Read Maru MATHE 12 Bible Online

MATHE 12 - Maru bible

MATHE 12

¹Ai: thao Yesu wa Dugno: Ba mae gaug yo khyo" lai: lo" ra". Yao" mho"zo: qe wa vae: moe; geyang: gaug shi: shan" yu mung: zo" ako".

²Aire Pharishe qe myao gelao"- Qu" wa,- ni" mho"zo: qe wa Dugno: Ba mae magai: kad' ra" ja: re kad' ako" ga: Yesu re ta" ako".

³Yesu wa yao: bam re Davi wa yao: we' yao" byu qe vae: moe; gelao"- khoru: kad' ko" ra" khyo re naonhaung" manghe' qu" ko" i?

⁴Yao: wa Mao"So: yham khyo vao ye: mung:- khinjaung qe mae" je yang: khag' re: magai: zo" ra"- Mao"So: qhid' kheim: mae qhaug' byid' to" ra" mug re yao: we' yao" byu qe yu zo: ko" ra" mangad: i?

⁵Aimae"- Dugno: Ba khao: ngo" khinjaung qe wa Caung:pa" Yham mae- Dugno: Ba Tarha" re shad' lhoe" gengadqere: qobo maqo" ko" ngad: ra"- ga" ra" Moshe Tarha" re naonhaung" manghe' qu" ko" i?

⁶Naonhaung" re ngo ta" geli"- Caung:pa" Yham tho' je: qi" ru wa cemae na: ra".

⁷Ngo wa xeim: ngaui" byid' rure tho' nhag' khyag' rure je: o: ra" ga" ra" jham: dao: re ba: gyo: ko" ngad: re wa- qobo maqo" ra" mo, re naonhaung" qobo vhin genae" mangad:.

⁸Pe"mung:ga"re- Byu: Yao: Zo: wa Dugno: Ba: Asang ngad: ra".

⁹Yesu wa ai: jo, qo mae" thug' ye" lo" mung: Tarha" jung yham dalam: khyo vao ye" ra".

¹⁰Qu" ge, ai: Tarha" Jung Yham mae lo, dashad' shid: ra" byu dayaug na: ra". Byu damyo" wa Yesu re qobo zhaug' nug mung:- Dugno: Ba mae no gai: nyhang" gai byid' i? ga: Yesu re myid' ako".

¹¹Yesu wa yao: bam re tau: mung:- naonhaung" yao dadau: wa Dugno: Ba mae dungkhung: khug khyo byid: gyo" lo" ngad: re ai: yao re maye: phoe' yu nae" byu naonhaung" mae bo ko" i?

¹²Byu wa yao tho' myo: sho' je: phug' de; mangad: i? Airu: mung:- Dugno: Ba mae gai: ra" mau" zaui: nae" akhang" jo; ra"- ga: ta" ra".

¹³Alao" Yesu wa ai: lo, dashad' shid yaug re Ni" lo, din" ke' wa,- ga: ta" ra". Yao" lo, din" ke' we' lo, gai lo, we' dakhyo: gai: lo" byaug: ra".

¹⁴Pharishe qe wa aimae" thug' lo" mung: Yesu re se' pye' nae" qhid' mae" khyo qho: ako".

¹⁵Yesu wa ai: khyo re ba lao"- ai: jo, qo mae" thug' lo" ra". Mo, byu myo: sho' yao" thao cao" ako". No phyo: qhug' ra" mo, alhab' re gai byid' ra".

¹⁶Ngadqere: yao" khyo re mahau: genae" qhid' mae" yao: bam re zug' nhao: ra".

¹⁷Yao: ceru: kad' ru wa Lapa Esaia nhad' khyo" Mao"So ta" ra" dao: jham jab byang" lo nae" qhid' mae" ngad: ra".

¹⁸Ai: Lapa dao: mae- ngo khyin: yu: ra" nga" daui daui yaug- ngo jhid'de; o ngaui: ra" yaug re qu" ge,- Nga" Gyang" lho" Byo yao" dao mae nhao: ke' byid: nae"- Yao: wa nga" dao: kho' ra" khyo re byumyu" cao jab alhab' re ta" hau" kyo" li" nae".

¹⁹Yao: wa maha mangag- thoe qi: re: mahug' nae"- Hau" mo" khyodang mae yao" thoe re khag' mathe' gyo: genae".

²⁰Yao: wa kaui: ra" qid phaung: yao: re makhyug' pye' nae". Amung: kyi za: kyi: lo" ra" myi: rere: mase' pye' nae". Yao: wa tarha" din: vang" ru aung: nghoe' lo sho' qam: ke' li" nae".

²¹Byumyu" cao jab alhab' yao: re khug ngha: li" genae"- ga: ta" to" ra".

²²Ai: thao byu damyo" wa yui zaung yang: myo, jid: ru we' nhad' jid: ra" byu dayaug re Yesu jhao" jhui" li" ako". Yesu wa aiyaug re gai byid' ra"- Alao" yao: wa myo, myao: li" mung: dao: re: jhau: li" ra".

²³Mo, byu qe alhab' mo, wa mug' hao" byaug: ru we'- ceyaug wa Davi yao: zo: gai: ngad nae" i? ga: ta" ako".

²⁴Pharishe qe wa aire the' gyo: gelao"- ceyaug wa yui zug: mo" Bezelbu qam: so' khyo" yang yui jham re khe' thug' pye' ru ngad: ra"- ga: ta" ako".

²⁵Yesu wa yao: bam: aung khug mae pe" bo: rure ba mung: yao: bam re- Mung"dan: dalam: wa phung: jho" kho' yang: yao: cao: gye jho" se' na ko" ngad: re wa mamyao" re byo; qeim: lo" li" nae". Ai we' dakhyo: yao: cao: nhag' lam: majho" vang" ra" vogaung:- ug' khug' dinkhu: re: byo; qeim: lo" li" nae".

²⁶Gatau: Satan re khe' thug' mung: Satan yao: cao: majho" vang" lo:- gye jho" se' na ko" ngad: re wa yao" mung"dan: wa khoru: qo" gang" tang: jo, nae" i?

²⁷Ngo wa Bezelbu qam: so' yang yui jham re khe' ru ngad: re wa naonhaung" mho"zo: qe wa khag' qam: so' khyo" yang yui jham re khe' thug' ko" ra" i? Airu: mung:- naonhaung" shad' na: rure naonhaung" mho"zo: qe: lo, mau" jham: yang yao: sagse: qhu" byid' na: ra".

²⁸Ngo wa Bezelbu qam: so' khyo" yang mangad:- Mao"So: Gyang" Lho" Byo: Qam: so' khyo" yang yui jham re khe' thug' pye' ru ngad: ra". Aiwa naonhaung" phaung mae Mao"So: mung"dan: joe" li" va" ga" rure qhu" byid' ru ngad: ra".

²⁹Qam: bo yaug re shi" sao qhid' mataui" to: lo: yao" zai jham re lhad' yu nae" qhid' mae" ai: qam: bo yaug: yham khug khyo khag' re: maqo" vao ye: ngad: ra"- Bin: taui" to: thao re za: yeqo" lhad' yu: ra".

³⁰Nga" thao khyo made, ra" yaug wa ngore gye kad' yaug ngad: ra". Ngo we' daga" masham" zhang: ra" yaug wa abyo asin: yaug ngad: ra".

³¹Naonhaung" re ngo dang dang ta" geli"- Byu wa qobo alhab' we' Mao"So re jung" dao: ta" ra" qobo alhab' re khyad' pye' byid' ru gai: qhug' ra". Ngadqere: Gyang" Lho" Byo re jung" dao: ta" ra" yaug kam" wa qobo khyad' pye' byid' ru magai: qhug' nae".

³²Byu: Yao: Zo: re jung" dao: ta" ra" yaug khag' ngadqere: qobo khyad' pye' byid: ru gai: qhug' ra". Gyang" Lho" Byo re jung" dao: ta" yaug kam" wa ana" ce: pyad mae ngadqere: thao: pyad khonhae" re: qobo khyad' pye' byid ru magai: qhug' nae".

³³Gai: ra" agae wa lho" ra" ashi: zaui" ra". Qam: mabo: ra" agae wa ashi: seim zaui" ra". Pe"mung:ga"re- agae qam: mabo: bo ru wa ashi: re qu" yang: ba: kho' ra".

³⁴Lhao maui jham we"- Makhyang: magai: ra" mo, naonhaung" wa gai: ra" dao: khoru: gai: jhau genae" i? Pe"mung:ga"re aung khug nhag' lam: mae byang" sheim: jo, ra" gu: nhad' khyo" jhau: thug' li" ra".

³⁵Gai: ra" yaug wa yao" jo,nho" ban" mae" gai: ra" zai jham re phoe' thug' ra"- Magai: ra" yaug wa yao" jo,nho" ban" mae" magai: ra" zai jham re phoe' thug' ra".

³⁶Naonhaung" re ngo ta" geli" dao: kho' ra" ba na mae byu yaug khao: ngo" wa yao: yao: jhau: lai: pye' ra" akyu" mabo: ra" dao: jham: qhid' mae" dao: kho' ru qhug' ca" li" genae".

³⁷Nao jhau: lo: ra" dao: jham khyo" yang nao qobo qo" maqo" rure Mao"So wa nao re dao: kho' li" nae".

³⁸Ai: thao tung" pho" qe damyo" we' Pharishe qe wa Yesu re Mho" pho" we"- ngonhaung" re mug' pho: ve, lho daja: ja: kad' qhu" la, ga: ta" ako".

³⁹Ngadqere: Yesu wa yao: bam re tau: mung: magai makhyang" ru we' Mao"So re malam: ra" ce: qae: mae" byu qe wa mug' pho: ve, lho kad' qhu" nae" mho' ako". Lapa Yona nho: mug' pho: ve, lho mae" je yang: pe" mug' pho: ve, lho re: makad' qhu" nae".

⁴⁰Yona wa ai: ngo: zang: vae: dug: khug mae sam myi sam ba geim" laung" jo, ru we' dakhyo: Byu: Yao: Zo: re: myid kao" khug mae sam myi sam ba laung" jo; li" nae".

⁴¹Nineve vobyu qe wa Yona kho" kyo" ra" mungdao: re the' gyo: gelao" yao: bam: qobo mae" myid tha" lo: ako". Airumung: dao: kho' ra" ba na mae Nineve vobyu qe wa to" ye, mung: naonhaung" re qobo zhaug' li" genae". Naonhaung" re ngo ta" geli" Ce: jo, qo mae Yona tho' je: qi: yaug na: ra".

⁴²Sheba kho:kham myhi" wa kho:kham Sholamon: Pha,jhi" dao: re tae" gyo: nae" qhid' mae" va" ra" mung"dan: mae" joe" lo: ra". Airumung: dao: kho' ra" ba na mae Sheba kho:kham myhi" wa to" ye, mung: naonhaung" re qobo zhaug' li" nae". Naonhaung" re ngo ta" geli"- ce: jo, qo mae kho:kham Sholamon tho' je: qi: yaug na: ra".

⁴³Ai: makhyang" ra" yui wa yao: vao: jaung" na: ra" byu mae" thug' lo" lao"- kyaug' ho: ra" jo, qo khaung: mae ye: du" qin" mung:- no: nae" jo, qo re cao" qho: ra". No:qo maqhug' lao"-

⁴⁴Ai: yui wa- azhao ngo na co' ra" yham khyo dam: tug' lo" nae" ngad: ra"- ga: ta" ra". Amung: yao: dam: tug' joe" lo: re phyao: sham" pye' mung: nyang" za: shaung: nyhang" to" ra" yham keim re lomyao: ra".

⁴⁵Ai: yui wa thug' ye" lo" mung:- yao: tho' je: makhyang" ra" yui nhad' dau: re khai: jhui" lo mung: yao: bam wa ai: yham mae lovao: na: ako"- Alao" byu aiyaug: ave, wa qhid' phyao: mae" tho' je: qo: byaug: ra". Ce:ban: mae" makhyang: mo, re: ai we' dakhyo: boe" genae"- ga: ta" ra".

⁴⁶Yesu wa mo, byu qere dao: jhau: na shi" au: yao: myhi" we' yao: nhaung: bam joe" li" ako". Yao: bam wa yao: we' qhug' jhau nug gemung: taung gaung mae lao" ye: jo; ako".

⁴⁷Mo, byu qemae" dayaug wa Yesu re Asang we" ni" myhi" we' ni" nhaung: bam nao we' jho" qhug' jhau nug mung: taung gaung mae lao" ye: jo; ako" ga: ta" kyo" ra".

⁴⁸Yesu wa nga" myhi" khag' ngad: i? Nga" nhaung: bam wa khag' ngad: ako" i? ga: phaug' ta" ra".

⁴⁹Amung: Yesu wa Yao" mho"zo: qere lo, ceim: mung:- Qu" ge, cebam wa nga" myhi" we' nga" mao:nhaung: qe ngad ko" ra".

⁵⁰Mug:gaung dao mae na: ra" nga" Pho" myid o: ra" khyo" cao" ra" yaug khag' ngadqere: nga" mao:nhaung:- nga" myhi" ngad:- ga: ta" ra".