Read Maru MATHE 5 Bible Online

MATHE 5 - Maru bible

MATHE 5

¹Yesu wa byu phung: mo" re myao lao" bug gaung dalam: dao khyo do, ye" lo" ra". Yao: yezaung: jo, lao" Yao" mho"zo: qe wa yao: jhao" zang" lo: ako".

²Alao" yao: wa dao: phung" mung: yao: bam re mho" shid' ru wa-

³Byo mae myaung sho: beim" ra" mo, wa- ngaui lho" ko" ra"- Pe"mung:ga"re mug:gaung: mung"dan: wa yao: bam: mung"dan: ngad: ra".

⁴Kaug' qhui: ra" mo, wa ngaui lho" ko" ra"- Pe"mung:ga"re Mao"So wa yao: bam re nhag' tang" byid' li" nae".

⁵Nhag' lam: nau" nhae" ra" mo, wa ngaui lho" ko" ra"- Pe"mung:ga"re yao: bam wa Mao"So: dao:so: to" ra" shaman" jeju re yao: bam qo" khae: yu genae".

⁶Mao"So myid o: ra" khyo re phug' cao" nae" moe, shab' ra" mo, wa ngaui lho" ko" ra"- Pe"mung:ga"re- Mao"So wa yao: bam re nhag' dag nhao: li" nae".

⁷Nhag' ba: khyag' ra" mo, wa- ngaui lho" ko" ra"- Pe"mung:ga"re Mao"So wa yao: bam re nhag' khyag' yu: li" nae".

⁸Nhag' lam: san sin" mo, wa ngaui lho" ko" ra"- Pe"mung:ga"re yao: bam wa- Mao"So re qhug' myao: li" genae".

⁹Mang: dae ba: tae" ra" mo, wa ngaui lho" ko" ra"- Pe"mung:ga"re yao: bam re Mao"So: yao: zo: qe ga: mhang" li" genae".

¹⁰Mao"So myid o: ra" khyo re phug' cao" yang: yhin" ru qhug' ra" mo, wa ngaui lho" ko" ra"- Pe"mung: ga: re Mug:gaung: mung"dan: wa yao: bam: mung"dan: ngad: ra".

¹¹Nga" mathao: yang byu qe wa naonhaung" re maphug' makhyad' kad' ru we' yhin" mung: madang: ra" khyo" qobo vhin mung: ta" gelao"- naonhaung" wa ngaui lho" ko" ra"-

¹²Ngaui bau: ngaui lho" na ge,- pe"mung:ga"re mug:gaung: mung"dan: mae naonhaung" aphug' jhaung qhu" wa gyai qi" ra". Naonhaung" qhid' au: mae" lapa qere re: yao: bam airu: za: yhin" avako".

¹³Naonhaung" wa myid gaung: dao: xo: ngad: ako". Ngadqere: xo: wa ngae: ra" ru shao" byaug lao" ai: xo: re dam: ngae sho' magai: kad' yu lo:ngad: ra". Ai: xo: wa pe" akyu" mabo loyang: taung gaung khyo shapye' pye' mung: byu jham zab: nhae" pye' ko" ra".

¹⁴Naonhaung" wa mug: myid: bo" bao ngad: ako"- Bug gaung dao mae te" to" ra" vogaung: re maqo" go: to: ngad: ra".

¹⁵Myikaug' re te' mung: ban" yang mamaug: lhaung" to" qu"- Yham khug mae na: ra" mo, alhab' re bao byid: nae" qhid' mae myikaug' tao" dao mae lhaung" zhaung: to" ako".

¹⁶Ai we' dakhyo: byu jham wa naonhaung" kad' ra" gai: ra" mau" zo" jham re the' myao mung: mug:gaung dao mae na: ra" naonhaung" Pho" re caung:khin" byid: vageshao: naonhaung" bo" bao re byu jham: qhid' kheim: mae bao byid' to: ge,-

¹⁷Kham" to" ra" Tarha" we' Lapa qe: dao: jham re qab: pye' nae" qhid' mae" ngo joe" li" ru ngad: ein: naonhaung" dajho ge,- aijham re qab: pye' nae" ein: ngo joe" li" ru mangad:. Jab byang" li" nae" qhid' mae" ngo joe" li" ru ngad:.

¹⁸Naonhaung" re ngo dang dang ta" geli"- Mug:gaung we' myid gaung malai: lo" shire ta" to" ra" gu: alhab' majab byang" byang" wa kham" to" ra" Tarha" dao: mae" tung" ce' dace' we' myo, dace' lhao" malai: lo" nae".

¹⁹Airu: mung: khag' ngadqere: ai: ngai: thao" ra" amyin" dao: re yao: shad' lhoe" mung: su gaje qere airu: shad' lhoe" nae" mho" byid' ra" yaug wa- Mug:gaung: mung"dan: mae ngai thao" yaug ngad: li" nae". Ngadqere: ai: amyin" dao: jham re phug' cao" mung: su gaje qere airu: phug' cao" nae" mho" byid' ra" yaug wa mug:gaung: mung"dan: mae qi" thao" yaug boe" nae" ngad: ra".

²⁰Amung: Ngo naonhaung" re ta" ru wa Mao"So myid o: ra" khyo" phug' cao" rumae Pharishe qe we' tung" pho" qe tho' naonhaung" maje qere wa mug:gaung: mung"dan: khyo maqo" vao ye: genae".

²¹Byu dase'- Byu se' ra" yaug wa dao: kho' ru qhug' ca" nae" ga: daba: pyad mae" mo, ta" to" ra" dao: naonhaung" the' gyo" avako".

²²Ngadqere: ngo naonhaung" re ta" ru wa yao: mao: yao: nhaung: re nhag' yo" ra" yaug khag' ngadqere: dao: kho' ru qhug' ca" nae". Yao: mao: yao: nhaung: re byugao: ga: ta" ra" yaug wa tarha" yung" mae dao: phyid' ru qhug' ca" nae"- amung: yao: mao: yao: nhaung: re ago ga: shad' ra" yaug khag' ngadqere: myiqid tham: khyo pye' zaui: ke' ru qhug' li" nae".

²³Amung: nao wa phan dao mae Mao"So re xeim: ngaui" byid: nae" seim" na: au:- ni" mao:nhaung: dayaug yaug nao re nhag' mashid qobo vhin: to" ru daja: ja: re myid: beim" ke' lao"-

²⁴Ai: xeim: re shi" to: co' mung: lo" yang: ni" mao:nhaung: pho" we' shi" mang: dae sho' lo" kad' wa,- Bin lao" dam: tug' lo mung: ni" xeim: Mao"So re lo: ngaui" byid: wa,.

²⁵Nao re qobo zhaug' yaug we' daga" tarha" yung" khyo ye" lo" na: au:- tarha" yung" khyo majoe" shi: re yao: we' jho" vang" sho' phyad kad' yu wa,. Nao airu: makad' lao" yao: wa nao re tarha" zug: pho" lo, khug khyo ab byid' pye' li" nae". Alao" tarha" zug: pho" wa nao re gug: gam pho" lo, khyo ab byid' pye' mung: nao re thaung: khug mae lhaung" to" li" nae".

²⁶Naonhaung" re ngo dang dang ta" geli"- nao khyug' ca" ra" ngaui alhab' mabin: khyug' khyug' wa thaung: mae" nao qo" thug' lo nae" mangad:.

²⁷Su: myi: su: lao dashad' wa,- ga: ta" to" ra" dao: re naonhaung" gyo" qu" vako" ra".

²⁸Ngadqere:- ngo naonhaung" re ta" ru wa nhag' lam" yang qu" sang yu nug: ra" khyo" myiqe: re qu" ra" yaug khag' ngadqere: yao" nhag' lam: mae ai: myiqe: re shad' yaug ngad: ra".

²⁹Amung: ni" lo, yo shad' myo,jid' yang nao re qobo kad' nhao: ngad: re wa ai: myo,jid' re thad' shalhaui" pye' wa,- pe"mung:ga"re ni" gaung geim" myiqid tham: khyo gyo" lo" nae" tho' ni" gaung mae" dadau qeim: byaug: ru wa je: gai shi" ra".

³⁰Ni" lo, yo lo; yang nao re qobo kad' nhao: ngad: re wa ai: lo, re qam" phyid' pye' wa,- pe"mung:ga"re ni" gaung geim" myiqid tham: khyo gyo" lo" nae" tho' ni" gaung dadau qeim: byaug: ru wa ni" qhid' mae" je: gai shi" ra".

³¹Alao"- yao" yham sang myhi" re kao" pye' nug yaug wa yao" yham sang myhi" re kao: mugsug' tung" byid' ke' ca"- ga" ra" dao: jo, gau ngad: ra".

³²Ngadqere: ngo naonhaung" re ta" ru wa yao" yham sang myhi" re yug: qho yang: mangad: lo: kao" pye' mung: ai: myiqe: wa gatau dayaug we' dam: lo, xo' yu: ngad: re wa yao: wa yao" yham sang myhi" re lao shad' nhao: ra" qobo qo" ra". Alao" ai: myiqe: re dam: lo, xo' yu: ra" yaug re: su: myi: lhad' yaug ngad: ra".

³³Nao to" ra" dao:so: re daphyo' wa,- Mao"So re byid' to" ra" ni" dao:so: re zaui" pyang" wa,- ga: daba: mae" mo, re ta" to" ra" dao: re naonhaung" gyo" qu" vako" ra".

³⁴Ngadqere: ngo naonhaung" re ta" ru wa- naonhaung" dao:so: dalam: lam: to" ra" au: mug:gaung re lao: yang: jham datang" ge,- pe"mung:ga"re mug:gaung wa Mao"So: zaung tao ngad: ra".

³⁵Myid gaung re lao: yang: re: jham datang: ge,- Myid gaung wa Mao"So: khyid nao: jo, qo ngad: ra". Yerusalem re lao: yang: re: jham datang: ge,- Yerusalem wa kho:kham mo" na: ra" vogaung: ngad: ra".

³⁶Alao" yao: yao" au: re lao: yang: re: jham datang: ge,- pe"mung:ga"re Naonhaung" wa xae dakhe' re za: lhao" phyu sho' no, sho' maqo" kad' gengad: ra".

³⁷Airumung:- naonhaung" dao: wa- ngad lao" wa ngad va" ein: mangad: lao" wa mangad: ein: za: ta" ge,- aimae" je: ra" naonhaung" ta" ra" dao: wa makhyang" ra" yaug mae" lo: ra" dao: ngad: ra".

³⁸myo,jid' qhid' mae" myo,jid'- zaui qhid' mae" zaui dam: tug' ca" ga" ra" dao: re naonhaung" gyo" qu" vako" ra".

³⁹Ngadqere: ngo naonhaung" re ta" ru wa- Nao re magai kad' ra" yaug re lage, daphaug' wa- Ni" lo, yo shad' boqae pyo' yaug re lo, kaung: shad' rere: pyo' nhao shi: wa-

⁴⁰Ni" akhug: bau: re yu nug yang: yung" zaung: ra" yaug re ni" bau: qhang rere: yu: lo" nhao shi: wa,-

⁴¹Nao re maqad maqui" deim" zag mung: khyo daman: qovin ye: nhao: yaug we' khyo shid' man: ye: shi: wa.

⁴²Nao jhao" mho' yaug re byid: wa,- nao jhao" daja: ja: jhid' ngho: nug yaug re jhid' ngho: byid: wa,-

⁴³Ni" Ba nam sang: cao: qere jhid'de; wa,- ni" gye jham re nghang: wa, ga" ra" dao: re naonhaung" gyo" qu" avako".

⁴⁴Ngadqere: ngo naonhaung" re ta" ru wa naonhaung" re yhin" ra" mo; qhid' mae" akyu" mho' byid: ge,.

⁴⁵Airulao" naonhaung" wa mug:gaung dao mae na: ra" yao: Pho" zo: dau qe boe" genae". Pe"mung:ga"re magai: ra" mo, we' gai: ra" mo; dao mae dakhyo: za: Mao"So wa ba zho byid' ru we' din:man" ra" khyo kad' mo, we' madin: man" ra" khyo kad' ra" mo; dao mae mug: qu byid' ra".

⁴⁶Naonhaung" re jhid'de; ra" mo, re za: naonhaung" jhid'de; ko" re wa- Mao"So mae" pe" jhaung qhu" qo" yu genae" i? Khang: khyui zo: mo, lhao" re: airu: kad' ko" ra".

⁴⁷Amung: naonhaung" wa- mao:nhaung: qe we' za: jho" jhau zam" khug ko" ngad: re wa- gaje tho' nao kad' ru pe" je: i? Taung bug qere: ai we' dakhyo: kad' ako".

⁴⁸Amung: mug:gaung dao mae" naonhaung" Pho" wa jab byang" ru we' dakhyo: naonhaung" re: jab byang" na ge,.