Read Maru MATHE 11 Bible Online

MATHE 11 - Maru bible

MATHE 11

¹Yesu wa Yao" mho"zo: daxe: shid' yaug re ai: dao: jham bin: pyang lao"- avai: ayae mae" vogaung: jham mae mho" shid' kho" kyo: nae" qhid' mae" yao: wa ai: jo, qo mae" thug' lo" ra".

²Khristu zaui" na: ra" mau" zo" jham: khyo re Yohan wa thaung: mae" the' gyo: lao"- yao" mho"zo: daqhae: re Yesu jhao" nhao: ke' ra".

³Yohan: mho"zo: qe wa Yesu re nao wa ai: joe" li" nae" ga" ra" yaug ngad va" i? Mangad: lao"- gatau re ngonhaung" myid: lao" na ca" shi" i? ga: myid' ako".

⁴Yesu wa yao: bam re naonhaung" myao: ru we' the' gyo" ra" gu: Yohan re lo" ta" kyo: ge,-

⁵Myo, jid qe myo, myao: li" ko" ra"- Khyid qeim mo, khyo qo" su: ko" ra"- Mao gae: de, mo, gyang" shao: lo" ko" ra"- No: jid mo, no: gyo" li" ko" ra"- Shid: ra" mo, dam: daui: li" ko" ra"- Myaung sho" ra" mo, wa Lau Dao: Gai the' gyo ako".

⁶Ngo re lam: ra" myid maaug' o: mo, wa ngaui lho" ko" ra"- ga: ta" ra".

⁷Yohan: mho"zo: qe phao: lo" na ko" au: Yesu wa Yohan: khyo we' sin: mung: mo, byu qere naonhaung" wa din" pyad yo khyo pe" re ye: qu" nae" ein: thug' ye: ko" i? La: yang hug' nghan" na: ra" myo, phaung: gae jham re ye:qu" nae" ein: ye: ko" i?

⁸Airu: mangad: lao" pe" re ye: qu" nae" ein: ye: ko" i? Mai gai bau: gai ve; ci: ra" mo, re qu" nae" ein: ye: ko" i? Mai gai bau: gai ve, mo, wa kho:kham kho" mae na: ako".

⁹Airu: mangad: re- pe"mung: naonhaung" ye: ko" i? Lapa re ye: qu" nae" ein ko" i? Ngad: va"- ngo naonhaung" re ta" geli"- Lapa tho' je: qi" ra" yaug re naonhaung" myao: avako".

¹⁰Amung: jham: mugsug' mae Qu" wa,- ni" khyo re nyhang" na nae" qhid' mae" nga" lagyo: re ni" qhid' au: mae ngo nhao: ke' nae"- ga: tung" to" ru wa Yohan re ta" ru ngad: ra".

¹¹Naonhaung" re ngo dang dang za: ta" geli"- qid nyhab' kham: byid' ra" Yohan tho' je: qi" ra" xao su byu dayaug re: mana: qu" shi: ngad: ra". Ngadqere: mug:gaung: mung"dan: mae je: ngai: thao" ra" yaug wa- Yohan tho' je: qi" ra".

¹²Qid nyhab' byid' ra" yaug Yohan mungdao: kho" kyo" ra" ba na mae" ana" ba joe" sho' mug:gaung: mung"dan: re lhad' yu nae" qam: ke' ko" ra".

¹³Pe"mung:ga"re lapa qe alhab' we' kham" to" ra" Tarha" wa ai: mung"dan: khyo re Yohan: pyad joe" sho' ta" kyo" lo: avako".

¹⁴Yao: bam: mungdao: re khae: yu mung: lam" ko" ngad: re wa Yohan wa joe" li" nae" ra" Elia ngad: rure re: naonhaung" khae: yu: li" genae".

¹⁵No: khye' de, mo, wa gyo" yu geshao:.

¹⁶Ngo wa ce: qae" mae" byu qere pe" we' dau tau" nae" i? Yao: bam wa gai jao: mae zaung: jo, mung:-

¹⁷Naonhaung" wa ngonhaung" khalhao: mad ngadqere: mago" ngad: ako". Ngonhaung" ngug yao" yao" ngadqere: makaug' gengad ko" ra" ga: daphung: wa daphung: re zo:jhi jhi mung: jho" yao: na: ako" ra" zoshao qe we' dau: ako".

¹⁸Pe"mung:ga"re Yohan wa zo:ve jao" mung: mazo: mashaug' lo: joe" li" lao"- yao: bam wa yao: re yui de; ra" ga: ta" ako".

¹⁹Byu: yao: zo: wa zo: mung: shaug' mung: joe" li" lao" re:- yao: bam wa Qu" ge, yao: wa zo: shaug' so' kho' shu yaug- qobo qo" mo, we' khang: khyui zo: mo; byin cao: ngad: ra" ga: ta" ako". Mao"So: pha,jhi" laba lajhao wa dang: ru ngad: ga" rure yao" ashi: jham khyo" yang sagse: kham byid' ra".

²⁰Alao"- Yesu wa mug' pho: mau" zo" laug phyao: kad' qhu" lo: ra" vogaung: jham mae"- mo, byu qere myid matha" ko" ruyang ai: vogaung: jham re qeim: ra".

²¹Korazin we"- nao byu xa: voqoe, qhug' nae"- Bedsaida we"- nao re: byu xa: voqoe, qhug' nae"- naonhaung" shid' vo re kad' qhu" ra" mug' pho: mau" zo" jham re Ture we' Sidon shid' vo mae kad' qhu" ngad: re wa- ai shid' vo wa daba: mae" jid: mo" mai bau: ve, mung:- myiqe, bam mae lhau: yang: myid tha" genae" va".

²²Dao: kho' ra" ba na mae naonhaung" shid' vo wa- Ture we' Sidon shid' vo tho' je: qi" ra" qobo dae qhug' kham zo: genae".

²³Ai we' dakhyo:- Kapena-um we"- nao wa mug:gaung joe" sho' to' ke' ru qhug' nae" ein: jho: i? Myi:qid tham: khyo joe" sho' khyo" ke' ru nao qhug' nae". Pe"mung:ga"re nao re ngo kad' qhu" ra" mug' pho: mau" zo" jham re Sodom mae kad' ngad: re wa ai: vogaung: wa ana" ba joe" sho' jo, shinae" ngad: ra".

²⁴Dao: kho' ra" ba na mae nao wa Sodom vogaung: tho' je: qi" ra" qobo dae qhug' kham zo: nae"- ga: ta" ra".

²⁵Alao"- Yesu wa mug:gaung we' myid gaung: Asang Pho" we"- Pha,jhi" bo: ra" mo, we' nyan: kung: ra" mo, re maba nhao lo: nyham" to" ra" ja: jham re pha,jhi" mabo: ra" mo, re nao qhu" byid' ruyang ngo nao re caung:khin" byid' ra".

²⁶Ngad va"- Pho" we"- ceru: boe" ru wa nao myid o: ra" khyo ngad: ra".

²⁷Nga" Pho" wa ngore ja: khao: ngo" alhab' byid' to: va" ra". Pho" mae" je yang; ai: yao: zo: re khag' re maba. Pho" rere: ai: yao: zo: we' ai: yao: zo" yang qhu" byid: nae" khyin: yu: ra" mo, mae" je yang: khag' maba ko" ngad: ra".

²⁸Qola: vin yang: myaung: dug: ra" mo, alhab' we"- ngojhao" lo geri:- ngo naonhaung" re myaung: ngho: nhao nae".

²⁹Ngo wa xam: mag mung:- nhag' lam: nyham yaug ngad: ra". Airumung:- nga" kyau: re vin ge,- nga" khyo re mho" yu ge,- ailao" naonhaung" dugno: qhug' genae".

³⁰Pe"mung:ga"re ngo byid' ra" kyau: wa vin laui: ru we' ngo vhin: ra" qo wa seim" ra"- ga: ta" ra".