Read Maru MATHE 18 Bible Online

MATHE 18 - Maru bible

MATHE 18

¹Ai: au: re mho"zo: qe wa Yesu jhao" lo mung:- mug:gaung: mung"dan: mae qi" thao" yaug khag' ngad: i? ga: myid' ako".

²Alao" Yesu wa- zoshao dayaug re khai: yu mung:- mho"zo: qe: qhid' kheim: mae yhe' to: yang:-

³Ngo naonhaung" re dang za: ta" ru wa- Nhag' lam: tha" pye' mung: zoshao ru: boe" gelao" za: mug:gaung: mung"dan: khyo qo" vao genae".

⁴Ce: zoshao we' dakhyo:- yao: yao" nhag' lam: re goe; nyham: ra" yaug wa- Mao"So: mung"dan mae qi" thao" yaug ngad: ra".

⁵Ce: zoshao ru" ra" yaug re nga" mang khyo" yang khae: yu: ra" yaug khag' ngadqere: ngore khae: yu: ru ngad: ra".

⁶Ngo re lam khug: na: ra" ce: zoshao qe mae" dayaug yaug re lam khug: myid zai" phyo' ra" yaug khag' ngadqere:- yao" lang zang: mae laug lhang qi: taui" lhao: mung: no; thao" ra" panglai: khug khyo pye' zaui: pye' qhug' ru wa yao" qhid' mae" je: gai shi" ra".

⁷Lam khug: myid tha" lang: nhao: ra" ja: jo; ruyang myid gaung byu qe byu xa: vaqoe, qhug' ako". Lam khug: myid tha" lang: nhao: ra" ja: jham wa khonhae" re: jo; ra" ngadqere: lam khug: myid tha" lang: nae" boe" nhao: ra" yaug wa byu xa: vaqoe; qhug' ra".

⁸Ni" khyid mangad: lao" ni" lo; yang ni" lam khug: myid re zai" phyo' nhao: ngad: re wa ai: khyid lo, re qam" phyid' shalhaui" pye' wa,- Khyid lo, jab jab za: apyad ato: myi: mae pye' zaui: pye' ru qhug' nae" tho' khyid lo, majab lo:- apyad ato kao so' daui: ra" khyo vao ye: nae" ru wa ni" qhid' mae" je: gai: ra".

⁹Ni" myo,jid' yang ni" lam khug: myid re zai" phyo' nhao: ngad: re wa ai: myo,jid' re thad' shalhaui" pye' wa,- myo,jid' shid' shad' geim" we' myi: qid tham: mae" myi: mae pye' zaui: pye' ru qhug' nae" tho' myo,jid' dashad' za:- apyad ato kao so' daui: ra" khyo vao ye: nae" ru wa ni" qhid' mae" je: gai: ra".

¹⁰Ai: zoshao qe mae" dayaug re za: lhao" naonhaung" maphug' makhyad' makad' genae" qhid' mae" lha" ge,- ngo naonhaung" re ta" geli"- Mug:gaung dao mae ai: zoshao qe: mug: lagyo: jham wa mug:gaung: mung"dan: mae" nga" Pho" myo,khung: mae khonhae" re: qu" na: ako".

¹¹(Pe"mung:ga"re- Byu: Yao: Zo: wa byaug: lo" ra" mo, re khyad' yu nae" qhid' mae" joe" li" ru ngad:)[7]

¹²Byu dayaug yaug yao: qo" ra" yao dayo dau: mae" dadau: byaug: lo" lao"- aiyaug pe" ru: kad' nae" ein: naonhaung" jho ko" i? Yao: wa ai: dang: ra" yao gug xe: gug dau: re bam khyid mae zad zo: nhao: to: co' mung: byaug: byaug: ra" ai: yao re yeqho: yu: li" nae" mangad: i?

¹³Yao: wa ai: yao re yeqho: myao lao"- mabyaug: ra" yao gug xe: gug dau: re bau" ra" tho' ai: byaug: byaug: ra" yao dadau" ra" mathao mae je yang: ngaui bau" ra" ein: ngo naonhaung" re dang za: ta" ra".

¹⁴Ai we' dakhyo:- mug:gaung dao mae" naonhaung" Pho" re:- ai: zoshao qemae" dayaug yaug byaug seim" lo" nae" lhao" manug ngad: ra".

¹⁵Ni" mao:nhaung: pho" nao re shad' ngad: re wa yao: jhao" ye: mung: ni" shid' tao myo, nho zam" zaung: jo, yang: sae za: yao" qobo re ceim" shid' byid: wa, Ni" dao: re yao: tae" gyo" yu: ngad: re wa ni" mao nhaung: pho" we' nao qo" dam: jho" vang" ra".

¹⁶Ngadqere: ni" dao: re yao: matae" gyo: ngad: re wa nao qobo zhaug' ra" khyo alhab' ngad dang: rure boba nae" qhid' mae" jham: mugsug' mae ta" to" ru we' dakhyo:- sagse: shid' yaug- sam yaug re khai: jhui" ye: wa,-

¹⁷Yao: wa ai bam: dao: rere: matae" gyo: lao" wa phung: re ai: khyo alhab' yeta" kyo: wa, Phung: rere: yao: matae" gyo: lo: lao" kam" wa yao: re Mao"So maba: ra" yaug we' khang: khyui zo: yaug re we' dakhyo: to" pye' wa,.

¹⁸Ngo naonhaung" re dang za: ta" ru wa myid gaung dao mae naonhaung" tam" to" ra" gu: alhab' re- Mao"So wa mug:gaung dao mae re: tam" to" li" nae"- amung: myid gaung dao mae naonhaung" akhang" byid' ra" gu: alhab' rere:- mug:gaung dao mae akhang" byid' li" nae".

¹⁹Ai: tho' mae" ngo naonhaung" re dang za: ta" ru wa ce: myid gaung dao mae naonhaung" shid' yaug ko za: ngad yang: re: nhag' lam: qhan: mung:- akyu" mho' ra" ja: re mug:gaung dao mae na: ra" nga" Pho" wa yao: shid' zo: re byid' li" nae".

²⁰Pe"mung:ga"re nga" mang mae byu shid' sam yaug zang" ham: na ko" ra" phaung mae ngo wa yao: bam we' daga" na: ra"- ga: ta" ra".

²¹Alao" Petru wa- Yesu jhao" qui" lo mung:- Asang we"- nga" mao:nhaung: pho" wa ngore ana" na" shad' ngad: re- yao: re ngo khonho" lhang joe" sho' qobo khyad' byid: zai i? Nhad' lhang joe" sho' khyad' byid' zai i? ga: Yesu re myid' ra".

²²Yesu wa Petru re- nhad' lhang joe" sho' za: mangad:- nhad' xe lhang lhang mung:- nhad' lhang joe" sho' khyad' byid: ca"- ga: ta" ra".

²³Pe"mung:ga"re- mug:gaung: mung"dan: wa yao" jeim qe we' japhin: sho' nug: ra" kho:kham dayaug we' dau: ra".

²⁴Yao: wa japhin: sho' qhid: lo" we' ngaui myo: sho' kye' jhin de; ra" jeim dayaug re yao: jhao" jhui" lo: ako".

²⁵Ai: jeim wa jhin xe' nae" pe" maqo" lao"- kho:kham pho" wa ai: jeim pho" we' daga" yao: myi: yao: zo: qe we' qo" ra" zai alhab' re aung" pye' mung: jhin xe' vashao: ga: amyin" khyo" ke' ra".

²⁶Alao" ai: jeim pho" wa kho:kham pho" qhid' kheim: mae pad' thaug' thaug' mung:- ngore nhag' khyag' yu shi: la,- Jhin alhab' zaung: sho' ngo nao re xe' byid: nae"- ga: goe; mho' ra".

²⁷Kho:kham pho" wa yao: re nhag' khyag' yang:- yao" jhin alhab' re khyad' pye' byid: mung: phao nhao: ke' ra".

²⁸Ngadqere: yao: wa thug' lo" mung:- yao: re ngaui dayo jhin de, ra" yao" jeim byin cao: dayaug we' qhug' lao"- yao: wa aiyaug re zaui" yu mung: lang zang mae nhag' ci yang:- jhin phyad xe' la, ga: mho' ra".

²⁹Yao" jeim byin cao: wa pad' thaug' thaug' mung:- ngore nhag' khyag' yu shi: la,- Jhin alhab' zaung: sho' ngo nao re xe' byid: nae"- ga: mho' ra".

³⁰Ngadqere: yao: wa maqad ha: pye' mung: jhin alhab' re bin xe' sho' yao: re thaung: khug mae lhaung" to" ra".

³¹Airu re jeim gatau qe the' myao gelao"- yao: bam wa nhag' lam: qu" no gemung:- yao: bam the' myao: ra" gu: alhab' kho:kham pho" re lo" ta" kyo" ako".

³²Alao" kho:kham pho" wa ai: jeim re khai: yu mung:- makhyang" ra" jeim we"- nao ngore goe; mho' ruyang ni" jhin alhab' re ngo khyad' pye' byid: va".

³³Nao re ngo nhag' khyag' ru we' dakhyo: nao re: ni" jeim byin cao: pho" re nhag' gai: khyag' ra"- ga: ta" ra".

³⁴kho:kham pho" wa gyai nhag' yo: mung:- ai: jeim re jhin bin: xe' sho' thaung: khug mae lhaung" to" ra".

³⁵Airumung: naonhaung" khag' ngadqere: mao:nhaung: pho" shad' ra" qobo re gaigai: yao: makhyad' byid: ko" ngad: re wa mug:gaung dao mae na: ra" nga" Pho" re:- naonhaung" shad' ra" qobo re makhyad' byid: nae"- ga: ta" ra".