Read Maru MATHE 10 Bible Online

MATHE 10 - Maru bible

MATHE 10

¹Yesu yao" mho"zo: daxe: shid' yaug re khai: yu mung:- makhyang" ra" yui jham re khe' thug' pye' nae" we'- no phyo: aja: ja: re gai byid: nae" kheim: so' yao: bam re byid' ra".

²Ai: lagyo: daxe: shid' yaug: mang jham wa- Petru ga: mang: ra" Simon we' yao: nhaung: Andre Zebede yao: zo: tao ngad: ra" Yaku we' yao: nhaung: Yohan

³Philib we' Batholame- Thoma we' khang: khyui zo: yaug Mathe- Alphaeu yao: zo: Yaku we' Thadaeu

⁴Byumyu" jhid' myid qi" ra" Simon we' thao phyao: yao: re ab: pye' ra" Yuda Iskarud ga: mo, bam ngad: ako".

⁵Yesu ai: daxe: shid' yaug re ceru: ta" mung: nhao: ke' ra". Naonhaung" wa taung bug: mug: khyo we' Samari vogaung: jham khyo davao ye: ge,-

⁶Ngadqere: Israel amyu" mae" byaug: lo" ra" yao jham jhao" ye: mung:-

⁷Yao: bam re- Mug:gaung mung"dan: wa jhao" li" va' ein: kho" kyo: ge,.

⁸No mo, re gai byid: ge,- Shid va" mo, re dam: daui nhao ge,- Mao gae: de, mo, re gai byid: ge,- Yui jham re khe' thug' pye' ge,- Aphug' mabyid: lo: naonhaung" qo" khae: yu vako" ru we' dakhyo:- aphug' mayu lo: su re byid: ge,.

⁹Naonhaung" phyid' cui: mae qhang- ngaui- gyid: ngaui thang: the: davin ge,.

¹⁰Gyaung: khyo qhid' mae" thaung pyan- bau: tha"- khyid zhaung: we' zaung: bao" daci ge,- pe"mung:ga"re mau" zaui: yaug wa zao: kho qo" yu ang: ra".

¹¹Khovo khodam: khyo ngadqere:- naonhaung" vao ye: gelao"- naonhaung" re lham: khae: yu nug: ra" yaug re qho mung:- naonhaung" ai: vogaung: mae" dam: thug' lo" sho' aiyaug: yham mae za: thang: na ge,-

¹²Amung: naonhaung" dayham yham khyo vao ye: gelao"- Ngaui bau: yaug yo geshao:- ein: bang" se" dao: ta" ge,-

¹³Ai: yham mae na: ra" mo, naonhaung" re ngaui bau: za: lham: khae: yu ko" ngad: re wa- ai: bang" se" shaman" dao: wa yao: bam: dao mae thang: jo, vashao:- naonhaung" re ngaui bau: za: malham: khae: yu: ra" mo, ngad: re wa- naonhaung" bang" se" shaman" dao: wa- naonhaung" jhao" dam: tug' lo vashao:.

¹⁴Amung:- naonhaung" re malham: khae: yu lo:- naonhaung" ta" ra" dao: rere: malham: tae" gyo: ko" ra" yham we' vogaung: mae" naonhaung" dam: thug' lo" ge,- naonhaung" dam: thug' lo" au:- naonhaung" khovo: mae" bodan jham re ko: khyo" co' ge,-

¹⁵Ngo naonhaung" re dang za: ta" ru wa- dao: kho' ra" ba na mae Mao"So wa Sodom we' Gomora vobyu qere tho' je: qi" ra" qobo byid' li" nae".

¹⁶Qu" ge, zag ne phaung gaung: khyo yao jham re nhao: ke' ru we' dakhyo: naonhaung" re nhao: ke' ra". Amung:- naonhaung" wa lhao maui ru: qag mung: phaung" kyug' ru xam: mag ge,-

¹⁷Lha" yang: na ge,- Byu jham wa naonhaung" re tarha" yung"[3] khyo ab byid' pye' mung: yao: bam wa naonhaung" re yao: bam: tarha" jung yham mae taui" be: li" genae".

¹⁸Taung bug qere we' zug:- kho:kham qere Ngaui Bau" Lau Dao: sagse: kham byid: nae" qhid' mae" Nga" mathao mae naonhaung" re zug: qe we' kho:kham qe: qhid' kheim: khyo taui" she: ye" li" genae".

¹⁹Naonhaung" airu: ab byid' pye' qhug' gelao"- khoru: jhau nae" laug- pe" ru ta" nae" laug ein: damyid: ci" ge,- naonhaung" jhau nae" dao: jham ayo, joe" lao" qo" yu: li" genae".

²⁰Pe"mung:ga"re ai: dao: jham wa naonhaung" jhau: ra" dao: jham mangad: nae"- naonhaung" yao: Pho" nho: Gyang" lho" Byo wa- naonhaung" nhad' khyo" yang jhau: thug' li" ra" dao: jham ngad: li" nae".

²¹Mao:nhaung: yao: cao: dayaug wa dayaug re shid nae" khyo jho" ab byid' pye' mung: myhi" pho" qe wa yao: zo: qere- shid nae" khyo ab byid' pye' li" genae". Alao" yao: zo: qere: yao: bam: myhi" pho" qere gye kad' mung: se' pye' nhao: li" genae".

²²Nga" mang mathao: yang byu alhab' mo, naonhaung" re nghang" li" genae"- ngadqere: athao" joe" sho' zang: qhao" yaug wa khyad' yu: ru qhug' nae".

²³Vogaung: dalam: mae naonhaung" re yhin" gelao"- gatau vogaung: dalam: khyo phao: ye: ge,- ngo naonhaung" re dang za: ta" ru wa- Israel mung" mae" vogaung: jham alhab' mae naonhaung" mau" mabin: zaui: shi: re Byu: yao: Zo: wa joe" li" nae" ngad: ra".

²⁴Mho"zo: wa mho" pho" tho' maje ngad: ra". Amung: jeim re: jeim sang tho' maje ngad: ra".

²⁵Airu: mung: mho"zo: wa yao" mho" pho" we' dakhyo:- jeim re: jeim sang we' dakhyo: ngad lao" wa nhag' dag gai: ava"- Yham khaung vin yaug re Bezelbu[4] ga: mhang" ko" re wa- yham khug: byu qere wa je yang: magai: ra" khyo" mhang" li" genae".

²⁶Amung:- byu qere dagyaug ge,- pe"mung:ga"re nghoe' to" ra" ja: alhab' wa de: de: mung: li" nae"- Nyham" to" ra" ja: alhab' wa myao: thug' li" nae".

²⁷Ngo naonhaung" re mug: cad' khug mae ta" ra" dao: re mug: bo" mae ta" kyo: ge,- naonhaung" re dao: so' so' yang: ta" ra" dao: re yham khaung dao mae" kho" kyo: ge,.

²⁸Myi:qid: tham: mae qo" phyo' qheim" pye' ra" Mao"So re gyaug ge, Gaung khyao re qo" se' pye' ngadqere:- alo zo: re maqo" se' pye' ra" mo, re dagyaug ge,.

²⁹Gyid: ngaui thang: the: dakye' yang za: jokhyao" shid' dau: re qo" vai: yu: mangad: i? Ngadqere: naonhaung" yao: pho" maqad lo: ai: jokhyao" dadau: lhao" re: maqo" gai: shid.

³⁰Naonhaung" au: mae" xae khe' jham alhab' re lhao" nghe' to: gau ngad: ra".

³¹Airu: mung: dagyaug ge,- naonhaung" wa jokhyao" myo: sho' dau: tho' je: phug' de; ako".

³²Su: qhid' kheim: mae ngore lhang: yu ra" yaug khag' re ngadqere:- mug:gaung mae na: ra" nga" pho" qhid' kheim: mae yao: re ngo lhang: yu nae".

³³Su: qhid' kheim: mae ngore ha: pye' ra" yaug re kam" wa- mug:gaung dao mae na: ra" nga" Pho" qhid' kheim: mae yao: re ngo ha: pye' nae".

³⁴Ce: myid gaung dao mae ngaui pyo: yaug yo: ru byid: nae" qhid' mae" ngo joe" li" ru ngad: ein: dajho ge,- ngo wa ngaui pyo: yaug yo: ru byid: nae" qhid' mae" joe" li" ru mangad:- Shae cili" byid: nae" qhid' mae" ngo joe" li" ru ngad:.

³⁵Pe"mung:ga"re- yao: zo: wa yao: pho" we' myiqe: zo: wa yao: myhi" we' dau mo" qe wa yao: na qe we' gye jho" boe" nhao nae" qhid' mae" ngo joe" li" ru ngad:.

³⁶Amung: byu dayaug: qhid' mae" magai: thao" ra" gye jham wa yao" yham khug: byu qe ngad: li" genae".

³⁷Khag' ngadqere: ngore jhid'de; ra" tho' mae myhi" pho" qere je: jhid'de; ra" yaug wa- nga" mho"zo: boe" nae" qhid' mae" maman: qi" ngad: ra". Amung: ngore jhid'de; ra" tho' mae" yao: zo: yao: dau qere je: jhid'de; ra" yaug re: nga" mho"zo: boe" nae" qhid' mae" maman: qi" ngad: ra".

³⁸Alao"- khag' ngadqere: yao: yao" pyao: zang re tau: vo, mung:- nga" khyid khu mae macao" ra" yaug wa- nga" mho"zo: boe" nae" qhid' mae" maman: qi" ngad: ra".

³⁹Amung:- yao: yao" kao so' gug: nae" qhid' mae" qam: ke' gug: gam yaug wa- kao so' jeim: nae". Ngadqere: nga" mathao mae yao: yao" kao so' jeim: yaug wa kao so' qo" yu nae".

⁴⁰Naonhaung" re lham: khae: yu: ra" yaug wa- ngore lham: khae: yu: ra" yaug ngad: ra". Ngo re lham: khae: yu: ra" yaug re: ngore nhao: ke' ra" yaug re lham: khae: yu: ru ngad: ra".

⁴¹Mao"So: lagyo: ngad: ra" ga" khyo" yang Mao"So: lagyo: re lham: khae: yu: ra" yaug wa ai: lagyo: the' yu: ra" aphug' jhaung qhu" re qo" yu: li" nae". Alao" dIn:man: yaug ngad: ra" ga" khyo" yang din:man: yaug re lham: khae: yu: ra" yaug re:- ai: din:man: yaug qo" yu: ra" aphug' jhaung qhu" re qo" yu li" nae".

⁴²Naonhaung" re ngo dang dang za: ta" geli". Nga" mho"zo: qe mae" ngai: thao" ra" yaug re nga" mho"zo: ngad: ra" ga: qid cae: dakeim byid: jhaug' yaug wa gaigai: yao: aphug' jhaung qhu" maqo" yu nae" khyo majo,.