Read Maru MATHE 22 Bible Online

MATHE 22 - Maru bible

MATHE 22

¹Yesu wa dao: tau" jham ci yang: yao: bam re dam: ta" ra".

²Mug:gaung: mung"dan: wa ceru we' dau: ra". kho:kham dayaug wa yao: zo" lo,xo' poe re seim" jin" to: mung:

³ai: khai: to" ra" bang" vo qere lo,xo' poe khyo li" genae" qhid' mae" yao" jeim qere khai nhao: ke' ra"- ngadqere: yao: bam wa manug: li" ko" ngad: ra".

⁴kho:kham pho" wa Nga" poe wa zo: nae" jin" jin" ngad va"- nga" nung: jaung lo: jham we' zhe' to" ra" gug'nyhug'jham re: se' to: va"- Alhab' jin" va"- lo,xo' poe khyo li" gase, ga"- ein: khai: to" ra" bang" vo qere yeta" ge, ga: gatau jeim re dam: nhao: ke' ra".

⁵Ngadqere: khai: to" ra" bang" vo qe wa jeim qe li" ta" ko" rure pe" shui magyo" nho lo:- dayaug wa yothaung: khyo- gatau dayaug wa yao" phaga: mau" zo" khyo ye" lo" ko" ra".

⁶Gatau dang: ra" gu: wa- jeim qe re lham: taung" yu yang: be, mung: se' pye' ako".

⁷kho:kham pho" kam" wa nhag' gyai yo" ra". Amung: yao: wa yao" gyezo: jham re nhao: ke' mung: ai: byu se' ra" mo, re yese' nhao: ra". Yao: bam: vogaung: rere: ngha" pye' nhao: ra".

⁸Ai: thao re kho:kham pho" wa yao" jeim re khai: yu mung:- nga" poe wa jin" jin" ngad va"- ngadqere: ngo khai: to" ra" mo, wa ai: poe we' maman: qi" ko" ngad: ra".

⁹Airumung:- hau" mo" khyodang khyo ye: yang: naonhaung" the' myao: ra" mo, alhab' re yekhai ge, ga: ta" ra".

¹⁰Airumung: jeim qe wa hau" mo" khyodang khyo thug' ye" lo" mung:- yao: bam the' myao: ra" magai: ra" byu- gai: ra" byu alhab' mo, re khai: zhang" lo: ako". Ai: lo,xo' poe mae bang" vo jham byang" sho' zaung: bam: ako".

¹¹Alao" kho:kham pho" wa bang" vo qere qu" nae" qhid' mae" vao lo: ra". Yao: wa lo,xo' poe ve,mai ve,bau: mave; ra" byu dayaug re the' myao lao"-

¹²kho:kham pho" wa yao: re- ba nam pho" we"- nao wa lo,xo' poe ve,mai ve,bau: mave, lo:- khoru: mung: ce: poe khyo li" i? ga: myid' ra". Ngadqere: aiyaug wa pe" re: matau: lo: sae za: na: ra".

¹³Alao" kho:kham pho" wa yao" jeim qere khyid lo, re taui: mung: taung gaung shad' mug: cad' yo khyo yeshe: to: ge,- ai: jo, qo mae yao: wa ngug byid ngug nhe' we' zaui kyag' yang: na: li" nae"- ga: ta" ra".

¹⁴Pe"mung:ga"re- khai: yu qhug' ra" mo, myo: geyang: re: khyin: yu qhug' ra" mo, wa nang" ako"- ga: Yesu dao: pin" pye' ra".

¹⁵Ai: thao re Pharishe qe wa thug' lo" mung:- Yesu re yao" dao: thoe: yang Yao: re myi" nae" dao: myid: khoru: myid: nae" rure pha,jhi" khyug' ako".

¹⁶Amung: yao: bam wa yao: bam: mho"zo: qe damyo" we' Herod byu damyo" re Yesu jhao" nhao: ke' ako". Yao: bam wa Yesu re- Nao wa dangman" yaug ngad: ru we' Mao"So: khyo rere: dangman" ra" khyo" mho" shid' byid' ra". Nao wa khoyaug khokhyo" myid: jho nae" rure re:- pe" shui manho yaug- myo, nho nga: lao: makhyin yaug ngad: rure ngonhaung" ba:.

¹⁷Airumung:- nao khoru: myid: rure ta" la,- Roma khosin" re ngonhaung" khang: gai: byid' i? Magai: byid: i? ga: myid' ako".

¹⁸Ngadqere: Yesu wa yao: bam: makhyang" ra" nhag' lam: re beim: mung: yao: wa yao: bam re- Geim kad' mo, we"- naonhaung" ngore pe"mung: pha,jhi" khyug' yang: myid: ko" i?

¹⁹Ai: khang: ke' nae" ngaui kye' ngore qhu" gela,- ga: ta" ra". Alao" yao: bam wa Yesu jhao" ngaui dakye' cilo: ako".

²⁰Yesu wa yao: bam re- Ai: ngaui kye' mae khag' sulho we' khag' mang aso: de; ra" i? ga: myid' ra".

²¹Yao: bam wa khosin" sulho we' mang aso: ngad: ra"- ga: tau" ako". Yesu wa yao: bam re kho:sin" we' sin" ra" gu: wa kho:sin" re byid: ge, Mao"So we' sin" ra" gu: wa Mao"So re byid: ge,- ga: ta" ra".

²²Ai: dao: re yao: bam the' gyo: gelao"- yao: bam wa mug' hao" byaug: ako" alao" yao: bam wa Yesu re nha co' mung: lo" byaug: ako".

²³Ai: ba mae yao:- shid: rumae" dam: daui: to" li" ru majo, ga: ta" na ko" ra" Saduke qe damyo" Yesu jhao" li" mung:-

²⁴Mho" pho" we"- Byu dayaug yaug zo: dau maqo" lo: shid: lo" byaug: ngad: re- yao: nhaung: wa ai: yao: mao" cug' re dam: gaug mung: yao: mao" qhid' mae" nyaug xo' myhung byid: ca" ga: Moshe ngonhaung" re tung" to: byid: co' ra".

²⁵Ana"- ngonhaung" mae yao: mao: yao: nhaung: nhad' yaug na: ako". Mao: mo" yaug wa myi: dayaug lo,xo' yu: ra"- ngadqere: zo: dau maqo" lo: shid: lo" byaug: ra". Alao" yao: nhaung: yaug cug' dam: gaug: ra".

²⁶Mao: le; thao re sam yaug- airu: dayaug: thao dayaug yao: tao ho' nhad' yaug: geim" ai: myiqe: myhi" we' zam" mung: zo: dau maqo" lo: shid: lo" ko" ra".

²⁷Lo" thao" mae ai: myiqe: re: shid: lo" ra".

²⁸Yao: tao ho' alhab' yao: re lo,xo' yu: ako". Aire shid: rumae" dam: daui: to" li" ra" ba na mae yao: tao ho' nhad' yaug mae"- khoyaug: yham sang myhi" lam: ngad nae" i? ga: myid' ako".

²⁹Yesu wa yao: bam re- Naonhaung" wa Jham: mugsug' we' Mao"So: qam: so' re maba geyang:- shad' nghung" na: ako".

³⁰Pe"mung:ga"re shid: rumae" dam: daui to" li" gelao"- yao: bam wa myi: byid: myi: yu makad' lo: genae". Yao: bam wa mug:gaung dao mae" mug: lagyo: qe we' dakhyo: ngad: li" genae".

³¹Shid: lo" ra" mo, dam: daui: to" li" nae" ra" mo, we' sin: yang: ngo wa Abraham Mao"So- Isag nho: Mao"So- Yaku nho: Mao"So ngad:- ga: Mao"So ta" to" rure naonhaung" manghe' qu" ko" i? ga: myid' ra".

³²Mao"So wa shid: byaug va" mo, nho: Mao"So mangad: daui: na: ra" mo; nho: Mao"So ngad: ra"- ga: ta" ra".

³³Ai: dao: re mo, byu qe the' gyo: gelao"- gyo" mug' ako".

³⁴Yesu wa Saduke qere pe" dakheim: re: maqo" phaug' tau: losho' kad' pye' rure Pharishe qe the' gyo: gelao"- yao: bam wa Yesu jhao" zang" li" mung:-

³⁵yao: bam mae" tung" pho" dayaug wa- Yesu re jham" qu" zo" re"- Mho" Pho" we"-

³⁶Kham" to" ra" amyin" dao: mae" kholam: qi" thao" ru ngad: ra" i? ga: myid' ra".

³⁷Yesu wa- ai: Asang ni" Mao"So re- ni" aung khug nhag' lam:- ni" kao so' we' ni" myid nyan: ba: ru

³⁸alhab' yang jhid'de; wa,- ga" ra" amyin" dao: wa je: akhyag: ru we' je: qi" thao" ru ngad: ra".

³⁹Shid' lam: ein: ra" lam: wa- Ni" yham kyo: cao: re naoyao" gaung re we' dakhyo: jhid'de; wa,- ga" ru ngad: ra".

⁴⁰Ce: amyin" dao: shid' lam: wa- Moshe kham" to" ra" Tarha" alhab' we' lapa qe: mho" dao: alhab' ra" ajhaung ngad: ra"- ga: tau" ra".

⁴¹Amung: Pharishe qe zang" ham: na ko" au: Yesu wa- yao: bam re-

⁴²Naonhaung" wa Meshia re khoru: ein: myid: jho: na ko" i? Yao: wa khag' myid:zo: ngad: ra" i? ga: myid' ra". Alao" yao: bam wa- yao: wa Davi myid:zo: ngad: ra"- ga: tau" ako".

⁴³Yesu wa yao: bam re- airu: ngad: re- Davi wa Gyang" Lho" Byo jaung" yang: Meshia re pe"mung: Asang ga: ta" ra" i?

⁴⁴Pe"mung:ga"re- Davi wa Ni" gyevo qere ni" khyid vo: khug mae ngo mato: byid: byid: wa- nga" lo, yo shad' mae zaung: jo, wa, ga: ai: Asang wa nga" Asang re ta" ra"- ga: ta" to" ra".

⁴⁵Airumung: Davi wa Meshia re Asang- ga: ta" ngad: re wa Meshia wa Khoru: mung: Davi yao: zo: gai: ngad nae" i? ga: myid' ra".

⁴⁶Yesu re khag' re: pe" dakheim: lhao" maqo" phaug' tau: ko" ngad: ra". Ai: ba mae" Yesu re khag' pe" dakheim: re: mavae" myid: loko" ngad: ra".