Read Maru MATHE 28 Bible Online

MATHE 28 - Maru bible

MATHE 28

¹Dugno: Ba: thao: ba- Laban ba ne, seim myo, phye: phye: myao: li" au: re- Magadala Mari we' gatau Mari tao wa- lab kam: nae" ga: lab khyo ye" lo" ako".

²Qu" ge,- ai: mae nyag din taung" myid lab: qi: sho' lab: li" ra". Asang: mug: lagyo: dayaug wa mug:gaung mae" gyo" li" mung: lab kham: mae" laug baui re tau: lhang" pye' yang: ai: laug baui dao mae zaung: jo; ra".

³Yao" myo,khung: wa lhe' cad' we' dau mung: yao" mai bau: wa gyu: ru: phyu: ra".

⁴Zaung" na mo, wa gyaug: din: nin" mung:- byu shid we' dakhyo: mo; byaug: ako".

⁵Mug: lagyo: wa ai: myiqe: tao re- Ni" shid' yaug dagyaug ge,- ni" shid' yaug wa pyao: zang mae jin" se' pye' ra" Yesu re qho: na ko" rure ngo ba:-

⁶Yao: cetau mae mana lo:- yao: ta" ru we' dakhyo: dam: daui: to" lo" byaug va"- li" geri:- yao: lang" jo, co' ra" jo, qo re li" qu" ge,

⁷ana" phyad za: lo" mung: yao" mho"zo: qere yao: wa shid: rumae" dam: daui: to" li" va"- yao: wa naonhaung" qhid' au: mae Galile mung" khyo ye" lo" na: li" nae"- aitau mae naonhaung" yao: re myao: li" genae" ga" ein:- yeta" kyo: ge,- ngo ta" ra" dao: re ni" shid' yaug xam" ci ge,- ga: ta" ra".

⁸Yao: shid' yaug wa gyaug ngadqere:- gyai ngaui bau" ru we' ai: lab mae" phyad za: thug' lo" mung: yao" mho"zo: qere ta" kyo: nae" qhid' mae" tao" lo" ako".

⁹Alao" Yesu wa nyag din taung" yao: shid' yaug jhao" li" mung:- Yaug yo: na ge,- ga: ta" ra". Yao: shid' yaug wa Yesu jhao" qui" ye: mung: Yesu khyid re yezaui" ci yang: yao: re goe; pa" ako".

¹⁰Yesu wa yao: shid' yaug re dagyaug ge,- nga" mao:nhaung: qere Galile mung" khyo ye" lo" genae" qhid' mae" yeta" kyo: ge,- aitau mae yao: bam ngore qhug' myao: li" genae"- ga: ta" ra".

¹¹Yao: shid' yaug ye" lo" na ko" au:- lab zaung" ra" mo, damyo" wa vomo" khug khyo dam: tug' vao lo mung: khinjaung qi: qere boe" ra" ru alhab' lota" kyo" ako".

¹²Alao" khinjaung qi: qe we' lau: de, au: jhaung qe wa qham yang: byin phyo: nyang pha,jhi" bin: khyug' mung:- gyezo: qere ngaui myo: sho' byid: mung: yang:-

¹³myi" re ngonhaung" yab: myhid' jo; au:- yao" mho"zo: qe li" mung: yao" mao gaung re li" khug' cilo" byaug ko" ra"- ein: naonhaung" ta" ge,-

¹⁴Cera" khyo re mang: zug: pho" the' gyo: lao" re:- naonhaung" qobo maqo" ra" khyo mang: zug: pho" re lam" sho' ngonhaung" jhu" nae"- naonhaung" pe" gaung yug maca" nae"- ga: ta" ako".

¹⁵Gyezo: qe wa ai: ngaui re yu: yu mung: khinjaung qi: qeyang yao: bam re mho" ke' ru we' dakhyo: ta" ako". Gyezo: qe ta" ra" lau dao: wa ana" ba joe" sho' Yuda byumyu" qemae hau" nhao" lo" ako".

¹⁶Alao" ai: mho"zo: daxe: shid' yaug wa Yesu yao: bam re pyang: to: co' ru we' dakhyo:- Galile mung" mae" bam dao khyo do, ye" lo" ako".

¹⁷Yao: bam wa Yesu re myao lao"- yao: re goe; pa" ako". Ngadqere: daqhae: wa aug' o: myid bo: ako".

¹⁸Yesu wa yao: bam jhao" qui" ye: mung:- yao: bam re Mug:gaung dao mae re:- myid gaung dao mae re: eib nae" kheim: so' alhab' ngore ab byid' to: va" ra".

¹⁹Airumung:- naonhaung" wa thug' ye" lo" mung: byumyu" cao jab alhab' re nga" mho"zo: boe" nhao ge,- amung: Yao: Pho"- yao: Zo:- Gyang" Lho" Byo: mang mae qid nyhab' byid: mung:-

²⁰Ngo naonhaung" re pyang: to" ra" amyin" dao: alhab' re phug' cao" genae" qhid' mae" yao: bam re mho" shid' byid: ge,- ngo wa mug: myid thao" sho' naonhaung" we' khonhae" re: daga" na nae"- ga: ta" ra".