Read Maru MATHE 17 Bible Online

MATHE 17 - Maru bible

MATHE 17

¹Khyaug' ba kyo thao re Yesu wa Petru- Yaku we' yao: nhaung: Yohan bam re za: jhui: mung: myhao ra" bam khyo jhui" do, ye" ra".

²Yao: bam: qhid' kheim: mae yao:- Yesu ve, bao tha" lo" byaug: ra". Yao" myo,khung: wa ba we' dakhyo: zho mung:- yao" mai bau: wa bao: bao: phyu: li" ra".

³Moshe we' Elia wa Yesu we' dao: jho" jhau: na ko" rure yao: bam myao: ako".

⁴Alao" Petru wa Yesu re Asang we"- ngonhaung" ce: jo, qo mae na: re gai: ra"- nao nug: ngad: re wa Asang: qhid' mae" dalam:- Moshe qhid' mae" dalam:- Elia qhid' mae" dalam:- zaung sam zaung ce: jo, qo mae- ngo kad' nae"- ga: ta" ra".

⁵Petru airu: jhau: na shi" au:- Qu" ge,- bao qhui: ra" jham dathaui: yao: bam: dao mae losham: nghoe' ra". Jham thaui: khug mae"- ceyaug wa ngo jhid'de; ra" nga" Zo: ngad:- ngo yao: re gyai o ngaui: ra"- yao" dao: re tae" gyo: ge,- ga: jhau: thug' li" ra".

⁶Mho"zo: qe ai: thoe re the' gyo: gelao"- yao: bam wa gyaug: nin" byaug mung: myid gaung mae goe; jo; bam: ako".

⁷Yesu wa yao: bam jhao" lo mung:- yao: bam re lotin: yang:- To" ge, dagyaug ge,- ga: yao: bam re ta" ra".

⁸Alao" yao: bam tau: qu" ke' ko" re- Yesu mae" je yang: gatau khag' rere: mathe' myao loko" ngad: ra".

⁹Yao: bam- bam dao mae" tug' gyo" lo: na ko" au:- Yesu wa yao: bam re- Byu: Yao: Zo: shid: rumae" madam: daui: to" li" shire- naonhaung" myao: ra" ai: ve, lho we' sin: mung: khag' rere: data" kyo: ge,- ga: zug' nhao: ra".

¹⁰Alao" mho"zo: qe wa Yesu re- aire Elia shi" sao qhid' joe" li" zai ngad: ga:- tung" pho" qe pe"mung: ta" ko" ra" i? ga: myid' ako".

¹¹Yesu wa yao: bam re- Elia wa gaigai: yao: sao qhid' joe" li" mung:- ja: khao: ngo" alhab' re jin" jin" seim" to: zai ngad:-

¹²Ngo naonhaung" re ta" geli" Elia wa gaigai: yao: joe" li" ava" ngadqere: yao: bam yao: re maba geyang: yao: bam nug: khyo" yao: re kad' avako"- Byu: Yao: Zo: rere: ai we' dakhyo: yao: bam kad' li" genae"- ga: ta" ra".

¹³Alao" Yesu wa yao: bam re- qid nyhab' byid: yaug Yohan nho: khyo re ta" na: rure mho"zo: qe ba; gyo" yu: ako".

¹⁴Yesu we' mho"zo: qe wa mo, byu qe na: ra" jo, qo khyo joe" lo gelao"- byu dayaug Yesu qhid' kheim: mae pad' thaug' li" thaug' yang:-

¹⁵Asang we"- nga" zo: re nhag' khyag' yu byid: la,- yao: wa ngho' be, be, yaug ngad mung: myi: mae re:- qid mae re: alhang lhang gyang: vao lo" qu" va" ra". Amung: yao: wa gyai yao: kham zo: qug' na: ra".

¹⁶Yao: re ni" mho"zo: qejhao" jhui" li" ngadqere: yao: bam yao: re maqo" gai byid: ko" ngad: ra"- ga: ta" ra".

¹⁷Alao" Yesu tau: mung:- Lam khug: myid mabo: ru we' shad' nghung" ra" mo, we"- ngo naonhaung" we' daga" khomyhao" joe" sho' na zai i? Ngo khomyhao" joe" sho' naonhaung" re zang: zai i? Ai: yauggai nau" re ngojhao" jhui" lo geri:- ga: ta" ra".

¹⁸Yesu wa yui re phao: thug' lo" nae" qhid' mae" amyin" byid' ke' ra"- Yui wa ai: yauggai nau" mae" phao: thug' lo" ra". Ailao" jao"- ai: yauggai nau" wa gai: lo" byaug: ra".

¹⁹Ai: thao re mho"zo: qe wa Yesu we' yao: bam za: na ko" au:- ai: yui re ngonhaung" pe"mung: maqo" khe' thug' pye' geli" laug i? ga: Yesu re myid' ako".

²⁰Yesu wa yao: bam re naonhaung" lam khug: myid malaug: bo yang: ngad: ra"- ga: tau" ra". Ngo naonhaung" re dang za: ta" ru wa naonhaung" lam khug: myid ao: jid' qhi" zo: bo: ngad: re bam re cemae" thoe: khyo qui" lo" wa, ein: ta" lao" qui" lo" li" nae"- Lam khug: myid bo: ngad: re wa- naonhaung" alhab' re qo" kad' genae".

²¹(Ce: yui re wa- akyu" mho' ru we' zo:ve jao" ruyang za: mangad: re wa gatau pe" khyo" yang re: maqo" khe' thug' pye' ngad: ra"- ga: ta" ra".[6]

²²Yesu we' mho"zo: qe Galile mung" khaung: mae daga" du" qin" ko" au:- Yesu wa yao: bam re Byu: Yao: Zo: wa su: lo, khyo ab byid' pye' ru qhug' nae" jhao" li" na va" ra".

²³Yao: bam wa yao: re se' pye' li" genae"- ngadqere: yao: wa sam ba kyo thao re dam: taui: ke' ru qhug' li" nae"- ga: ta" ra". Ailao" mho"zo: qe wa gyai myid: kaug' ako".

²⁴Yesu we' yao" mho"zo: qe Kapena-um khyo joe" lo gelao"- Caung:pa" Yham khang: khyui mo, wa Petru jhao" li" mung:- naonhaung" mho" pho" wa Mao"So: yham khang: malhaung" ke' ra" i? ga: myid' ako".

²⁵Petru wa lhaung" ke' ra"- ga: tau" ra". Petru yham khug khyo vao lo" lao"- Yesu shi" Petru re lham: jhau mung:- Simon we"- nao pe" ru: myid: i? Ce: mug: myid: dao: mae" kho:kham qe wa khag' mae"- khang: khyui: yu: ako" i? Yao: bam: mung" byu qe mae" i? Mangad: lao" taung bug qe mae" i? ga: myid' ra".

²⁶Petru wa taung bug qe mae" khyui: yu ko" ra"- ga: tau" ra". Alao" Yesu wa Airu: ngad: re wa mung" byu qe wa make' ca" gengad: ra".

²⁷Ngad yang: re: yao: bam: nhag' lam: mamyid: shad' genae" qhid' mae" nao tham: khyo ye: mung:- ngo myhad' taui: ye: khyo" wa, Sao qhid' myi" ra" dau: re taung" yu mung: ai: ngo: nhad' re lao" ho" ke' lao"- ngaui thang: the: dapye: re nao myao nae"- ai: ngaui re yu: yu mung:- nao we' nga" qhid' mae" Caung:pa" Yham khang: ye: ke' wa,- ga: ta" ra".