Read Maru MATHE 25 Bible Online

MATHE 25 - Maru bible

MATHE 25

¹Ai: ayo, mae- mug:gaung: mung"dan: wa ceru we' dau: li" nae". Zomyi: daxe yaug wa yao: bam: xau myibaung: re yu: ci mung:- pho" sag' re yetug: yu nae" thug' ye" lo" ako".

²Yao: bam mae" ngo" yaug wa qag mo, ngad mung: ngo" yaug: gu: wa maqag mo, ngad: ako".

³Maqag mo, wa yao: bam: myibaung: jham re yu: ci gengad yang: re: xau ajan" mabo: yu: vin ko" ngad: ra".

⁴Qag mo, kam" wa- yao: bam: myibaung: we' daga" xau ajan" re boyu: vin: ako".

⁵Alao" pho" sag' joe" li" nae" thao gyo" mung:- yao: bam alhab' mo, yab nghoe" nghoe" yang: yab: myhid' bam: ako".

⁶Gae gaung: myi: joe" lao"- Qu" ge, Pho" sag' joe" li" va"- yetug: yu gese,- ga: hug' thug' li" ra".

⁷Alao" zomyi: jham alhab' to" mung: yao: bam: myibaung: jham re myi: te' ako".

⁸Ai: maqag: ra" zomyi: qe wa qag: ra" zomyi: qere- ngonhaung" myibaung: shid: lo" na: ra"- amung: naonhaung" myibaung: xau ngonhaung" re dajhid' byid: gela,- ga: mho' ako".

⁹Ngadqere: ai: qag: ra" zomyi: qe wa tau: mung:- naonhaung" qhid' mae" we' ngonhaung" qhid' mae" ga" re wa ai: xau malaug nae". Amung: xau aung: mo, jhao" mae" naonhaung" qhid' mae" xau yevai: yu ge,- ga: ta" ako".

¹⁰Ai: maqag: ra" zomyi: qe xau vai ye" lo" ra" gyo: mae- pho" sag' joe" li" mung:- ai: jin" jin" seim" na: ra" zomyi: qe wa pho" sag' we' daga" lo,xo' poe khyo vao ye" lo" mung:- kham: pyid' pye' ako".

¹¹Ai: thao re- ai: maqag: ra" zomyi: qere: dam: joe" li" mung:- Asang we"- Asang we"- ngonhaung" re kham: phung" byid: la,- ga: yao: ako".

¹²Ngadqere: pho" sag' wa Ngo naonhaung" re dang dang za: ta" geli"- naonhaung" re ngo maba- ga: tau" ra".

¹³Pe"mung:ga"re- naonhaung" wa ai: ba na we' ayo, re maba ko" ruyang lha" mung: lhaug' na ge,- ga: Yesu dao: pin" ra".

¹⁴Ai: ayo, mae mug:gaung: mung"dan: wa ceru we' dau: li" nae". Byu dayaug wa gyaung: su" lo" nae" seim" lao"- yao: wa yao" jeim qere khai: yu mung:- yao: bam re yao" jo,nho" ab byid: co' ra".

¹⁵Dayaug re ngaui ngo" joe:- dayaug re shid' joe:- gatau dayaug re dajoe: kad' mung: yao: bam: qam: o: re cao" yang: ab byid: co' yang: yao: wa gyaung: su" lo" ra".

¹⁶Ngaui ngo" joe: qo" yu: ra" yaug wa ai lao" jao" thug' ye" lo" mung:- ai: ngaui jham: yang phaga: yekad' yang: yao: wa gatau ngaui ngo" joe: gau pai: the' yu: ra".

¹⁷Ai we' dakhyo:- ngaui shid' joe: qo" yu: ra" yaug re:- phaga: yekad' mung: ngaui gau pai: shid' joe: the' yu: ra".

¹⁸Ngadqere:- ngaui dajoe: qo" yu: ra" jeim wa thug' ye: mung: dungkhung: dau: yang: yao" Asang: nho: ngaui re nyhab' to" ra".

¹⁹Dayo, kyo thao re ai: jeim qe: Asang wa dam: tug' lo mung:- yao: bam we' ngaui japhin: losho' ra".

²⁰Ngaui ngo" joe: qo" yu: ra" yaug wa gatau ngaui gau pai: ngo" joe: re cili" mung:- Asang we"- nao ngore ngaui ngo" joe: ab byid: co' ra"- Qu" wa,- ngo wa ngaui ngo" joe: gau pai: the' yu va"- ga: ta" ra".

²¹Alao" Asang wa gai va"- gai: ru we' kyid: ra" jeim we"- nao wa bun ngaui dajhid' za" rumae kyid: ra". Amung: ngo nao re bun ngaui myo: sho' ab byid: nae"- nga" ngaui bau" rumae li" boleim ri:- ga: ta" ra".

²²Ngaui shid' joe: qo" yu yaug re: ngaui gau pai: shid' joe: re cili" mung:- Asang we"- nao wa ngore ngaui shid' joe: ab byid: co' ra". Qu" wa,- ngo wa ngaui gau pai: shid' joe: the' yu va"- ga: ta" ra".

²³Alao" Asang wa gai va"- gai: ru we' kyid: ra" jeim we"- nao wa bun dajhid' za" rumae kyid yaug ngad: ra". Amung: ngo wa nao re bun ngaui myo: sho' ab byid: nae"- nga" ngaui bau" rumae li" boleim" ri:- ga: ta" ra".

²⁴Ai: thao re ngaui dajoe: qo" yu: ra" yaug wa joe" li" mung:- Asang we"- nao wa gyai qhag' yaug ngad: ru we' nao maqho" to" ra" jo, qo mae" yad: yu nug yaug- nao masin" to" ra" jo, qo mae" yad: zhang: yu nug yaug ngad: rure ngo ba:.

²⁵Ngo wa gyaug yang:- ni" ngaui joe: re myid gaung mae yedau" nyhab' to"- Qu" wa,- ni" ngaui cemae jo; ra"- ga: ta" ra".

²⁶Alao"- yao" Asang wa Makhyang" ru we' noe" ra" jeim we"- ngo wa maqho" to" ra" jo, qo mae" yad: yu nug: ru we' masin" to" ra" jo, qo mae" zhang: yu nug: ra" yaug ngad: rure nao ba: ra".

²⁷Airu: ngad: re- nao wa nga" ngaui re ngaui jhi mae yeke' to: ang: ra". Ngo dam: tug' joe" lo lao"- ai: bun ngaui we' daga" gau pai: ngaui re ngo dam: qo" yu zai ngad: ra".

²⁸Airumung: yao" lo, mae" ngaui joe: re yu mung: daxe joe: qo" ra" yaug re byid: ge,-

²⁹Pe"mung:ga"re- qo" ra" yaug wa laung: byid' ru qhug' mung: yao: wa magan: mago" je: qo" li" nae". Maqo" ra" yaug mae" kam" wa- yao: qo" ra" gu: alhab' re lhao" yu: pye' byid' ru qhug' li" nae".

³⁰Ai: lam maga" ra" jeim gao: re wa taung gaung shad' mug: cad' yo khyo khe' thug' pye' ge,- ai: mae yao: wa ngug byid ngug nhe' we' zaui kyag' yang: na: li" nae"- ga: ta" ra".

³¹Byu: Yao: Zo: wa yao" phung qab bao we' mug: lagyo: jham alhab' we' daga" kho:kham khyo" joe" li" lao"- yao" kho:kham zaung tao" dao mae zaung: jo; li" nae".

³²Alao"- byumyu" cao jab alhab' wa yao" qhid' kheim: mae ham: phaung: na: bam: li" genae". Yao zaung" yaug wa yao we' cad' be, jham re gatau tau kho' to" ru we' dakhyo:- Byu: Yao: Zo: re: byu qere phung: kho' to" li" nae".

³³Amung: yao: wa din:man" ra" mo, re yao" lo, yo shad' mae- makhyang" ra" mo, re yao" lo, kaung: shad' mae nha: to" li" nae".

³⁴Ai: thao re kho:kham pho" wa ai: lo, yo shad' mae" mo, re- Nga" pho" nho: shaman" jeju re qhug' khae: yu: ra" mo, we"- Lo geri:- Mug:myid phan" to" ra" ba na mae" naonhaung" qhid' mae" nyhang" jaung: to" ra" mung"dan: re kham: yu ge,-

³⁵Pe"mung:ga"re- ngo vae: moe' ra" au: re naonhaung" ngore byid: zho" ako". Ngo qid shab' ra" au: re naonhaung" ngore qid byid: jhaug' ako". Ngo bang" vo ngad: ra" au: re naonhaung" ngore bang" da" byid' ako".

³⁶Ngo gaung pyad' ngad: au: re- naonhaung" ngore mai bau: byid: vhe' ako". Ngo no phyo: qhug' au: re- naonhaung" ngore gun caung: ako"- ngo thaung: laung" jo; au: naonhaung" ngore li" kam: vako" ra"- ga: ta" ra".

³⁷Alao" din:man" ra" mo, wa- yao: re tau: mung:- Asang we"- nao vae: moe' rure ngonhaung" khonhae" myao yang: nao re byid: zho: geli" laug i? Nao qid shab' rure ngonhaung" khonhae" myao yang: nao re qid byid: jhaug' geli" laug i?

³⁸Nao bang" vo ngad: rure ngonhaung" khonhae" myao yang:- nao re bang" da" byid' lai: lo geli" laug i? Nao gaung pyad' na: rure ngonhaung" khonhae" myao yang: nao re mai bau: vhe' geli" laug i?

³⁹Nao no phyo: qhug' rure ngonhaung" khonhae" myao yang nao re gun caung byid'lai: lo geli" laug i? Nao thaung: laung" jo; rure ngonhaung" khonhae" myao yang: nao re li" kam: geli" va" laug i? ga: ta" ako".

⁴⁰Alao" kho:kham pho" wa Ngo naonhaung" re dang za: ta" ru wa Ce: nga" mao:nhaung: qe mae" je: ngai: thao" ra" yaug re naonhaung" gun caung: ru wa ngore gun caung: ru ngad: ava".- ga: ta" li" nae".

⁴¹Ai: thao re kho:kham pho" wa yao" lo, kaung: shad' mae" mo, re- Mao"So: nhang: kheim: zao" ra" mo, we"- nga" qhid' kheim: mae" thug' lo" ge,- ai: yui Satan we' yao" lagyo: jham: qhid' mae" nyhang" jaung: to" ra" apyad ato: myiqid tham: khug khyo vao ye: ge,-

⁴²Pe"mung:ga"re- ngo vae: moe' au: naonhaung" ngore mabyid: zho: ko"- ngo qid shab' au: naonhaung" ngore shaug' qid mabyid: jhaug' ko"-

⁴³Ngo bang" vo ngad: au:- naonhaung" ngore bang" mada" byid: ko"- ngo gaung pyad' na: au:- naonhaung" ngore mai bau: mavhe' ko"- ngo no phyo: qhug' ru we' thaung: laung" jo; au:- naonhaung" ngore magun caung ko" ngad: ra"- ga: ta" ra".

⁴⁴Alao" yao: bam wa Asang we"- nao vae: moe' ru- qid shab' ru- bang" vo ngad: ru- gaung pyad' na: ru- nao no phyo: qhug' ru- thaung: laung" jo; rure ngonhaung" khonhae" myao yang: nao re ngonhaung" macaung da" byid: geli" laug i? ga: ta" li" genae".

⁴⁵kho:kham pho" wa ngo naonhaung" re dang za: ta" ru wa je: ngai: thao" ra" cebam mae" dayaug yaug re naonhaung" magun macaung ko" ru wa ngore magun macaung: ru ngad: ava"- ga: ta" li" nae".

⁴⁶Alao" yao: bam wa apyad ato: qobo dae kham zo: nae" khyo vao ye: mung:- din:man" ra" mo, kam" wa apyad ato: kao so' daui: ra" khyo vao ye" li" genae"- ga: ta" ra".