Read Maru MATHE 4 Bible Online

MATHE 4 - Maru bible

MATHE 4

¹Ai: thao re yui: yang ju" phyo' ru qhug' vashao: ga: Gyang" Lho" Byo wa Yesu re din"pyad' yo khyo jhui" vao ye" ra".

²Byid xe myi byid xe ba zo:ve jao" thao re- Yesu wa vae: moe' ra".

³Alao" yui wa Yesu jhao" li" mung: Nao Mao"So: Yao: Zo: ngad: re wa ce: laug baui jham re mug boe" li" geshao: amyin" byid: wa,- ga: ta" ra".

⁴Ngadqere: Yesu wa tau: mung:- Byu wa zo:ve: yang za: kao so' qo" daui: na: ru mangad:- Mao"So: nhad' mae thug' li" ra" dao: thoe: yang za: kao so' qo" daui: na nae" ngad: ra" ga: jham: mugsug' mae tung" to" ra"- ga: ta" ra".

⁵Alao" yui wa Yesu re gyang" lho" ra" vogaung: mo" Yerusalem khyo jhui" lo mung: Caung:pa" Yham mae" khaung nho thao mae yhe' to: mung:

⁶Yesu re Nao Mao"So: Yao: Zo: ngad: re wa mho: khyo byae: gyo" lo" wa,- pe"mung:ga"re jham: mugsug' mae Mao"So wa nao re lhaug' zaung" byid: nae" qhid' mae" Mug: Lagyo: jham re amyin" byid: mung: yao: bam wa- laug baui dao ni" khyid lhao" mathaung" cad' vashao:- Yao: bam: lo; yang: lham: vo; yu: li" genae" ga: tung" to" ra"- ga: ta" ra".

⁷Yesu wa tau: mung:- ai: Asang ni" Mao"So re nao magai: jham" qu" nae" ga: re: tung" to" ra"- ga: ta" ra".

⁸Ai mae" yui wa Yesu re gyai myhao: ra" bam khyo jhui" do, lo" mung: myid gaung dao mae" mung"dan: alhab' we' ai: mung"dan: jham: phung qab bao re ceim" shid' mung:-

⁹Nao Ngo re goe; pa" ngad: re wa cegu: alhab' ngo nao re byid: nae" ga: Yesu re ta" ra".

¹⁰Yesu wa tau:- mung: Satan we"- thug' lo" wa,- Asang ni" Mao"So re za: nao goe; pa" mung: Yao: re za: caung da" nae" ngad: ra" ga: jham: mugsug' mae atung" to" ra"- ga: ta" ra".

¹¹Alao" yui wa Yesu mae" thug' lo" byaug: ra". Ai: thao re mug: lagyo: jham li" caung da" byid' ako".

¹²Yesu wa Yohan re thaung: taung" lhaung" pye' va" ga" rure the' gyo: lao"- yao: wa Galile mug: khyo thug' ye" lo" ra".

¹³Yao: wa Nazared mae maye: na lo: Zebulun we' Nabhtali mug: gyo:- Galile tham: yae mae" Kapena-um vogaung: mae yena: ra".

¹⁴Ceru: kad' ru wa Lapa Esaia ta" to" ra" dao: jab byang" li" nae" qhid' mae" ngad: ra".

¹⁵Lapa Esaia wa Zebulun we' Nabhtali mug:- Yodan gyaung: thoete' Galile tham: khyo- joe" ra" khyo cao" yang: taung bug qe na: ra" mug: Galile we"-

¹⁶Mug: cad' mae na: ra" mo, wa bo" bao qi: re the' myao: li" genae"- Amung: shid: ra" mug: cad' khug mae na: ra" mo; dao mae ai: bo" bao wa bao: li" nae" ga: ta" to" ra".

¹⁷Ai: au: mae" Yesu wa Naonhaung" myid tha" ge,- pe"mung:ga"re mug:gaung: mung"dan: wa jhao" li" na va"- ga: yao" mungdao: re kho" kyo" ra".

¹⁸Yesu wa Galile tham: yae cao" yang: su" lo" na: au:- ngo: kung" zo: byu ngad: ra" Petru ga: mang: ra" Simon we' yao: nhaung: Andre tao wa tham: mae geim pye' na: ko" rure yao: myao: ra".

¹⁹Alao" Yesu wa yao: tao re Nga" thao cao" ge,- ngo ni" shid' tao re byu kung" byu boe" nhao nae"- ga: ta" ra".

²⁰Alao" yao: shid' tao wa geim jham re to" pye' co' mung: yao: jhao" cao" ako".

²¹Yesu wa aitau mae" dam: su" ye" lo" re gatau danhae tao ngad: ra" Zebede yao: zo: Yaku we' yao: nhaung: Yohan tao re myao: ra"- yao: tao wa lha dao mae yao: pho" Zebede we' daga"- yao: bam: geim jham re pho: na: ako". Yesu wa yao: shid' tao re yao" thao cao" nae" qhid' mae" khai: ke' ra".

²²Ailao" jao" yao: shid' tao wa lha we' yao: pho" re to: co' mung: yao: jhao" cao" ako".

²³Amung: Yesu wa Galile mung" geim" jao: sho' du" qin" mung: Tarha" Jung Yham jham mae mho" shid' byid' ra". Mung"dan: ra" Ngaui Bau" Lau Dao: Gai re kho" kyo: mung:- no phyo: aja: ja: qhug' ra" mo, re we' no aja: ja: de; ra" mo, byu qere gai byid' ra".

²⁴Yao" khyo re Suri mung" geim" jao: sho' hau" nhao" lo" ko" ruyang mo, byu qe wa no phyo: qhug' ra" mo,- no aja: ja: de, ra" mo,- khai" nho mo,- yui zaung mo,- ngho' be, mo,- gaung ajam: shid mo, re yao: jhao" jhui" li" ako". Alao" Yesu wa yao: bam: no re gai byid' ra".

²⁵Alao" Galile" mung"- Dekapoli mung"- Yerusalem Yuda mung" we' Yodan gyaung: thoete' mae" byu phung: mo" Yesu thao cao" ako".