Read Maru MATHE 2 Bible Online

MATHE 2 - Maru bible

MATHE 2

¹Ana"- Herod kho:kham ban: Yuda mung" mae" Betlehem vogaung: mae Yesu bin: khau: li" thao- Qu" wa, ba thug' shad' mae" pha,jhi" bo: ra" mo, Yerusalem khyo joe" ye: mung:-

²Khau: li" va" Yuda kho:kham wa khotau mae ngad: ra" i? Ba thug'shad' mung"dan: mae yao" kyi re ngonhaung" the' myao yang: yao: re caung:pa" nae" qhid' mae" joe" li" ru ngad: ga: myid' ako".

³Herod kho:kham wa ai: dao: re the' gyo: lao"- yao: we' Yerusalem byu qe yaug khao: ngo" sang: gyo" kho" ako".

⁴Amung: Herod' kho:kham wa khinjaung qi: qe we' tung" pho" qere khai: zhang" yu mung: Meshia wa khotau mae khau: li" zai ngad: i? ga: yao: bam re myid' ra".

⁵Yao: bam wa yao: re- Yuda mung" mae" Betlehem vogaung: mae khau: li" zai ngad: ra". Pe"mung:ga"re lapa pho" yang ceru: tung" to" ra".

⁶Yuda mung" mae" Betlehem vogaung: we"- Nao wa Yuda mung" mae" vogaung: jham mae" ngai: thao" ra" mageim" vogaung: mangad:- Nga" amyu" Israel byumyu" re au: jhui" she nae" zug: wa nao mae" thug' li" zai ngad:- ga: bo: ra" ga: ta" ako".

⁷Alao" Herod wa pha,jhi" bo: ra" mo, re sae za: khai: yu mung: ai: kyi thug' li" ra" ayo, re jhaug' za: yao: bam mae" myid' yu mung: yang:-

⁸Yao: wa yao: bam re- Naonhaung" ye" lo" mung: ai: zoshao re nyang" za: yeqho ge,- naonhaung" ai zoshao re yeqho: myao gelao"- ngore: yao: re qo" goe; pa" nae" qhid' mae" ngore lodam: kyo: gela, ga: ta" mung: yao: bam re Betlehem khyo ye: nhao: ke' ra".

⁹Yao: bam wa kho:kham dao: re bin: gyo" yu lao" thug' ye" lo" ko" ra". Alao" qu" wa- ba thug' shad' mae" mung"dan: mae yao: bam myao: ra" ai: kyi re yao: bam dam: myao lao" yao: bam wa matho' ta" lo: sho' gyai ngaui bau" ako".

¹⁰Ai: kyi wa yao: bam: qhid' au: mae ye" lo" mung:- ai: zoshao na: ra" jo, qo dao mae vang" vang" lo" thang: ra".

¹¹Alao" Yao: bam yham khug khyo vao ye" lo" ko" re zoshao we' yao: myhi" Mari re yao: bam yemyao gelao" pad' thaug' thaug' mung: yao: re goe; pa" ko" ra". Yao: bam: jo,nho" thaung phung" mung: yang: qhang- Lo: ban:- Mura: jhaung qhu" jham yao: re phoe' byid' ako".

¹²Herod kho:kham jhao" madam: tug' lo" nae" qhid' mae" Mao"So wa yao: bam re yab mo, mae ta" peim: byid' ra". Amung: yao: bam wa- khyo gagau: khyo" yao: bam: mung" khyo dam: tug' lo" ako".

¹³Pha,jhi" bo: ra" mo, phao: lo" byaug gethao re- qu" wa,- Asang: Mug: Lagyo: dayaug yab mo, mae Yoseb jhao" thug' li" mung:- ai: zoshao ma: re jhui: mung: Egutu mung" khyo phao: ye: wa,- ngo nao re madam: khai khai wa aimae na: jo, wa,- pe"mung:ga"re Herod wa zoshao re se' pye' nae" qhid' mae" qho: li" nae"- ga: ta" ra".

¹⁴Alao" Yoseb wa to" mung: yang: zoshao ma: re jhui: mung: myi" re Egutu mung" khyo phao: ye" lo" ra". Amung: ai: mae Herod shid sho' yena: ra".

¹⁵Ceru wa- Nga" zo: re ngo Egutu mung" mae" khai: jhui" yu va"- ga: lapa: nhad' thoe khyo" ai: Asang ta" to" ru jab byang" li" nae" qhid' mae" boe" li" ru ngad: ra".

¹⁶Herod wa Pha,jhi" bo: ra" mo; yang yao: re mhug' pyag' to: co' vako" rure beim: lao" nhag' gyai yo" ra". Amung: yao: wa pha,jhi" bo: ra" mo, mae" myid' yu: ra" ayo, re tau" qu" mung" Betlehem vogaung: mae" we' avai: ayae mae" vogaung: jham mae na: ra" shid' zin we' shid' zin: o mae" zoshao yauggai nau" qe alhab' re cao" se' pye' nhao: ra".

¹⁷Aimung:- Rama jo, qo mae gyai nhag' kaug' nhag' qhui: ru we' kaug' ngug: ra" thoe re the' gyo: va". Rakhela wa yao: zo: qere ngug: na: ra". Yao: zo: bam mana lo: gemung: yang: yao: re nhag' maqo" tang" byid: lo: ga:-

¹⁸Lapa Yeremia yang ta" to" ra" dao: jab byang" lo: ra".

¹⁹Herod shid: byaug thao re Qu" ge,- Asang: mug: lagyo: dayaug wa Egutu mung" mae yab mo, mae Yoseb jhao" thug' li" mung:-

²⁰Yoseb re To" wa,- ai: zoshao ma: re jhui: mung: Israel mung" khyo dam: tug' lo" wa, Pe"mung:ga"re ai: zoshao re se' pye' nug: ra" mo, alhab' shid: byaug vako" ra"- ga: ta" ra".

²¹Alao" Yoseb wa to" mung:- zoshao ma: re jhui: yang: Israel mung" khyo dam: tug' lo" ra".

²²Ngadqere: Yuda mung" mae" Akelau wa yao: pho" Herod khu mae kho:kham kad' mung: eib: na: ga" rure Yoseb the' gyo: lao"- yao: wa ai: khyo vao ye: nae" gyaug: ra". Alao" yab mo, mae Asang: mug: lagyo: wa yao: re ta" peim: byid: yang: Galile mung" khyo ye" lo" mung: Nazared ga: mang: ra" vogaung mae yena: ra".

²³Airumung: yao: re Nazared Byu ga: mhang" li" genae" ga:- lapa qeyang ta" to" ra" dao: jab byang" lo: ra".