Read Maru MATHE 21 Bible Online

MATHE 21 - Maru bible

MATHE 21

¹Yesu we' mho"zo: qe wa Yerusalem khyo jhao" li" mung:- Zhan:lun: bam nhae mae" Betphage vogaung: khyo joe" lo: ako". Yesu wa mho"zo: shid' yaug re- ni" shid' yaug: qhid' au: mae" vogaung: khyo ye" lo" ge,-

²Ai: mae loze nau" jhui" ra" loze myhi" dadau: taui" to" rure yemyao: li" genae"- ai: loze nau" re pheim: yu mung: ngojhao" she: lo geri:-

³Byu dayaug yaug ni" shid' zo: re- loze Pe"mung: pheim ko" i? ga: myid' ngad: re- Asang ce shid' ma: re ci qo: ga"- ein: ta" ge,- ailao" jao" yao: wa ai: loze ma: re she: lo" nhao: li" nae"- ga: pyang mung: nhao: ke' ra".

⁴Ceru: boe" ru wa Ziun myiqe: nau" re ta" kyo: ge,- qu" wa,- ni" kho:kham pho" wa nau" nhae" xam: mag mung: loze dao mae zaung: ra". Loze nau" dao mae zaung mung: nao jhao" joe" li" ra"-

⁵ga: lapa pho" ta" to" ra" dao: jab byang" li" nae" qhid' mae" ngad: ra".

⁶Mho"zo: shid' yaug thug' ye" lo" mung:- yao: shid' zo: re Yesu ta" ke' ru we' dakhyo: yekad' ako".

⁷Yao: shid' zo: wa loze myhi" we' loze nau" re she: lo mung: loze dao mae yao: shid' zo" bau: qhang khyad' nhae: byid' ako". Yesu wa ai: dao mae do; zaung: ra".

⁸Ai: byu phung: mo" zang wa yao: bam: mai bau: jham re khyodang mae myhung: byid' ako"- Damyo" wa sag' dang" jham xe" yu mung: khyo mae myhung: byid' ako".

⁹Yesu qhid' au: mae su" ra" mo, byu qe we' yao" thao cao" ra" mo, byu qe wa zag: hug' mung:- Davi yao: zo: re Hosana ngad vashao:- Asang: mang we' joe" li" ra" yaug wa ngaui lho" vashao: wo"- ga: ta" ako".

¹⁰Yesu Yerusalem khyo vao ye" lo" au: re- vogaung: geim" mo,thaui: mo,yaug boe" li" mung:- ceyaug wa khag' ngad: ra" i? ga: myid' ako".

¹¹Alao" mo, byu qe wa tau: mung:- ceyaug wa Galile mung"- Nazared vogaung: mae" lapa Yesu ngad: ra"- ga: ta" ako".

¹²Yesu wa Caung:pa" Yham khyo vao ye: mung:- ai: mae zai aung: zai vai mo, re khe' thug' pye' ru we' ngaui tha" zo: mo; jaung: jham we' phaung" kyug' aung: zo: mo; tao" khau" jham rere: tau: phaug' sin" pye' byid' ra".

¹³Yesu wa yao: bam re- Nga" yham re akyu" mho' yham ga: mhang" li" genae"- ga: jham: mugsug' mae tung" to" ra". Ngadqere: naonhaung" wa aire damya, laug aug' kad' na: ako"- ga: ta" ra".

¹⁴Myo, jid qe we' khyid qeim mo, Caung:pa" Yham mae Yesu jhao" li" ako"- Yesu wa yao: bam re gai byid' ra".

¹⁵Khinjaung qi: qe we' tung" pho" qe wa Yesu kad' ra" mug' pho: mau" zo" re myao mung:- Davi yao: zo: re Hosana ngad vashao: wo"- ga: Caung:pa" Yham mae zoshao qe zag: hug' na ko" rure the' gyo: gelao"- nhag'qu" yo: geyang:-

¹⁶Yao: bam wa Yesu re- ai: zoshao qe pe" ta" na ko" rure nao the' gyo" i? ga: myid' ako". Yesu wa ngo the' gyo"- ga: tau" ra". Yesu wa yao: bam re- Nao wa zoshao qe we' nug' nau" qe: nhad' thoe khyo" caung: nghaui" nhao nae" yao: bam re mho" to" ava"- ga" ra" jham: dao: re naonhaung" manghe' qu" ko" i? ga: ta" ra".

¹⁷Yesu wa yao: bam re to: co' yang: ai: vogaung: mae" thug' lo" mung:- Bethani vogaung: mae ai: myi ye:yab: ra".

¹⁸Thao: ba ne, seim no' mae" Yerusalem khyo dam: vao lo: na: au:- Yesu wa vae: moe' ra".

¹⁹Khyoyae mae yaug: jo; ra" pho' ham" gae dagae re myao mung: yao: wa ai: pho' ham" gae khyo ye" lo" ra". Ngadqere: pho' ham" gae mae avho' reza: yemyao lao"- Yesu wa nao wa khonhae" re: ashi: mazaui: lo: vashao:- ga: pho' ham" gae re ta" ra". Ailao" jao"- ai: pho' ham" gae wa kyaug' shid: lo" byaug: ra".

²⁰Mho"zo: qe wa aire the' myao gelao" mug' hao" byaug: ako". Yao: bam wa Yesu re- Ai: pho' ham" gae wa khoru: mung: ai qhi" yao: phyad za: kyaug' shid: lo" byaug: laug i? ga: myid' ako".

²¹Yesu wa tau: mung:- ngo naonhaung" re dang za: ta" ru wa naonhaung" aug' o: myid mabo: ra" lam khug: myid bo ko" ngad: re wa ngo ce: pho' ham" gae re kad' ru we' dakhyo:- naonhaung" qo" kad' li" genae"- ai za: mangad:- ai: bam re- Bam nao qui" lo" mung: panglai: khug khyo gyang: vao lo" wa,- ein: ta" lao"- ta" ru we' dakhyo: boe" nae".

²²Naonhaung" lam" mung: akyu" mho' ko" ngad: re wa naonhaung" pe" mho' gengadqere: qo" khae: yu: li" genae"- ga: ta" ra".

²³Yesu wa Caung:pa" Yham khyo dam: tug' lo mung: mho" shid' byid' na: au: re- khinjaung qi: qe we' au: jhaung lau: de, qe wa Yesu jhao" li" mung: yao: re- Nao wa aijham re pe" kheim: so' khyo" yang kad' i? Nao re ai: kheim: so' byid: yaug khag' ngad: i? ga: myid' ako".

²⁴Yesu wa yao: bam re tau: mung:- ngore: naonhaung" re dao: dakheim: myid: nae"- naonhaung" aire phaug' tau: gelao" wa aijham re ngo pe" kheim: so' khyo" yang kad' rure ngo naonhaung" re ta" kyo: nae"- ga: ta" ra".

²⁵Yohan byid' ra" qid nyhab' wa khai: mae" ngad: i? Mao"So: kheim: so' khyo" yang ngad: i? Mangad: lao"- byu: kheim: so' khyo" yang ngad: i? ga: myid' ra". Ailao" yao: bam wa ngonhaung" pe" ru: ta" zai i? Mao"So: kheim: so' khyo" yang ngad: ra" ein: ngonhaung" ta" lao"- aire naonhaung" Yohan re pe"mung: malam" ko" i? ga: ta" li" nae".

²⁶Aimung: byu khyo" yang ngad: ra" ein: ngonhaung" tau: lao" re:- mo, byu qe wa Yohan re lapa ngad: ga: myid: lam: na ko" ruyang mo, byu qere ngonhaung" gyaug ca" ra" ga: yao: bam yao: cao: jho" qham: ako".

²⁷Alao" yao: bam wa Yesu re- ngonhaung" maba ga: tau" ako". Alao" Yesu wa yao: bam re- ngore: aijham re pe" kheim: so' khyo" yang kad' rure naonhaung" re ngo mata" nae"- ga: ta" ra".

²⁸Yesu wa naonhaung" pe" ru: myid ko" i? Byu dayaug wa yauggai zo: shid' yaug qo" ra". Yao: wa zoqhid' yaug jhao" ye: mung:- nga" zo: we"- ana" ba sabyi khyae khyo ye: mung: mau" yezaui: wa,- ga: ta" ra".

²⁹Yao: zo: wa yao: pho" re- ngo manug: ye: ga: tau: ngadqere: thao re yao: wa nhag' lam: tha" mung: sabyi khyae khyo ye" lo" ra".

³⁰Yao: pho" wa yao: nhaung: jhao" re: ye: mung:- azhao ta" ru we' dakhyo: yedam: ta" ra". Yao: wa Ngo ye: nae"- ga: tau" ra" ngad yang: re: yao: wa maye: ngad: ra".

³¹Ai: yauggai zo: shid' yaug mae" khoyaug lam: yao: pho" mho dao: re tae" gyo" ra" i? ga: myid' ra". Yao: bam wa zoqhid' yaug ngad: ra"- ga: tau" ako". Alao" Yesu wa ngo naonhaung" re dang za: ta" ru wa khang: gaug zo: mo, we' shava myhi" qe wa Mao"So: mung"dan: khyo naonhaung" qhid' au: mae vao ye" li" genae".

³²Pe"mung:ga"re Yohan wa naonhaung" re jo: ra" khyo re li" ceim" shid' byid: ngadqere:- naonhaung" wa yao: re malam" ko" ngad: ra". Ngadqere: khang: gaug zo: mo, we' shava myhi" qe wa yao: re lam" ako". Naonhaung" wa aire the' myao gesho' ngadqere: nhag' lam: tha" pye' mung: Yohan re malam" ko" ngad: ra".

³³Yesu wa yao: bam re dao: tau" gatau dalam: re tae" gyo: shige,- ga: ta" ra". sabyi khyae qho: zo" ra" mug: myid sang dayaug wa sabyi khyae qho" to: mung: aire khyae kyae" lhang" to: sabyi pyag' khung: dau" to:- gyebyu zaung dalam: myhae" to: mung: sabyi khyae ngho" zaui: mo, re ngho: byid' to: co' yang: gatau: mung" khyo gyaung: su" lo" ra".

³⁴sabyi shi: phyo' yo, joe" lao"- yao: wa yao" jeim qere khyae ngho" zaui: mo, jao" khyae ngho: phug' sabyi shi: mho' nhao: ke' ra".

³⁵sabyi khyae ngho" zaui: mo, wa yao" jeim qere lham: taung" yu yang:- be, yaug re be,- se' yaug re se'- laug baui: yang pye' se'yaug re pye' mung: kad' ako".

³⁶Khyae sang wa sao qhid' lhang tho' mae" jeim gatau myo: sho' re dam: nhao: ke' ra"- Khyae ngho" zaui: mo, wa azhao we' dakhyo: za: ai: jeim qere lham: kad' ko" ra".

³⁷Lo" thao" mae khyae sang wa nga" zo: re wa yao: bam lham: phug' myao: genae"- ga: ta" mung: yao: zo: re khyae ngho: zo: mo, jhao" nhao: ke' ra".

³⁸Ngadqere: khyae ngho" zaui: mo, wa khyae sang: yao: zo: re myao lao"- ceyaug wa khyae sang: nho: yham khaung sang nae" yaug ngad: ra"- lo geri:- yao: re se' pye' gelang:- yao" jo,nho" re ngonhaung" yu: pye' gelang:- ga: yao: cao: yao: jho" ta" ako".

³⁹Alao" yao: bam wa yao: re taung" yu yang:- khyae taung gaung khyo she: thug' lo" mung:- yao: re se' pye' ako".

⁴⁰Amung: khyae sang joe" li" lao"- yao: wa ai: khyae ngho" zaui: mo, re pe" ru: kad' li" nae" i? ga: myid' ra".

⁴¹Yao: bam wa tau: mung:- yao: wa ai: makhyang" ra" byu qere gaigai: yao: li" se' pye' li" nae"- amung: sabyi khyae rere: sabyi mhang" yo, re khyae ngho: phug' sabyi shi: man: man: za: byid' ra" gatau khyae ngho" zaui: mo, re ngho: byid' pye' li" nae"- ga: ta" ako".

⁴²Alao" Yesu wa yao: bam re Yham zhaug' mo, khyin: khyo" pye' ra" laug baui wa yham jheim mae" akhyag: thao" ra" laug baui boe" lo ra"- Ce wa Asang: yang kad' ru ngad: ra". Amung: ai wa ngonhaung" qhid' kheim: mae mug' pho: mau" ngad: ra"- ga" ra" jham: dao: re naonhaung" khonhae" re: manghe' qu" ko" i? ga: ta" ra".

⁴³Airumung: ngo naonhaung" re ta" geli"- Mao"So: mung"dan: re naonhaung" mae" qab: yu mung: ai: mung"dan: ashi: zaui: nae" byumyu" re byid' pye' li" nae".

⁴⁴Ai: laug zang dao mae gyo" lo" ra" yaug khag' ngadqere: adau dau gyug' lo" li" nae"- amung: dayaug yaug: dao mae ai: laug zang gyo" zag: lo" re wa yao: re aphaui: mhan" pye' li" nae"- ga: ta" ra".

⁴⁵Khinjaung qi: qe we' Pharishe qe wa Yesu dao: tau" jham re the' gyo: gelao"- Yesu wa yao: bam: khyo re ta" na: rure ba: gyo" yu: ako".

⁴⁶Airumung: yao: bam wa Yesu re taung: nae" khyo qho: ako". Ngadqere: Yesu re lapa ngad: ra" ga: myid: lam: na: ko" ra" mo, byu qere yao: bam gyaug: ako".