Read Maru MATHE 23 Bible Online

MATHE 23 - Maru bible

MATHE 23

¹Ai: thao Yesu wa- mo, byu qere we' yao" mho"zo: qere-

²Tung" pho" qe we' Pharishe qe wa- Moshe nho: Tarha" re pheim: kyo: nae" kheim: so' qo" mo, ngad: ako".

³Airumung:- yao: bam ta" ra" gu: alhab' re naonhaung" tae" gyo: mung: phug' cao" ge,- ngadqere: yao: bam: ave, alai re dacao" ge,- pe"mung:ga"re yao: bam wa- yao: yao: kho" kyo" ru we' dakhyo:- macao" ngad: ako".

⁴Yao: bam wa- la: mung: vin qug' ra" qo re seim" mung: byu qere vin nhao: ako". Ngadqere:- yao: bam yao: wa ai: qo jham re lo, au" yang re: manug: tin: ko" ngad: ra".

⁵Yao: bam kad' ra" mau" zo" jham re su gaje the' myao genae" qhid' mae" kad' qhu" ako". Qu" ge,- Jham: dao: tung" ke' to" ra" shoqid: yang thaung kyab' nau" zo: khyab' mung:- ai: khug mae jham: mugsug' mae" dao: jham re tung" ke' to" ako". Amung: lo, kaung: shad' lo, pau" mae we' nga: lao: mae te' ci: ako".* Aijham re lu sho' qi: sho' kad' ve; ci mung:- yao: bam: bau: qhang athao mae ban byau: qhang sho' te' ve; ci: ako".

⁶Yao: bam wa poe mae je: gai: ra" zaung jo, qo mae zaung nug mo,- tarha" jung yham mae gatau jaung: to" ra" tao" khau" jham mae zaung nug mo, ngad: ako".

⁷Gai jao: gyo: mae su: yang lham: phug' myao: nae" o mo,- su: yang Rabai:[8] ga: mhang" byid: nae" o mo, ngad: ako".

⁸Ngadqere: naonhaung" kam" wa Rabai: ga: mhang" rure dangaui ge,- naonhaung" Mho" Pho" wa dayaug za: ngad: ra". Amung: naonhaung" alhab' wa mao:nhaung: qe ngad: ako".

⁹Naonhaung" wa ce: myid gaung dao mae khag' re ngadqere: Pho"- ein: damhang" ge,- naonhaung" yao: Pho" wa mug:gaung dao mae dayaug za: ngad: ra".

¹⁰Amung:- Au: Jhaung ga: mhang" nae" re: naonhaung" dangaui ge,- naonhaung" Au: Jhaung wa Meshia ga" ra" Au: Jhaung dayaug za: ngad: ra".

¹¹Naonhaung" phaung mae" je: qi" thao" ra" yaug wa- naonhaung" daui daui yaug boe" ca" nae".

¹²Yao: yao" gaung re caung:khin" nug: ra" yaug khag' ngadqere: khyo" pye' ru qhug' li" nae". Amung: yao: yao" gaung re khyo" pye' yaug kam" wa- caung:khin" byid' ru qhug' li" nae".

¹³Geim kad' ra" Pharishe qe we' tung" pho" qe we"- naonhaung" wa byuxa: vaqoe, qhug' ako". Pe"mung:ga"re byu qe mug:gaung: mung"dan: khyo vao ye: nae" seim" lao" naonhaung" wa ai: kham: dung: re pyid' pye' ako". Ngadqere: naonhaung" yao: re: mavao ye:- vao ye: nae" qam: ke' mo, rere: naonhaung" mavao ye: nhao ko" ngad: ra".

¹⁴Geim kad' ra" Pharishe qe we' Tung" pho" qe we"- naonhaung" wa byuxa: vaqoe, qhug' ako". Pe"mung:ga"re naonhaung" wa cug' mo" qe: yham zai yokhyao: jham re phyo' zo: lhad' zo" ci yang:- su qu" gai nae"- geim kad' mung: akyu" qhang sho' mho' mo, ngad: ako". Airumung: naonhaung" wa je: qi" ra" dao: phyid' ru qhug' li" genae".

¹⁵Geim kad' ra" Pharishe qe we' Tung" pho" qe we"- naonhaung" wa byuxa: vaqoe, qhug' ako". Pe"mung:ga"re- naonhaung" wa phung: byu dayaug qo" poe" yu nae" qhid' mae" qid khyo"- taung khyo" su" gam" qin" mung:- phung: byu dayaug qo" poe" yu lao" re:- naonhaung" wa aiyaug re- naonhaung" tho' shid' zhao" myi:qid tham: khyo gyo" lo" nae" man: qi" ra" yaug boe" nhao: ako".

¹⁶Khyo jhui" ra" myo, jid qe we"- naonhaung" wa byuxa: vaqoe, qhug' ako". Khag' ngadqere: Caung:pa" Yham re lao: mung: jham tang" re wa- ai wa madang ca"- ngadqere: Caung:pa" Yham mae" qhang re lao: yang: jham tang" ngad: re wa- ai wa dang ca"- ga: naonhaung" ta" ako".

¹⁷Ago myo,jid qe we"- Kholam: je: akhyag: i? Qhang i? Mangad: lao"- qhang re gyang" lho" nhao: ra" Caung:pa" Yham lam: i?

¹⁸Amung: naonhaung" wa byu dayaug yaug phan re lao: mung: jham tang" ngad: re- ai wa madang ca"- ngadqere: ai: phan dao mae" ngaui" xeim: re jham tang: lao" wa- ai wa gaigai: dang ca"- ga: ta" ako".

¹⁹Myo, jid qe we"- Kholam: je: akhyag: i? Ngaui" xeim: i? Mangad: lao"- ngaui" xeim: re gyang" lho" nhao: ra" phan lam: i?

²⁰Phan re lao: mung: jham tang" ra" yaug wa- phan re we' ai: dao mae jo; ra" ja: alhab' rere: lao: yang: jham tang" ru ngad: ava".

²¹Ai: Caung:pa" Yham re lao: yang: jham tang: yaug re: Caung:pa" Yham mae we' ai: mae na: ra" Asang rere: lao: yang: jham tang" ru ngad: ava".

²²Mug:gaung re lao: yang: jham tang: yaug wa- Mao"So: zaung tao" we' ai: mae zaung: jo, yaug rere: lao: yang: jham tang" ru ngad: ava".

²³Geim kad' ra" Pharishe qe we' tung" pho" qe we"- naonhaung" wa byuxa: vaqoe, qhug' ako". Naonhaung" wa shaban sham: nhang:- ban gya pajhi" jham re daxe bam mae" dabam Mao"So re byid: gengad yang: re:- ai: kham" to" ra" Tarha" dao: mae" je: akhyag: ra"- tarha" din: vang" ru- nhag' khyag' ru we' din:man" ru jham re wa naonhaung" to" pye' ko" ra". Naonhaung" wa alhab' re dakhyo: za: phug' cao" ko" ngad: re wa gai: ra".

²⁴Khyo jhui" ra" myo, jid qe we"- naonhaung" wa shaug' qid mae" pyab' re wa kyae" pye' mung:- gola:u re wa myug: pye' ako".

²⁵Geim kad' ra" mo, Pharishe qe we' tung" pho" qe we"- naonhaung" wa byuxa: vaqoe, qhug' ko" ra". Naonhaung" wa ai: keim kang:- ban khug' jham re adao shad' mae cid' shao: pye' gengadqere: akhug shad' mae wa- myo, nyad o:byid: ru we' se' da: be, khyad' ru byang" jo; ra".

²⁶Myo, jid Pharishe qe we"- Keim akhug shad' re shi" sao qhid' cid' san: pye' ge,- ailao" wa adao mae" re: san: lo" li" nae".

²⁷Geim kad' ra" Pharishe qe we' Tung" pho" qe we"- naonhaung" byuxa: vaqoe, qhug' ako". Naonhaung" wa adao shad' mae qu" yaung" sho' laug man gyad: to" ra" lab zao jham we' dau: ako" ngad yang: re: akhug mae wa shoqug: thaung: jham we' mao gaung bab jham byang" jo; ako".

²⁸Ai we' dakhyo:- naonhaung" wa adao shad' su: qhid' kheim: mae din:man: mo, ru" ru ngad geyang: re: nhag' lam: khug mae geim kad' ru we' qobo mau" za: byang" sheim: jo; ra".

²⁹Geim kad' ra" Pharishe qe we' tung" pho" qe we"- naonhaung" wa byuxa: vaqoe, qhug' ako". Naonhaung" wa Lapa qe: lab jham re zao byid' ako".

³⁰Amung: ngonhaung" wa- phug' phyid' pyad mae naonhaung: qe bo:bo: ngad: re wa- lapa qere se' ra" mau" zo" mae bo:bo: zai mangad:- ga: ta" ako".

³¹Ai: ruyang naonhaung" wa- lapa qere se' pye' ra" mo; yao: myid: yao: zo: qe ngad ko" rure gaigai: yao: naonhaung" tau" yu: avako".

³²Airumung:- naonhaung" phug' phyid' qeyang qhid: to: byid: co' ko" ra" mau" re bin sho' naonhaung" xo' yang: kad' ge,

³³Lhao maui jham we' Lhao maui: myid:zo: qe we" Naonhaung" wa myiqid tham: mae" khoru: qo" phao: loe, genae" i?

³⁴Airumung: ngo naonhaung" re ta" geli"- ngo wa lapa qe pha,jhi" bo mo,- Tung" pho" qere naonhaung" jhao" nhao: ke' nae". Naonhaung" wa yao: bam mae" daqhae: re se' pye' mung:- daqhae: re wa pyao: zang mae jin" se' pye' li" genae" gatau daqhae: re wa tarha" jung yham jham mae taui" be, mung:- daqhae: re wa davo mae" davo khyo khe' taung" pye' li" genae".

³⁵Qobo maqo" ra" Abela mae" Caung:pa" Yham we' phan gyo: mae naonhaung" se' pye' ra" Barakhia yao: zo: Zakari joe" sho' qobo maqo" mo, re se' ra" yug: alhab' wa naonhaung" au: dao mae joe" lo nae".

³⁶Ngo naonhaung" re dang za: ta" ru wa- Ai: byu se' ra" qobo alhab' wa- ana" pyad mae" byu qe qhug' kham zo: genae".

³⁷Yerusalem we"- Yerusalem we"- Lapa qere se' pye' mung: Mao"So: yang nao jhao" nhao: ke' ra" lagyo: qere laug baui: yang pye' se' ra" vogaung: we"- Qo, zang wa qo, nau" jham re yao" daung khug mae zhang" to" ru we' dakhyo:- ni" vobyu qere nga" lo, khug mae zhang" to: nae" ngo khonho" lhang qam: ke' ngadqere: nao maqad ngad: ra".

³⁸Airumung:- ni" Caung:pa" Yham wa shapye' pye' ru qhug' mung: akeim ngad: jo; li" nae".

³⁹Nao re ngo ta" ru wa- Asang: mang we' joe" li" ra" yaug wa ngaui lho" vashao: wo"- ga: nao mata" ta" wa- ana" mae" thoegu: nao ngore maqhug' myao lo nae"- ga: ta" ra".