Read Maru MATHE 13 Bible Online

MATHE 13 - Maru bible

MATHE 13

¹Ai: ba yao: re Yesu wa ai: yham mae" thug' lo" mung: tham: yae mae yezaung: jo; ra".

²Yao: jhao" zang" li" ra" mo,byu qe mo, paug' saung" thau: ruyang Yesu wa lha dakhye' dao mae yezaung: jo; ra"- Mo, byu qe wa tham: yae mae ye; jo; bam: ako".

³Alao" yao: wa yao: bam re dao: tau" tau" mung:- myo: sho' ja: re mho" kyo: zo" re" ta" ru wa- Myug: shi: sin: yaug wa myug' shi: sin: nae" qhid' mae" thug' ye" lo" ra".

⁴Yo mae myug: shi: yesin" ke' re- daqhae: wa khyodang cao" yang: gyo" lo" ako". Aimung: myug: shi: jham re ngho' jham li" yang: gaug zo" pye' ko" ra".

⁵Daqhae: wa myid zhai: mathau: ra" laug qan" dao mae gyo" lo" ako"- Myid zhai: mathau yang: ajao" yao: yaug: thug' li" ra".

⁶Ngadqere: ba thaung: li" lao" lhe' mhai: pye' mung:- agyi: no, sho' macin" ruyang kyaug' shid: byaug: ako".

⁷Daqhae: wa zau: bye, gyo: mae gyo" lo" ako"- Zau: bye, jham yaug: qi" li" mung: qhovo: pan jham re hab' pye' ako".

⁸Ngadqere: myug: shi: daqhae: wa myid gai mae gyo" lo" ako"- Yaug: li" mung: daqhae: wa dayo nho"- daqhae: wa khyaug' xe nho"- gatau daqhae: wa sam xe nho" ashi: zaui" li" ako".

⁹No:khye' de, ko" re wa gyo" yu ge,- ga: ta" ra".

¹⁰Alao" yao" mho"zo: qe wa Yesu jhao" te' ye: mung:- Mo, byu qere nao pe"mung: dao: tau" ci yang: ta" i? ga: yao: re myid' ako".

¹¹Yesu wa yao: bam re tau: mung:- naonhaung" wa mug:gaung: mung"dan: no; thao" ra" khyo re ba: gyo: nae" akhang" qhug' yu: ako". Ngadqere: yao: bam wa aire maqhug' yu ko" ngad: ra".

¹²Pe"mung:ga"re qo" ra" yaug re je: laung: byid: mung: yao: wa jan" sho' qo" li" nae". Maqo" ra" yaug mae" kam" wa yao: qo" ra" gu dajhid' za: mae" lhao" alhab' re yu: pye' byid: nae".

¹³Yao: bam wa qu" gengadqere: mamyao- gyo: gengadqere: maba: gyo: ko" ruyang ngo wa ce: dao: tau" ci yang: ta" ru ngad: ra".

¹⁴Amung: Lapa Esaia ta" ru wa- yao: bam mae jab byang" lo: ra". Esaia Lapa dao: wa Cebam wa tae" gyo: gengadqere: maba: gyo: genae"- Yao: bam qu" gengadqere: mamyao genae".

¹⁵Pe"mung:ga"re- yao: bam: nhag' lam: nhag' cad' cad' ru we' yao: bam: no:khye' va: mung:- yao: bam: myo, jid' cam" ci: ako". Airu mangad: lo: yao: bam: myo, jid: myao mung: yao: bam: nokhye' gyo: yang:- yao: bam: aung khug nhag' lam: mae ba: gyo: ko" ngad: re wa yao: bam wa ngore khug ngha: lo: li" genae"- Ailao" ngo wa yao: bam re gai byid: nae" ga: ta" to" ra"- ga: ta" ra".

¹⁶Naonhaung" myo,jid' myao mung: naonhaung" no:khye' gyo: ko" ruyang naonhaung" wa ngaui lho" ko" ra".

¹⁷Ngo naonhaung" re dang za: ta" ru wa naonhaung" no:khye' gyo: ko" ruyang naonhaung" the' myao: ra" ja: re lapa qe we' Mao"So: byu qe myo: sho' mo, gyai myao nug: ako". Ngadqere: yao: bam maqo" myao ko" ngad: ra"- amung: naonhaung" the' gyo" ra" ja: rere: yao: bam gyai gyo: nug ko" ra". Ngadqere: yao: bam maqo" the' gyo: gengad: ra".

¹⁸Amung: myug: shi: sin: yaug: dao: tau" lajheim: re tae" gyo" yu ge,-

¹⁹Khyodang cao" yang: gyo" lo" ra" myug: shi" jham wa Ai: mung"dan: lau dao: re the' gyo: gengadqere: aire maba: gyo" yu: ra" mo, ngad: ako". Satan wa li" mung: yao: bam: nhag' lham: khug mae sin" ke' to" ra" mung"dan: mungdao: myug: shi: jham re yu: pye' byid' ra".

²⁰Myid zhai: mathau: ra" laug qan" dao mae gyo" lo" ra" myug: shi: jham wa mung"dan: lau dao: re the' gyo" yu we' ai jao" yao: ngaui bau: za: khae" yu: ra" mo, ngad: ako".

²¹Ngadqere: ai: mung"dan: lau dao: wa yao: bam: nhag' lam: khug mae no, sho' agyi: macin" mung: myao" sho' maqo" yaug: jo, gengad: ra". Ai: mung"dan: lau dao" mathao mae qug: khai" ru we' yhin" ru qhug' lo lao" yao: bam wa phyad za: dam: phaug' lo" ako".

²²Zau: bye, gyo: mae gyo" lo" ra" myug: shi: jham wa ai: mung"dan: lau dao: re the' gyo" yu ngadqere: yao: bam byu na ban qhid' mae" myid: qug: myid: ci" ru we' ngaui qhang jo,nho" magan: mago" qo" nug: ruyang ai: mungdao: re hab' pye' mung: ashi: maqo" zaui" ra" mo, ngad: ako".

²³Amung: myid gai mae gyo" lo" ra" myug: shi: jham wa ai: mung"dan: lau dao: re gyo" yu mung: ba gyo" yu mo, ngad: ako". Yao: bam wa ashi: zaui" li" mung: daqhae: wa dayo nho"- daqhae: wa khyaug' xe nho" daqhae: wa sam xe nho" myo" laug: lo: ako".

²⁴Yesu wa dao: tau" gatau we' yao: bam re dam: ta" ra". Mug:gaung: mung"dan: wa ceru we' dau: ra". Byu dayaug wa- yao" yo mae gaug gai yesin" to" ra".

²⁵Ngadqere: myi" re byu alhab' yab: myhid' jo, ra" au: geim lau gye wa li" mung: gaug yo mae myo, shi: jham re li" sin: co' mung: lo" byaug: ra".

²⁶Gaug gae jham yaug: qi" li" mung: gaug nhae thug' li" lao"- ai: myo, gae jham re: myao: thug' li" ra".

²⁷Alao" yosang: jeim qe wa lo mung: Asang we"- ni" yo mae nao gaug myug: gai asin" to" mangad: i? Aire myo, gae jham wa khai: mae" yaug: li" ko" ra" i? ga: yao: re ta" ako".

²⁸Alao" yao: wa yao" jeim qere- Aiwa geim lau gye: yang kad' ru ngad: ra" ga: tau" ra". Jeim qe wa ngonhaung" ai: myo, gae jham re yephan" pye' zai i? ga: myid' ako".

²⁹Yosang wa daye: phan" pye' ge, Pe"mung:ga"re myo, gae jham re phan" lao"- gaug gae jham damyo" re: boban" lo" zai ngad: ra".

³⁰Yad yo, joe" sho' gaug we' myo, gae shid' ja" geim" daga" yaug: qi" li" vageshao:- Gaug yad yo, joe" lo lao"- gaug yad okaung qere myo, gae jham re shi" sao qhid' phan" dang" yu mung: myi: mae ngha" pye' ge,- ai:thao gaug re yad: zhang: yu: mung: nga" jhi mae ke' to: ge,- ein: ngo ta" nae"- ga: ta" ra".

³¹Yesu wa dao: tau" gatau we' yao: bam re dam: ta" ra". Mao"So: mung"dan: wa ceru we' dau: ra". Byu dayaug wa ao: shi: jid' re yao" yo mae yesin" ke' ra".

³²Ao: shi: jid' wa myug: shi: jid' alhab' tho' mae ngai: thao" ra" myug: shi: jid' ngadqere: agae yaug: qi" li" lao"- ao: pho' gae alhab' tho' mae je: qi" ra" agae boe" li" ra". Ngho' jham wa yao" akaung jham mae asad' li" sad' ako".

³³Yesu wa dao: tau" gatau ci yang: yao: bam re dam: ta" ra". Mug:gaung: mung"dan: wa ceru we' dau: ra". Myiqe: dayaug man" yu: yu mung:- cin man" phaui: datang mae ke' mung: yang: lhag' ke' lao" cin man" alhab' geim" re bai" do, li" nhao: ra"- ga: ta" ra".

³⁴Yesu wa cegu: alhab' re dao: tau" ci yang: mo, byu qere ta" kyo" ra". Dao: tau" maci lo: daja: rere: yao: bam re mata" kyo: ngad: ra".

³⁵Yao: ceru: kad' ru wa Ngo wa dao: tau" ci yang: nga" nhad' thoe phung" mung: mug: myid phan" to" ra" ba na mae" nyham" to" ra" ja: re ngo ta" pheim: kyo: nae"- ga" ra" Lapa dao: jab byang" li" nae" qhid' mae" ngad: ra".

³⁶Ai: thao Yesu wa mo, byu qere to: co' mung: yham khug khyo vao lo" ra". Yao" mho"zo: qe wa yao: jhao" te' lo mung:- ai: myo, gae jham: dao: tau" lajheim: ngonhaung" re pheim: kyo: byid: la, ga: mho' ako".

³⁷Alao" Yesu wa gaug myug: gai sin: yaug wa ai: Byu: Yao: Zo: ngad: ra".

³⁸Amung: yothaung: pa: wa ce: mug: myid dao ngad: ra"- Gaug myug: gai wa Mao"So: mung"dan: zo: dau qe ngad: ako"- Myo, gae jham wa yui Satan" nho: zo: dau qe ngad: ako".

³⁹Aire sin: yaug wa yui Satan ngad: ra". Gaug yad yo, wa mug: myid thao" lo" ra" ba na ngad: ra"- amung: gaug yad o: kaung qe wa mug: lagyo: qe ngad: ako".

⁴⁰Ai: myo, gae jham re phan" dang" yu mung: myi: mae ngha" pye' ru we' dakhyo: mug: myid thao" lo" ra" ba na mae re: ai: yui Satan" nho: zo: dau qere myi: mae ngha" pye' li" nae".

⁴¹Byu: Yao: Zo: wa yao" mug: lagyo: jham re nhao: ke' mung:- su re qobo kad' nhao: ra" mo, we' magai: ra" mau" zo" kad' ra" mo, re yao" mung"dan: khug mae" khyin: thug' yu mung:

⁴²Yao: bam re myi:khyeim" mae pye' zaui: pye' li" nae"- aimae yao: bam ngug byid ngug nhe' we' zaui kyag' genae".

⁴³Alao"- din:man: ra" mo, wa Pho" Mao"So: mung"dan: mae ba we' dakhyo: zho: na: li" genae"- no: khye' de, ko" re wa gyo" yu ge,-

⁴⁴Mug:gaung: mung"dan: wa ceru we' dau: ra". Byu dayaug wa yo mae nyhab' to" ra" jo,nho" re yethe' myao lao"- yao: wa dam: nghoe' to: co' mung: ngaui bau" ru we' lo mung: yao: qo" gu: alhab' re lo: aung" pye' yang:- ai: yo re yevai: yu: ra".

⁴⁵Mao"So: mung"dan: wa ceru we' re: dau: ra". Phaga: byu dayaug wa phug' de; ra" palhe" re qho: na: ra".

⁴⁶Yao: wa phug' de; ra" palhe" re qho: myao lao"- yao: qo" ra" gu: alhab' re lo" aung" pye' mung: ai: phug' de; ra" palhe" re yevai: yu: ra".

⁴⁷Aimae"- mug:gaung: mung"dan: wa ceru we' dau: ra". Ngo: kung" mo, wa yao: bam: geim re tham: khug mae ye: khyo" to: lao"- ngo: myo: sho' ja: myi" ako".

⁴⁸Ngo: jham byang" sho' myi" gelao"- yao: bam wa tham: yae gyagao: yo khyo she: to' yu mung: zaung: jo, yang:- gai: ra" ngo: jham re gyan khug mae ke' to: mung:- magai: ra" ngo: jham re wa khyin: shapye' ko" ra".

⁴⁹Mug: myid thao" lo" ra" ba na mae re:- ai we' dakhyo: ngad nae"- Mug: lagyo: jham wa makhyang" ra" mo, re din:man" ra" mo; phaung mae" li" khyin: zhang: yu mung:-

⁵⁰Myi:khyeim" khug khyo pye' zaui: pye' li" genae". Aimae yao: bam wa ngug byid ngug nhe' we' zaui kyag' li" genae"- ga: ta" ra".

⁵¹Yesu wa yao: bam re naonhaung" cegu: alhab' re ba: gyo: ko" i? ga: myid' ra". Alao" yao: bam wa ba: gyo"- ga: phaug' tau" ako".

⁵²Alao" Yesu wa airumung:- mug:gaung: mung"dan: mho"zo: boe" lo" ra" tung" pho" khag' ngadqere: yao" kyaung" lhaung" qe, khug mae" zai sag' zai kug jham re phoe' yu: ra" yham sang dayaug we' dau: ra"- ga: ta" ra".

⁵³Yesu wa ai: dao: tau" jham re bin: ta" lao"- yao: wa ai: jo, qo mae" thug' lo" mung:-

⁵⁴Yao" vogaung: khyo dam: tug' joe" lo: ra". Yao: wa Tarha" Jung Yham mae mho" shid' byid' ra". The' gyo" ra" mo, alhab' mug: hao" byaug: ako". Amung: yao: bam wa yao: wa airu" ra" pha,jhi" khai: mae" ba: yu: laug i? Mug' pho: ve, lho jham re khoru: qo" kad' laug i?

⁵⁵Yao: wa lag sama yao: zo: mangad: i? Yao: nhaung: bam wa Yaku- Yoseb- Simon we'- Yuda bam mangad: ge, i?

⁵⁶Yao: nhae: mo" bam re: cemae nyhao: nhaung" we' daga" za: na: bam: ru mangad: i? Aire yao: wa cejham re khai: mae" qo" yu: laug i? ga: ta" mung: yao: re yao: bam ngag: pye' ako".

⁵⁷Amung: Yesu wa yao: bam re Lapa wa yao: yao" vogaung: we' yao: yao" yham mae" je mung: khyi" khao: ngo" mae nga: ye; ra"- ga: ta" ra".

⁵⁸Yao: bam wa yao: re lam khug: myid mabo ko" ruyang yao: wa ai: vogaung: mae mug' pho: mau" myo: sho' mazaui" qhu" ngad: ra".