Read Maru MATHE 6 Bible Online

MATHE 6 - Maru bible

MATHE 6

¹Amung: su the' myao vageshao: ein:- mo, byu qe myo: sho' qhid' kheim: mae naonhaung" lalam lakhug: mau" zo" jham re mazaui: nae" qhid' mae lha" ge,- Airu: mangad: re mug:gaung dao mae na: ra" naonhaung" yao: Pho" mae" pe" shaman" jeju re: maqo" yu genae".

²Amung: nao wa qo ca" ra" mo, re aung lam alu: byid' ngad: re- su: yang caung:khin" geshao: ein:- tarha" jung yham jham mae we' hau" mo" khyodang khaung: mae geim kad' ra" mo, kad' ru we' dakhyo: labo" mad nhao yang: dahau: wa,- ngo naonhaung" re ta" ru wa yao: bam wa yao: bam o: ra" jhaung qhu" qo" yu: avako".

³Ngadqere: qo ca" mo, re naonhaung" aung lam alu: byid: ko" re- ni" lo, yo lo, kad' ra" mau" zo" re ni" lo, kaung: lo, re daba nhao wa,.

⁴Alao" ni" aung lam alu: byid' ra" khyo wa anyham: avho' mae kad' ru ngad nae". Amung: anyham: avho' kad' rure myao: ra" ni" Pho" wa nao re jhaung qhu" byid' li" nae".

⁵Amung: naonhaung" akyu" mho' gelao"- geim kad' ra" mo, we' dakhyo: dakad' ge, Pe"mung:ga"re yao: bam wa su alhab' yao: bam re the' myao vageshao: ga:- tarha" jung yham jham mae we' hau" mo" khyokao: jham mae ye; jo, yang: akyu" mho' nug mo, ngad: ako".

⁶Naonhaung" kam" wa akyu" mho' gelao"- kug qe, khyo vao lo" mung: kham: pyid' yang: myo, yang mamyao: ra" naonhaung" yao: Pho" re akyu" mho' ge,. Alao" anyham: avho' mae kad' rure myao: ra" naonhaung" yao: Pho" wa naonhaung" re shaman" jeju byid' li" nae".

⁷Amung: naonhaung" akyu" mho' gelao" taung bug[1] qe kad' ru we' dakhyo: lajheim: mabo ra" dao: jham re daci ge,- Taung bug qe wa akyu" qhang sho' mho' ruyang yao: bam akyu" mho' dao: re tae" gyo: byid' li" nae" ga: myid: jho: ako".

⁸Ai bam ru: dakad' ge,- pe"mung:ga"re naonhaung" mamho' shi: gamae" naonhaung" qo: ra" ja: alhab' re naonhaung" yao: Pho" wa ba: to: gau ngad: ra".

⁹Airu: mung: naonhaung" akyu" mho' gelao"- ceru: mho' ge,- Mug:gaung dao mae" ngonhaung" Pho" we"- Ni" gyang" lho" ra" mang A re phug' myao: vageshao:-

¹⁰Ni" mung"dan: joe" lo vashao:- Mug:gaung dao mae ni" nhag' dag: ru we' dakhyo: myid gaung: dao mae re: dag: lo vashao wo"-

¹¹Ngonhaung" qo: ra" zo:ve ana" ba ngonhaung" re byid: la,-

¹²Ngonhaung" re shad' ra" mo; qobo re ngonhaung" khyad' byid' ru we' dakhyo: ngonhaung" qobo rere: khyad' byid: la,-

¹³Ju" phyo' ra" khyo ngonhaung" re maye: nhao lo: makhyang: yaug: lo, mae" ngonhaung" re khyad' yu la, wo"-[2]

¹⁴Naonhaung" re shad' ra mo; qobo re naonhaung" khyad' byid: ko" ngad: re mug:gaung: dao mae na: ra" naonhaung" Pho" re: naonhaung" qobo re khyad' byid' li" nae".

¹⁵Naonhaung" re shad' ra" mo; qobo re naonhaung" makhyad' byid: ko" ngad: re wa naonhaung" Pho" wa naonhaung" qobo rere: makhyad' byid: nae".

¹⁶Amung: naonhaung" zo:ve jao" gelao"- geim kad' mo, we' dakhyo: myo, nho asham zang dakad' ci ge,- yao: bam wa yao: bam zo:ve jao" na: ra" khyo re su alhab' the' myao vageshao: ga: yao: bam: ave, re lhai" pye' ako"- naonhaung" re ngo ta" gali" Yao: bam wa yao: bam o: ra" aphug' jhaung qhu" re qo" yu: avako".

¹⁷Naonhaung" zo:ve jao" gelao" myo,jid' yang mamyao: ra" naonhaung" Pho" mae" lai yang: naonhaung" zo:ve jao" na: rure khag' maqo" ba genae" qhid' mae" myo, cid' mung: au: xau gyad yang: kyo' shaung: pye' ge,.

¹⁸Anyham: avho' kad' rure myao: ra" naonhaung" Pho" wa- naonhaung" re shaman" jeju byid' li" nae".

¹⁹Nhug we' zu: yang qo" zo" qheim" pye' mung: khug' mo, kyaung" thad' vao ye: yang: qo" khug' yu: ra" ce: myid gaung dao mae Naonhaung" jo,nho" jham re naonhaung" qhid' mae" daqaung" to: ge,-

²⁰Ai: atha" nhug we' zu: yang maqo" zo" qheim" ru we' khug' mo, re: maqo" kyaung" vao ye: maqo" khug' yu: ra" mug:gaung dao mae naonhaung" jo,nho" jham re naonhaung" qhid' mae" qaung" to: ge,.

²¹Pe"mung:ga"re naonhaung" jo,nho" jo; ra" tau mae naonhaung" nhag' lam: taui" jo, li" genae".

²²Amung: ai: myo,jid' wa- gaung khyao qhid mae" myi:baung: ru" ru ngad: ra". Ai: ni" myo, jid' qang: qang: za: ngad: re wa ni" gaung geim" bao: jo; li" nae".

²³Ngadqere: ni" myo,jid' mae athab zang ngad: re wa- ni" gaung wa cad' jo; li" nae". Airu: mung: ni" bo" bao wa mug: cad' boe" byaug: re wa ai: mug: cad' wa khoqhi" no, sang: kyid ngad: nae" i?.

²⁴Khag' ngadqere: asang shid' yaug: jeim qo" kad' nae" mangad:- yao: wa asang dayaug re nghang: mung: dayaug re jhid'de; li" nae". Asang dayaug re gyaug phug' mung:- gatau dayaug re maphug' makhyad' kad' li" nae". Amung: naonhaung" wa Mao"So re we' ngaui qhang jo,nho" re daga" za: qo" caung da" byid: genae" mangad:.

²⁵Aimung: ngo naonhaung" re ta" ru wa- Pe" zo: pe" shaug' nae" laug ein: kao so' qhid' mae" Pe" ve, nae" laug ein: gaung khyao qhid' mae" naonhaung" damyid: ci" ge, Ai: kao so' wa zo:ve tho'- gaung khyao wa ve, mai ve, bau tho' je: akhyag: mangad: i?

²⁶Mug: phyo: mae dao" qin" ra" ngho' jham re qu" qu" ge,- yao: bam wa myug: shi: re masin: maqho:- yad re: mayad: yu- jhi mae re: maqaung" to: gengad: ra". Ngadqere: mug:gaung dao mae na: ra" naonhaung" Pho" wa yao: bam re zho" na: ra". Naonhaung" wa ngho' jham tho' myo: sho' je: phug' de, ko" mangad: i?

²⁷Naonhaung" mae" khag' ngadqere: myid: ci" ruyang yao: yao" kao re dadaung" je: qo" qhang nhao ko" i?

²⁸Naonhaung" wa pe"mung yang:- ve,mai ve,bau: qhid' mae" myid: ci" ko" i? Pa: din" mae" seyo: bin: gae jham khoru: yaug: qi" li" ko" rure myid: qu" ge,. Yao: bam wa mau" re: mazaui:- jid: re: manai: ko" ngad: ra".

²⁹Ngadqere: ngo naonhaung" re ta" kyo: geli". Phung qab bao qi" ru we' gyai qo" ra" Sholamon kho:kham lhao" re: ai: bin: gae jham mae" dagae ru: yaung" sho' maqo" shaung ve; ngad: ra".

³⁰Mao"So re lam khug: ra" myid ngai: ra" mo, we"- ana" ba yaug: jo, mung: ne, mo" ba myi:khyeim" mae ngha" pye' ra" seyo mae" myo, gae jham re Mao"So shaung vhe' byid' ra". Yao: wa naonhaung" re je yang: vhe' byid' li" nae" mangad: i?

³¹Airu: mung: naonhaung" wa- myid: ci" yang: pe" zo: pe" shaug' zai laug ein: data" ge,.

³²Pe"mung:ga"re taung bug qe wa- ai: gu: alhab' qhid' mae" myid: ci" yang: qho: ako". Mug:gaung dao mae na: ra" naonhaung" Pho" wa ai: gu: alhab' naonhaung" qo ca" na ko" rure ba gau ngad: ra".

³³Naonhaung" kam" wa- Mao"So: mung"dan: we' yao: myid o: ra" khyo re sao qhid' qho ge,. Alao" yao: wa ai gatau qo ca" ra" gu: alhab' rere: naonhaung" re byid' li" nae".

³⁴Airu: mung: ne, mo" ba: qhid' mae" damyid: ci" ge,- Ne, mo" ba wa yao" qhid' mae" myid: ci" li" nae"- ana" ba qug: khai" ru wa ana" ba: qhid' mae" ga" va" ra".