Read Maru MATHE 20 Bible Online

MATHE 20 - Maru bible

MATHE 20

¹Mao"So: mung"dan: wa ceru we' dau: ra". Byu dayaug wa yao" sabyi khyae mae mau" zaui: okaung lhaung nae" qhid' mae" ne, seim no' mae" thug' ye" lo" ra".

²Yao: wa mau" zaui: okaung qe we' ba na phug' daba re ngaui dakye' byid: nae" qhid' mae" jho" dang mung:- yao: bam re yao" sabyi khyae khyo ye: nhao: ke' ra".

³Ne, kao gug yo, qug ko re yao: wa gai jao: khyo dam: ye" lo" re mau" maqo" yang: mageim: ye; jo; bam ko" ra" byu damyo" re ye: myao: ra".

⁴Yao: wa yao: bam re- naonhaung" re: nga" sabyi khyae mae mau" zaui: ge,- ngo naonhaung" re man: qi" ra" ba na phug' byid: nae"- ga: ta" ra".

⁵Alao" yao: bam wa thug' ye" lo" ko" ra"- ai:thao re yao: wa daxe: shid' yo, qug mae dalhang- myi" thao sam yo, qug mae dalhang gai jao: khyo ye: mung:- mau" zaui: okaung yelhaung: ra".

⁶Myi" thao ngo" yo, qug ko re gai jao: khyo dam: ye" lo" re- byu gatau damyo" mageim: ye; jo; bam shiko" rure yedam: myao lao"- yao: wa yao: bam re- Naonhaung" Cetau mae daba geim" pe" makad' lo: mageim: ye; jo, ko" i? ga: myid' ra".

⁷Yao: bam wa ngonhaung" re khag' mali" lhaung ko" ngad: ra"- ga: tau" ako". Alao" sabyi khyae sang wa yao: bam re- airu: angad lao" wa naonhaung" re: nga" sabyi khyae mae mau" ye:zaui: ge,- ga: ta" ra".

⁸Myi" thao joe" lao"- khyae sang wa yao" mau" sang pho re- okaung jham alhab' re khai: yu yang: thao re mau" vao: ra" mo, mae" qhid mung: sao qhid' mau" vao: ra" mo, alhab' re okaung phug' sho' byid: wa,- ga: ta" ra".

⁹Mau" sang pho wa myi" thao ngo" yo, qug ko re mau" vao: ra" mo, dayaug re- ngaui dakye' kye' byid' ra".

¹⁰Sao qhid' no' mae" mau" vao: ra" mo, jhao" byid' joe" lo" lao"- yao: bam wa okaung phug' je: qo" nae" ga: myid: jho: ako". Ngadqere: yao: bam re: dayaug ngaui dakye' za: qo" yu: ako".

¹¹Alao" yao: bam wa khyae sang re- Ce: thao re mau" li" vao: ra" mo, wa dayo, qug za: mau" zaui" ako".

¹²Ngonhaung" wa ba zho wa te, ga" rumae daba geim" mau" zaui: va"- ngadqere: nao wa ngonhaung" re yao: bam re we' dakhyo: za: o:kaung phug' byid' ra"- ga: nyhung mung: ta" ako".

¹³Khyae sang wa sao qhid' mau" vao: ra" mo, mae" dayaug re- Ba nam pho we"- ngo nao re mavhan" zo: va" re- Nao wa daba re okaung phug' ngaui dakye' byid: nae" ein: jho" dang: rure myid vang" to: va" ra" mangad: i?

¹⁴Ni" okaung phug' yu: ci mung: phao: lo" wa,- Thao re mau" vao: ra" yaug rere: nao re we' dakhyo: ngo byid: nug: ra".

¹⁵Nga" ngaui re ngoyao: nug: ra" khyo" magai: kad' i? Ngo gai kad' rure nao myo, qu" zau" i? ga: ta" ra".

¹⁶Airumung: thao gyo" ra" mo, wa qhid' khyo ngad: li" genae"- Qhid' mae" mo, wa thao gyo" li" genae" ga: ta" ra".

¹⁷Yesu wa Yerusalem khyo do, ye" lo" na: au:- yao: wa mho"zo: daxe: shid' yaug re za: dajheim khyo khai: yu mung:- yao bam su" ye" lo" zo" re"-

¹⁸Qu" ge,- ngonhaung" wa Yerusalem khyo do, ye" lo" na: ru ngad:- aimae Byu: Yao: Zo: wa khinjaung qi: qe we' tung" pho" qe: lo, khyo ab byid' pye' ru qhug' li" nae"- yao: bam wa yao: re shid nae" qhid' mae" dao: phyid' mung:-

¹⁹Taung bug qe: lo, khyo ab byid' pye' li" genae"- Taung bug qe wa Byu: Yao: Zo: re jung" qi: pye' ru we' se' da: be, khyad' kad' yang: pyao: zang mae jin" se' pye' li" genae". Ngadqere: sam ba kyo thao re yao: wa shid: rumae" dam: daui: to" li" zai ngad:- ga: ta" ra".

²⁰Ai: thao Zebede yao: zo: tao: yao: myhi" wa- myo,nho mho' nae" qhid' mae" yao: zo: tao we' daga" Yesu jhao" li" mung: yao" qhid' kheim: mae pad' thaug' li" thaug' ra".

²¹Alao" Yesu wa yao: re nao pe" ja: o: i? ga: myid' ra". Yao: wa nao kho:kham boe" lao"-ce: nga" zo: shid' tao re ni" lo, yo shad' mae dayaug- ni" lo, kaung: shad' mae dayaug qo" zaung nae" qhid' mae" akhang" byid: wa,- ga: mho' ra".

²²Ngadqere: Yesu wa Naonhaung" pe" nam mho' na ko" rure naonhaung" maba ko" ngad: ra"- ngo shaug' nae" ra" ai: keim re naotao qo" shaug' genae" i? ga: tau" ra". Yao: tao wa qo" shaug'- ga: phaug' tau" ako".

²³Yesu wa yao: tao re- Ni" shid' tao gaigai: yao: nga" keim re qhug' shaug' li" genae"- ngadqere: nga" lo, yo shad' lo, kaung shad' mae" ru khyin: yu nae" akhang" ngo maqo"- ai wa nga" Pho" yang nyhang" to: byid' ra" mo; qhid' mae" za: ngad: ra"- ga: ta" ra".

²⁴Ai: khyo re gatau mho"zo: daxe yaug qhug' gyo: gelao"- yao: bam wa yao: shid' tao re nhag' yo" ako".

²⁵Airumung: Yesu wa mho"zo: qe alhab' re khai: zhang" yu yang: yao: bam re- Mao"So re malam: ra" mo, qemae" eib nae" akhang" qo" ra" mo, wa mung" byu qe: dao mae qam: so' we' eib: ako"- Zug: au: jhaung qere: kheim: so' qo" ko" rure naonhaung" ba: ako".

²⁶Naonhaung" gyo: mae kam" wa airu: magai: ngad. Naonhaung" mae" je: qi: nug: ra" yaug khag' ngadqere: yao: wa alhab' mo; daui daui yaug boe" ca".

²⁷Naonhaung" mae" au: jhaung boe" nug yaug khag' ngadqere: yao: wa alhab' mo; jeim boe" ca".

²⁸Byu: Yao: Zo: lhao" re: su re yam" zo: nae" qhid' mae" joe" li" ru mangad:- su re caung da" nae" we' byu myo: sho' re khyad' yu nae" qhid' mae" yao" kao so' re byid' pye' nae" ga: joe" li" ru ngad:- ga: ta" ra".

²⁹Yesu we' mho"zo: qe wa Yerikho vogaung: mae" thug' lo ko" au:- byu phung: mo" zang cao" ako".

³⁰Qu" ge,- myo, jid shid' yaug wa khyoyae mae zaung: jo; ako"- yao: shid' zo: wa Yesu su" lo: na: rure ba gelao"- Davi yao: zo: Asang we"- nga" shid' zo: re nhag' khyag' yu la, ga: zag: hug' ako".

³¹Mo, byu qe wa yao: shid' zo: re sae za: na nae" qhid' mae" qeim: ako". Ngadqere: yao: shid zo: wa Davi yao:zo: Asang we" nga" shid' zo: re nhag' khyag' yu la, wo"- ga: je: zag: hug' ako".

³²Yesu wa thang mung: yao: shid' zo: re khai: yu yang:- ni" shid' zo" qhid' mae" ngo pe" kad' byid: nae" o ko" i? ga: myid' ra".

³³Yao: shid' zo: wa Yesu re- Asang we"- nga" shid' zo: re myo, myao: li" nhao byid: la,- ga: mho' ako".

³⁴Yesu wa yao: shid' zo: re nhag' khyag' mung:- yao: shid' zo" myo,jid' re tin: byid' ra". Ailao" jao"- yao: shid' zo: wa myo, myao: li" mung:- yao" thao cao" ye" ako".