Read Maru MATHE 15 Bible Online

MATHE 15 - Maru bible

MATHE 15

¹Alao"- Yerusalem mae" Pharishe qe damyo" we' Tung" Pho" qe wa Yesu jhao" joe" lo mung:-

²Yesu re- Ni" mho"zo: qe wa phug' phyid' qe: thung" li" jham re pe"mung: maphug' cao" ko" ra" i? Yao: bam wa lo, macid' lo: zo zo: ko" ra"- ga: ta" ako".

³Yesu wa yao: bam re tau: mung:- aire naonhaung" wa pe"mung: Mao"So: amyin" dao: jham re to" pye' mung: naonhaung" yao" thung" li jham re phug' cao" ko" i?

⁴Pe"mung:ga"re Mao"So wa ni" myhi" we' ni" pho" re phug' myao: wa,- yao: myhi" we' yao: pho" re nhad' dao: thoe: yang shad' yaug khag' ngadqere: se' pye' ru qhug' shao: ga: ta" to" ra".

⁵Ngadqere: naonhaung" mho" shid' ru wa byu dayaug yaug yao: myhi" we' yao: pho" re bao" thaug' nae" zai daja: ja: qo" ngadqere:- ai wa Mao"So re qhaug' byid' to: va" zai ngad: ga: ta" lao"-

⁶Ai: yaug wa yao: myhi" we' yao: pho" re bao" thaug' maca"- ga: mho" shid' ako". Airu: mung: naonhaung" wa naonhaung" yao" thung" li jham re qo" phug' cao" nae" qhid' mae" Mao"So: amyin" dao: jham re kyae" khyo" pye' ako".

⁷Geim kad' mo, we"- naonhaung" khyo we' sin: mung: Mao"So wa Lapa Esaia nhad' khyo" Ce: amyu" wa nhad' dao: thoe: yang za: ngore phug' myao" ako".

⁸Yao: bam: nhag' lam: kam" wa gaigai: yao: ngo we' gyai va" kyo: na: ako".

⁹Yao: bam wa byu: yang kad' to" ra" thung" li jham re nga" amyin" dao: jham we' dakhyo: mho" byid' ako". Airumung: yao: bam ngore goe; pa" ru wa akeim ngad: ra"- ga: ta" to" ru wa gyai dang: ra"- ga: ta" ra".

¹⁰Yesu wa mo, byu qere yao: jhao" khai: yu mung: yao: bam re tae" gyo: yang: ba: gyo" yu ge,

¹¹Nhad' khug khyo" vao lo: ra" ja: wa byu re masan masin" boe" nhao: ru mangad:- Nhad' mae" thug' li" ra" ja: kam" wa byu re masan masin" boe" nhao: ra"- ga: ta" ra".

¹²Alao" mho"zo: qe wa Yesu jhao" lo mung: nao ceru: ta" ruyang Pharishe qe nhag' gyo" no ko" rure nao ba: i? ga: ta" ako".

¹³Yesu wa tau: mung:- Mug:gaung dao mae na: ra" nga" Pho" maqho" to" ra" agae jham alhab' wa phan" pye' ru qhug' nae".

¹⁴Yao: bam re damyid: ci" ge,- yao: bam wa myo, jid qere khyo jhui" ra" myo, jid qe ngad: ako". Myo, jid yaug wa myo, jid re khyo jhui" ngad: re wa shid' zo" geim" dungkhung: mae byid: gyo" lo" li" genae"- ga: ta" ra".

¹⁵Alao" Petru wa ce: dao: tau" lajheim: ngonhaung" re pheim: kyo: byid: la,- ga: ta" ra".

¹⁶Yesu wa naonhaung" ana" joe" sho' su gatau tho' maje: ba: gyo: shi: genhaung i?

¹⁷Byu: nhad' khyo" vao lo: ra" gu: alhab' wa vae dug: khug khyo vao lo" mung: ngha ye: jo, qo khyo dam: thug' lo" rure naonhaung" maba ko" i?

¹⁸Ngadqere: byu: nhad' mae" thug' li" ra" ja: alhab' wa- nhag' lam: aung khug mae" thug' li" ru ngad: ra". Amung: aijham wa byu re masan masin" boe" nhao: ra".

¹⁹Pe"mung:ga"re byu: nhag' lam: aung khug mae" makhyang" ra" myid byu se' ru- myi: shad' lao shad' ru- seim lai qho: ru- su: zai khug' ru- madang: ra" sagse: kham: ru- su re gaui mho: ru jham thug' li" ra".

²⁰Aijham wa byu re masan masin" boe" nhao: ra"- Lo, macid' lo: zo zo" ru wa- byu re masan masin" maboe" nhao ngad: ra"- ga: ta" ra".

²¹Yesu wa ai: jo, qo mae" thug' lo" mung:- Ture we' Sidon mang: khaung: khyo ye" lo" ra".

²²Ai: mang: mae na: ra" Khanan myiqe: dayaug wa- Yesu jhao" li" mung:- Davi yao: zo: Asang we"- ngore nhag' khyag' yu la, wo"- nga" myiqe: zo: wa yui vao: jaung" mung: qu" gyaug sho' no: na: ra"- ga: zag: hug' ra".

²³Ngadqere: Yesu wa pe" re: maphaug' tau: ngad: ra". Alao" yao" mho"zo: qe wa yao: jhao" te' lo mung: yao: re- Ai: myiqe: myhi" re phao nhao: ke' wa,- pe"mung:ga"re yao: wa ngonhaung" thao mae cao" zag: hug' na: ra"- ga: ta" ako".

²⁴Alao" Yesu wa Israel byumyu" mae" byaug: lo" ra" yao jham: qhid' mae" za: ngore nhao: ke' ru ngad: ra"- ga: phaug' tau" ra".

²⁵Myiqe: myhi" wa Yesu khyid qao: mae li" goe; jo, mung:- Asang we"- ngore bao" yu la,- ga: Yesu re mho' ra".

²⁶Yesu wa- yao: re- zoshao qe: zo:ve re yu: yu mung: lakha: jham re byid' pye' nae" magai ngad: ra"- ga: phaug' tau" ra".

²⁷Myiqe: myhi" wa- Ngad: ra"- Asang we"- Lakha: jham lhao" re: yao: bam: asang: zozo: jaung: mae" gyo" ra" zosheim jham re qo" gaug zo" ako"- ga: ta" ra".

²⁸Alao" Yesu wa yao: re- Nao wa lam khug: myid qi" ra" myiqe: ngad: ra"- nao o: ru we' dakhyo: boe" lo vashao:- ga: ta" ra". Ai: ayo, mae" yao" myiqe: zo: wa gai: lo" byaug: ra".

²⁹Yesu ai: jo, qo mae" thug' lo" mung:- Galile tham: yae cao" yang: su" lo" ra". Amung: yao: wa bug gaung dalam: khyo do, ye: mung: yezaung: jo, ra".

³⁰Byu phung: mo" zang wa- khyid qeim- lo, qeim- myo, jid mo, gaung dau qeim mo,- nhad' jid mo, we' gatau no phyo: qhug' ra" mo, myo: sho' re jhui" li" mung: Yesu khyid qao: mae li" nha: to" ako". Yesu wa yao: bam alhab' re gai byid' ra".

³¹Amung:- nhad' jid mo, dao: jhau: li" ru- gaung dau qeim mo, dam: gai: lo: ru- khyid qeim mo, khyo su" li" ru- myo, jid qe myo, myao: li" ko" rure- mo, byu qe the' myao gelao"- yao: bam mug' hao" byaug: ako"- amung: yao: bam wa- Israel nho: Mao"So: phungbao re caung:khin" byid' ako".

³²Yesu wa yao" mho"zo: Qere: yao: jhao" khai: yu: mung: yao: bam re ce: mo, byu qe wa ngo we' daga" na: ru sam ba ngad va". Ana" yao: bam zo:ve maqo" lo ko" ngad: ra". Airumung: ngo yao: bam re nhag' khyag' ra". Ngo wa yao: bam re zo:ve mazho: lo: manug: phao nhao: ke'- pe"mung:ga"re- yao: bam khyole; mae vae: moe' myad gazai ngad: ra"- ga: ta" ra".

³³Mho"zo: qe wa- Yesu re ceqhi" laug: ra" byu phung: mo" zang re gyi: sho' zho: nae" zo:ve ceru" ga" din"pyad' yo mae ngonhaung" khai: mae" qo" nae" i? ga: ta" ako".

³⁴Alao" Yesu wa yao: bam re naonhaung" mug khonho" qo" ko" i? ga: myid' ra"- Yao: bam wa mug nhad' khai" we' ngo: nau" dajhid' zo: qo"- ga: phaug' tau" ako".

³⁵Alao" Yesu wa mo, byu qere myid gaung mae zaung: jo, nae" qhid' mae" amyin" byid' ke' ra".

³⁶Yao: wa mug nhad' khai" we' ngo: re yu: yu mung:- Mao"So re jeju bin: caung: byid: lao" mug we' ngo: re khyoe' phai" mung: mho"zo: qere byid' ra". Mho"zo: qe wa mo, byu qere gae byid' ako".

³⁷Yao: bam alhab' mo, gyi: sho' zo" ako". Mho"zo: qe wa mo, byu qe zo" tang" ra" aje, abai" jham nhad' gyan byang" sho' gaug zhang: yu: ako".

³⁸Myiqe: zoshao re manghe' lo: mug zo" ra" mo, wa yauggai za: byid taung ko ngad: ra".

³⁹Ai: thao re Yesu wa mo, byu qere phao nhao: ke' mung: yao: wa lha zaung yang: Magadan mang: khyo gau" ye" lo" ra".