byang" sho' re ceim" cili" geri:- ailao" aimae zo:ve magan: mago" jo; jo; li" nae"- ngo wa mug: khaung: bao: zo: kham: jham phung" mung: gai: ra" ja: alhab' re magan: mago" vhe' khyo" byid: nae"- mavhe' khyo" byid: nae" ngad: rure ngo re jham" qu" gela,.

¹¹Ngo wa naonhaung" nho: gaug zo maui: lam re bathaung bajin: mazo: nhao nae". Naonhaung" nho: sabyi naui jham mae sabyi shi: apaung: akai: zaui" jab; lao" jo; li" nae".

¹²Ailao" mung"dan: alhab' mae" byumyu" qe wa naonhaung" re ngaui lho" ako"- ga: ta" li" genae". Pe"mung:ga"re- naonhaung" nho: mug: myid wa na gai: ra" jo, qo boe" li" nae".

¹³Naonhaung" wa nga" khyo we' sin: yang: gyo" gyaug: ra" khyo" ta" avako"- ga: ASANG ta" ra". Ngadqere: ngonhaung" wa ni" khyo re ngonhaung" pe" ta" ra" i?- ga: myid' ako".

¹⁴Naonhaung" wa Mao"So re caung da" byid' ru wa pe" akyu" mabo- yao: ta" ra" khyo: cao" yang: pe" akyu" bo nae" i? mangad: lao"- ngonhaung" shad' nghung" ra" mau" re qam: so' bo: ra" ASANG: qhid' kheim: mae nhag' lam: tha" ru qhu" byid: yang: pe" akyu" bo: nae" i?

¹⁵Ngonhaung" myao: ru we' dakhyo: ngad beim: mo, wa ngaui bau: mo, ngad: ako". Makhyang: mashab mo, wa qi" qhang: na: dai: ra" tho' mae yao: bam: makhyang: mashab: ra" mau" yang Mao"So: zang: qhao" myid re jham: qu" mung: loe; phao: lo" ako"- ga: ta" avako".

¹⁶Ailao" ASANG re gyaug phug' mo, yao: cao: yao: jho" ta" mung:- ASANG wa tae" gyo: mung: yao: bam ta" rure the' gyo" ra". Yao" qhid' kheim: mae ASANG re gyaug mung: phug' myao" ra" mo; khyo re mugsug' paug' mae tung" xam" to" ra".

¹⁷Yao: bam wa- nga" byumyu" ngad: li" genae" ga: qam: so' bo: ra" ASANG ta" ra". Ngo mau" kad' ra" ba na re yao: bam wa- ngo sang: ra" ngoyao" byumyu" boe" li" genae". Yao: pho" wa yao: re caung da" byid' ra" yauggai zo: re nhag' khyag' shogu: ru we' dakhyo:- ngo wa yao: bam re nhag' khyag' shogu: byid: nae".

¹⁸Nga" byumyu" qe wa din:man" ra" mo, we' makhyang: mashab: ra" mo,- ngo re caung da" byid: mo, we' ngo re macaung da" byid: mo,- khoru: jho" shai" rure dalhang dam: the' myao: li" genae".