Read Maru MATHE 19 Bible Online

MATHE 19 - Maru bible

MATHE 19

¹Yesu wa ai: dao: jham re bin: ta" lao"- Galile mung" mae" thug' lo" mung:- Yodan gyaung: thoete' mae" Yuda mung" khyo joe" ye" ra".

²Byu phung: mo" zang wa yao" thao cao" ako"- aitau mae Yesu wa no phyo: qhug' ra" mo, re gai byid' ra".

³Pharishe qe damyo" li" mung:- yao: re jham" qu" ako". Pe" qobo khyo" ngad ngad yao: myid: o: ra" khyo"- yao" yham sang myhi" re gai: kao" pye' i? ga: myid' ako".

⁴Yesu wa tau: mung:- Phan" Asang wa sao qhid' maqhid mae yauggai we' myiqe: re phan" to" ra".

⁵Airumung: yauggai wa yao: myhi" yao: pho" re to: co' mung: yao" yham sang myhi" we' yezam" khug: na yang: yao: shid' tao wa dagaung dasho: za: boe" lo: li" genae".

⁶Alao" yao: shid' tao wa shid' zo: mangad: lo:- dayaug za: ngad: ra". Airumung: Mao"So: yang zham" to: va" rure byu: yang dazai" kao: ge- ga" ra" dao: re naonhaung" manghe' qu" ko" i? ga: ta" ra".

⁷Pharishe qe wa Yesu re Airu: ngad: re- kao: mugsug' tung" byid: yang: yao: yao" yham sang myhi" re kao" pye' nae" qhid' mae" Moshe wa pe"mung: amyin" byid' to: co' i? ga: myid' ako".

⁸Yesu wa tau: mung:- naonhaung" nhag' lam: qao ko" ruyang yao: yao" yham sang myhi" re kao" pye' nae" qhid' mae" akhang" byid' to" ru ngad: ra". Ngadqere: sao qhid' maqhid mae wa airu: mangad:- ngad: ra".

⁹Ngo naonhaung" re ta" geli"- Na: shad' ye, shad' ra" khyo" mangad: lo: gaja" qobo khyo" yang yao" yham sang myhi" re kao" pye' yang:- myiqe: gatau dayaug re lo, dam: xo' yu: ra" yaug khag' ngadqere: myi: shad' yaug ngad: ra" ga: ta" ra".

¹⁰Yao" mho"zo: qe wa Yesu re yham sang myhi" we' yham sang pho" agyo: mae ceru: ngad: re wa- lo, maxo' lo: na: re wa je: gai: ra"- ga: ta" ako".

¹¹Ngadqere: Yesu wa yao: bam re- lo, maxo' lo: byu yaug khao: ngo" maqo" na ko" ngad: ra"- Qo" na nae" jeju qo" khae: yu: ra" mo, za: aqo" na: ako".

¹²Pe"mung:ga"re damyo" wa yao: myhi" aung mae" yao: yauggai maboe" geyang: lo, maxo' ko" ngad: ra". Damyo" wa- byu: yang yauggai maboe" nae" thaug kad' pye' mung: yauggai maboe" gengad: ra"- Airumung: yao: bam wa lo, magai: xo' ko" ngad: ra". Gatau damyo" wa- mug:gaung: mung"dan: mathao mae lo, maxo' lo: na: ako"- Airumung: myi: mayu lo: qo" na: ra" yaug wa airu: na vashao:- ga: ta" ra".

¹³Alao" damyo" wa- zoshao qe: dao mae yao" lo, kai: byid: mung:- akyu" mho' byid: vashao: ga: zoshao qere Yesu jhao" jhui" li" ako". Ngadqere: mho"zo: qe wa yao: bam re lham: qeim: ako".

¹⁴Yesu wa- zoshao qere ngojhao" lo nhao: ke' ge,- yao: bam re datam" ge,- pe"mung:ga"re mug:gaung: mung"dan: wa airu" mo; mung"dan: ngad: ra"- ga: ta" ra".

¹⁵Yesu wa zoshao qe: dao mae yao" lo, kai: mung: yao: bam re shaman" byid' ra". Amung: yao: wa ai: jo, qo mae" thug' lo" ra".

¹⁶Alao"- qu" ge,- Byu dayaug Yesu jhao" li" mung:- Mho" Pho" we" apyad ato: kao so' qo" yu nae" qhid' mae" ngo gai: ra" mau" pe" kad' ca" i? ga: Yesu re myid' ra".

¹⁷Yesu wa yao: re- gai: ra" ja: we' sin: mung: nao ngore pe"mung: myid' i? Gai: ru wa dayaug za: na: ra". Nao apyad ato: kao so' qo" yu nug: ngad: re wa kham" to" tarha" re phug' cao" wa,- ga: ta" ra".

¹⁸Yao: wa Yesu re- Kham" to" ra" tarha" kholam: i? ga: myid' ra". Yesu wa tau mung:- Byu dase' wa,- su: myi: dalhad' wa,- su: zai dakhug'- madang: ra" sagse: dakham:-

¹⁹Ni" myhi" we' ni" pho" re phug' myao: wa,- ni" yham kyo: cao: re nao yao" gaung re jhid de; ru we' dakhyo: jhid'de; wa,- ga: ta" ra".

²⁰Ai: zolau: pho" wa Yesu re- Ai: kham" to" ra" tarha" jham alhab' re ngo phug' cao" va" ngo gatau pe" ja: kad' ca" shi" i? ga: ta" ra".

²¹Yesu wa yao: re- Nao wa qobo ta" nae" mabo lo" yaug boe" nug: ngad: re wa ni" jo,nho" alhab' re lo" aung" pye' mung: ai: ngaui jham re myaung sho" ra" mo, re gae byid: wa,- airulao" mug:gaung dao mae nao jo,nho" qo" li" nae"- amung: nga" thao cao" la,- ga: ta" ra".

²²Zolau: pho" wa ai: dao: re the' gyo: lao" nhag' lam: mapyo: lo: phao: lo" ra"- pe"mung:ga"re- yao: wa gyai qo" yaug ngad: ra".

²³Yesu wa yao" mho"zo: qere Ngo naonhaung" re dang za: ta" ru wa jo,nho" qo" yaug wa Mao"So: mung"dan: khyo vao ye: nae" qhid' mae" gyai qug' ra".

²⁴Ngo naonhaung" re dam: ta" geli"- Jo,nho" qo" yaug Mao"So: mung"dan: khyo vao ye: laui: ra" tho'- gola:u wa nghe' no: dung: khyo" vao: lai: lo" nae" ru wa je: laui shi" ra"- ga: ta" ra".

²⁵Mho"zo: qe wa ai: dao: re the' gyo: gelao"- yao: bam mug' hao" byaug mung:- Airu: ngad: re khyad' yu: ru khag' qhug' zai i? ga: ta" ako".

²⁶Yesu wa yao: bam re zhaug' qu" zo" re"- ceru wa byu: yang magai: boe" ngad: ra". Ngadqere: Mao"So wa alhab' re qo" boe" yaug ngad: ra".

²⁷Alao" Petru wa phaug' tau: mung:- ngonhaung" wa alhab' re to" pye' co' yang: ni" thao cao" va"- ngonhaung" pe" the' zai i? ga: ta" ra".

²⁸Yesu wa yao: bam re- ngo naonhaung" re dang za: ta" ru wa joe" lo nae" ra" pyad sag' mae Byu: Yao: Zo: wa phung qab bao byang" sheim: jo, ra" yao" zaung tao" mae zaung: jo, lao" nga" thao cao" mo, ngad: ra" naonhaung" daxe: shid' yaug re: zaung tao" daxe: shid' lam: mae bozaung: jo; mung: Israel byumyu" daxe: shid' kaung re eib: li" genae".

²⁹Alao"- khag' ngadqere:- nga" mathao mae yham- mao:nhaung:- nhae: mo"- myhi" pho"- zo:dau- yham dang: yokhyao:- re to: co' ra" yaug wa yao: to: co' ra" tho' dayo nho" qo" khae: yu: li" genae". Apyad ato: kao so' re: qo" yu: li" nae".

³⁰Ngadqere:- ana" qhid' au: mae ngad mo, myo: sho' wa thao khyo ngad: li" genae"- ana" thao mae ngad mo, myo: sho' kam" wa qhid' au: mae ngad: li" genae"- ga: ta" ra".